DC SUMBAWANGA AMALIZA MGOGORO WA ARDHI ULIODUMU KWA ZAIDI YA MIAKA 20

Na Mwandishi Wetu

MKUU wa Wilaya ya Sumbawanga Nyakia Ally amefanya mkutano wa hadhara katika Kijiji cha Ilembo Kata ya Mpui kwa ajili ya kushughulikia mgogoro kati ya wananchi wa Kijiji cha Ilembo na aliyekua Mwenyekiti wa Kijiji hicho Ndugu Lucas Kasanya.

Katika mkutano huo wananchi wamedai Mwenyekiti huyo wa zamani na mwenzake Herman wamehodhi ekari 130 Mali ya Kijiji kwa manufaa yao wamekua wakikodisha kwa lengo la kujipatia fedha.

Pia wananchi walitoa ufafanuzi kuwa mashamba hayo ni mali ya kijiji ambapo awali yalikua yanalimwa na kijiji na mazao yaliyopatikana yalitumika kwa shughuli za maendeleo na baadae baadhi ya wananchi waligaiwa ekari mbili mbili kwa ajili kulima mazao ya chakula.

Katika mkutano huo,wananchi walimueleza Mkuu wa Wilaya kwamba Lucas Kasanya alihamia kijijini hapo kutoka Tanga na baadae aligombea nafasi ya mwenyekiti wa Kijiji Cha Ilembo, alitumia njia za kilaghai akishirikiana na Bwana Herman kutwaa maeneo hayo.

Baada ya kusikiliza pande zote za mgogoro iliamuliwa kwamba shamba hili lirejeshwe Kwa mmliki wa awali ambaye ni Serikali ya Kijiji na Mkurugenzi asimamie kupanga matumizi ya shamba hili ili litumike kwa manufaa ya kijiji na pande zote za mgogoro zimeridhia maamuzi haya.

Wananchi wamempongeza Mkuu wa Wilaya kwa kumaliza mgogoro huo uliodumu kwa muda mrefu kijijini hapo.