DC KUBECHA ASISITIZA HUDUMA ZA AFYA ZENYE UBORA KWA WANANCHI BILA MALALAMIKO

Na Ashrack Miraji Michuzi blog

Mkuu wa Wilaya ya Tanga, Mheshimiwa Japhari Kubecha, ameendelea na ziara yake katika maeneo mbalimbali ya wilaya hiyo ambapo alifanya ziara maalum katika Kata ya Pongwe, kuangalia hali ya huduma za afya zinazotolewa kwenye Kituo cha Afya cha Pongwe. Ziara hii ilifanywa kufuatia malalamiko ya wananchi kuhusu taratibu zisizo rasmi za malipo, ambapo walieleza kushindwa kupokea risiti kwa huduma wanazopata pamoja na ukosefu wa mfumo wa kisheria katika malipo hayo.

Akiwa katika Kituo cha Afya cha Pongwe, Mheshimiwa Kubecha alieleza wazi kuwa ni lazima huduma za afya ziwe bora na zinatolewa kwa kuzingatia taratibu na sheria zilizowekwa na serikali. Aliitaja changamoto hii kama mojawapo ya mambo yanayohitaji kushughulikiwa haraka ili kuondoa malalamiko kutoka kwa wananchi ambao wanategemea huduma za afya ili kuboresha maisha yao.
Aidha, alimtaka Kaimu Mkurugenzi na Mganga Mkuu wa Jiji la Tanga, Dkt. Mwandambo, kuchukua hatua madhubuti kwa wasimamizi wa vituo vya afya vilivyokuwa vikilalamikiwa mara kwa mara. Alisisitiza kuwa ni muhimu kufanya mabadiliko katika usimamizi wa vituo hivyo kwa kuzingatia sheria, kanuni, na taratibu zilizowekwa na Serikali ili kuhakikisha huduma bora za afya zinapatikana kwa wananchi bila kikwazo.

“Tunataka wananchi wetu kupata huduma bora za afya bila kuingiliwa na taratibu zisizo za kisheria. Ni lazima kuhakikisha kuwa malipo yanayofanywa ni rasmi, yanafuata mfumo wa serikali na wananchi wanapata risiti ili kuondoa malalamiko yanayotokea,” alisisitiza Mheshimiwa Kubecha.

Ziara hii ni sehemu ya juhudi za Serikali ya Wilaya ya Tanga kuhakikisha kuwa huduma za kijamii, hasa afya, zinakuwa bora na zinawafaidi wananchi bila changamoto yoyote.