MIAKA TISA YA SuFP YAVUTA HUDUMA ZA UZAZI WA MPANGO KARIBU NA WANANCHI

Na Karama Kenyunko, Michuzi TV

MKURUGENZI Muendeshaji wa shirika lisilo la kiserikali (MSI) Tanzania, Dkt. Stephen Mutegeki, amesema utekelezaji wa Programu ya Scaling Up Family Planning (SuFP) kwa kipindi cha miaka tisa umechangia kwa kiasi kikubwa kusogeza huduma za afya ya uzazi na uzazi wa mpango karibu na wananchi, hususan wanawake, vijana, watu wenye ulemavu na makundi mengine yaliyokuwa magumu kufikiwa.

Dkt. Mutegeki ameyasema hayo leo jijini Dodoma wakati wa Kongamano la Kujifunza la Programu ya SuFP lililofanyika chini ya kaulimbiu isemayo, “Kudumisha Mafanikio Yaliyopatikana katika Afya ya Uzazi na Uzazi wa Mpango.”

Amesema MSI Tanzania, kama mmoja wa washirika wa utekelezaji wa programu hiyo iliyofadhiliwa na Serikali ya Uingereza kupitia Foreign, Commonwealth and Development Office (FCDO), imejikita katika kuimarisha mifumo ya afya ya umma, kuboresha ubora wa huduma na kujenga uwezo wa wataalamu wa afya ili kuhakikisha huduma bora zinawafikia wananchi wengi zaidi.

Kwa mujibu wa Dkt. Mutegeki, kupitia programu hiyo MSI Tanzania ilipeleka timu 12 za huduma za mkoba katika mikoa 12 ili kufikisha huduma za afya ya uzazi katika maeneo ya pembezoni na magumu kufikika.

Aidha, wauguzi 28 walipangwa katika mikoa 14 kwa ajili ya kutoa ushauri wa kitaalamu na kujenga uwezo wa watumishi wa afya katika vituo vya umma.

Alisema vituo vya afya vya umma 176 vilipatiwa mafunzo na usimamizi wa kitaalamu, huku watoa huduma za afya 469 wakipatiwa mafunzo maalumu ya utoaji wa huduma bora za uzazi wa mpango na afya ya uzazi.

“Zaidi ya wataalamu wa afya 1,180 wamenufaika na programu za uangalizi na ushauri kazini zilizolenga kuimarisha ubora wa huduma,” amesema.

Akizungumzia huduma kwa vijana, Dkt. Mutegeki amesema MSI Tanzania imetekeleza zaidi ya matukio 32 katika taasisi za elimu ya juu pamoja na miradi 32 ya Human-Centred Design iliyolenga kuongeza upatikanaji wa taarifa na huduma za afya ya uzazi kwa vijana na balehe.

Kwa upande wake, Mtaalamu wa Afya ya Mama na Uzazi ambaye pia ni Mkurugenzi Mkazi wa EngenderHealth, Dkt. Moke Magoma, amesema programu hiyo ililenga kuongeza upatikanaji wa huduma jumuishi za uzazi wa mpango kwa makundi mbalimbali ya wananchi.

Amesema huduma hizo pia zilihusisha uchunguzi wa Virusi vya Ukimwi (VVU), utoaji wa msaada kwa waathirika wa ukatili wa kijinsia pamoja na kuwaelekeza kupata huduma stahiki. Aidha, programu hiyo ilisaidia kuboresha vituo vya afya vya serikali ili kuhakikisha vinatoa huduma bora kwa wanawake waliopoteza ujauzito.

“Tulilenga kufikisha huduma za uzazi wa mpango kwa makundi ambayo hayakuwa yakifikiwa kwa urahisi, hususan vijana balehe, watu wenye ulemavu na wananchi wanaoishi katika maeneo ya mbali,” amesema.

Dkt. Magoma amesema pia walihakikisha mifumo ya utoaji wa huduma inaboreshwa, ukusanyaji wa takwimu unafanyika kwa ufasaha na ubora wa huduma unafuatiliwa kwa karibu kwa kuhamia kutoka mfumo wa makaratasi kwenda mfumo wa kidijitali.

Naye Mwakilishi wa UNFPA Tanzania, Mark Bryan Schreiner, amesema zaidi ya watu milioni 5.2 wamefikiwa na huduma za uzazi wa mpango kati ya mwaka 2017 na 2026.

Amesema hatua hiyo imechangia kuzuia mimba zisizotarajiwa milioni 8.3, utoaji mimba usio salama milioni 2.3 na vifo vya wajawazito 6,511.

Kwa mujibu wa takwimu zilizowasilishwa katika kongamano hilo, programu ya SuFP ilitekelezwa katika mikoa 22 ya Tanzania na kusaidia kuimarisha mifumo ya ugavi wa dawa na vifaa tiba, usimamizi wa taarifa za kidijitali na uwezo wa wahudumu wa afya katika kutoa huduma bora za afya ya uzazi.

Mbali na kuimarisha huduma za afya, programu hiyo ilitoa kipaumbele kwa vijana, watu wenye ulemavu na jamii zilizo katika mazingira magumu kupitia ubunifu mbalimbali, ikiwemo mfumo wa kidijitali wa i-Plan uliorahisisha upatikanaji wa taarifa na huduma za afya ya uzazi.

“Kuna umuhimu wa kuongeza uwekezaji wa ndani katika sekta ya afya ili kuhakikisha mafanikio haya yanaendelea kudumu wakati ambapo misaada ya maendeleo kutoka nje inaendelea kupungua duniani,” amesema.

Programu ya SuFP ilitekelezwa kwa ushirikiano wa UNFPA, MSI Tanzania, EngenderHealth, Pathfinder International, CCBRT, DKT na International Rescue Committee (IRC), kwa ufadhili wa Serikali ya Uingereza kupitia FCDO.

Vichwa vingine vya habari unavyoweza kutumia ni:

SuFP Yafikia Zaidi ya Watu Milioni 5.2 kwa Huduma za Uzazi wa Mpango.

Picha ya pamoja.