KWAGILWA AMTWANGA MKANDARASI DEADLINE YA UJENZI WA SHULE MAALUM MLANDIZI

Na Mwamvua Mwinyi, Kibaha, Novemba 29, 2025

NAIBU Waziri, Ofisi ya Waziri Mkuu – TAMISEMI, Kwagilwa Reuben, amemuagiza mkandarasi anayetekeleza mradi wa ujenzi wa shule ya awali na msingi kwa watoto wenye mahitaji maalum Mlandizi, Kibaha mkoani Pwani, kukamilisha ujenzi ifikapo Januari 2026.

Agizo hilo alilitoa Novemba 28, 2025, wakati wa ziara yake ya kazi Mjini Kibaha, ambapo alitembelea shule hiyo na kukutana na watendaji na viongozi mbalimbali .

Reuben alisema Serikali chini ya Rais Dkt. Samia Suluhu Hassan imetoa shilingi milioni 506.5 kwa ajili ya kujenga miundombinu hiyo ,mradi ambao unaenzi kwa vitendo kaulimbiu ya Kazi na Utu.

Aliwasisitiza wazazi na walezi kuhakikisha wanaandikisha watoto wao wote waliofikia umri wa kuanza shule za awali na shule za msingi, ikiwemo watoto wenye mahitaji maalum.

“Kila kiongozi kwenye eneo lake ahakikishe anasimamia suala hili, Sisi tumejipanga kupokea watoto wote nchini ambao wamefikia umri wa kuandikishwa shule za awali na msingi, hadi wenye mahitaji maalum,” alisema Reuben.

Katika ziara hiyo, Reuben aliwaagiza wakurugenzi kuhakikisha ofisi zote za umma zilizo chini ya TAMISEMI zinapimwa na kupatiwa hati.

Vilevile, alikumbusha watumishi wa umma kuzingatia muda wa kazi, akiwataka kuingia saa 1:30 asubuhi na kutoka saa 9:30 jioni, sambamba na kufuata Kanuni za Utumishi wa Umma za mwaka 2009.

Aidha, aliwataka viongozi hao kusimamia miradi yote ya Serikali, ikiwemo miradi viporo, ili kuhakikisha inakamilika kabla ya maandalizi ya bajeti ya mwaka 2026.

Pia aliagiza kuimarishwa kwa usimamizi wa mapato, kuongeza kasi ya ukusanyaji na kubuni vyanzo vipya ili kuongeza mapato ya halmashauri.

Mkurugenzi wa Halmashauri ya Wilaya ya Kibaha ,Regina Bieda alieleza kuwa mradi wa shule hiyo unatekelezwa kupitia vyanzo viwili vya fedha, "awali Serikali kuu imetoa milioni 128 kwa ajili ya mabweni mawili, madarasa na matundu ya vyoo milioni 55"

", na fedha za Boost zikiwa milioni 506 ambazo milioni 503 zimeelekezwa kwenye ujenzi na milioni 3 usimamizi.

Naye mkandarasi wa mradi huo, Msafiri Minja, alieleza walianza ujenzi Novemba 4, 2025, na hadi sasa umefikia asilimia 35, huku akiahidi utakamilika ifikiapo Januari 5, 2026.