Bolt Send Yakua Zaidi ya Mara Sita Katika Usafirishaji wa Bidhaa Tanzania

 Bolt Send imeongezeka kwa zaidi ya mara sita katika shughuli za usafirishaji wa bidhaa nchini Tanzania tangu ilipozinduliwa Agosti 2024, hali inayoonesha kuongezeka kwa kasi kwa mahitaji ya huduma za haraka na rahisi za kusafirisha bidhaa ndani ya miji bila wateja au wafanyabiashara kulazimika kufanya safari wenyewe. 

Huduma hiyo, ambayo sasa inapatikana katika miji minne nchini Tanzania, imekua kwa takribani mara 6.6 kutoka ilipozinduliwa hadi Aprili 2026, huku shughuli zake zikiongezeka kwa asilimia 46.4 kati ya Januari na Julai 2026. Kwa sasa, Tanzania ina kiwango cha matumizi ya Bolt Send kilicho juu kwa asilimia 22.5 ikilinganishwa na Ghana. 

Ukuaji huo unaonesha mabadiliko ya tabia za watumiaji mijini, ambapo watu wanazidi kutarajia nyaraka, manunuzi, vifurushi na bidhaa mbalimbali kufikishwa kwa urahisi sawa na jinsi wanavyopata huduma za usafiri wa abiria. Kwa wafanyabiashara, hususan wafanyabiashara wadogo ambao hawana magari au mfumo wao wa usafirishaji, huduma hii inawapa fursa ya kuwafikia wateja bila kulazimika kuwekeza katika miundombinu yao wenyewe ya usafirishaji. 

Dar es Salaam inaendelea kuwa soko kuu la Bolt Send nchini, ikichangia asilimia 98.2 ya shughuli zote za huduma hiyo Tanzania. Shughuli za usafirishaji jijini humo zimekua kwa mara 6.4 tangu huduma hiyo ilipozinduliwa hadi kufikia kiwango chake cha juu miezi 20 baadaye. Ukuaji pia unaongezeka nje ya Dar es Salaam. 

Dodoma imerekodi ongezeko la mara 11 la safari za usafirishaji ndani ya miezi 13 tangu huduma hiyo kuzinduliwa, huku Mwanza, ambako Bolt Send ilizinduliwa Mei 2026, ikifikia takribani mara nane ya kiwango chake cha awali ndani ya miezi miwili. Arusha nayo inaendelea kurekodi ukuaji wa mwezi hadi mwezi. 

Takwimu hizo zinaonesha kuwa mahitaji ya huduma rahisi za usafirishaji hayapo Dar es Salaam pekee, bali yanaanza kuwa sehemu ya shughuli za kila siku za biashara katika miji mingine nchini. Ubora wa huduma umeendelea kuwa wa kiwango cha juu sambamba na ukuaji huo, huku wasafirishaji wakipata wastani wa alama 4.88 kati ya 5 kutoka kwa wateja. 

Kwa wastani, safari moja ya Bolt Send hufikia umbali wa takribani kilomita 7.7. “Si lazima mtu aache kazi, afunge biashara au avuke jiji kwa ajili tu ya kupeleka bidhaa moja,” alisema Dimmy Kanyankole, Meneja Mkuu Mwandamizi wa Bolt Afrika Mashariki. “Ukuaji tunaouona unaonesha fursa iliyopo kwa teknolojia kuondoa changamoto ndogo za usafirishaji na kuwapa wateja na wafanyabiashara nafasi ya kutumia muda wao katika shughuli zenye tija zaidi,” aliongeza.

 Bolt sasa inajiandaa kupanua huduma ya Send hadi Morogoro kabla ya mwisho wa mwaka 2026. Fursa inaendelea kuwa wazi zaidi: kadri miji ya Tanzania inavyokua na biashara kuhitaji huduma za haraka zaidi, huduma rahisi za usafirishaji wa hatua ya mwisho zinaweza kuwa kiungo muhimu zaidi kati ya wateja, wauzaji na wafanyabiashara.