CCM KUENDELEA KUISIMAMIA SMZ KUTEKELEZA MIRADI YA MAENDELEO

NA MWANDISHI WETU, ZANZIBAR

NAIBU Katibu Mkuu wa Chama Cha Mapinduzi (CCM) Zanzibar, Ndugu Abdi Mahamoud Abdi, amesema CCM itaendelea kuisimamia Serikali ya Mapinduzi ya Zanzibar (SMZ) ili kuhakikisha inatekeleza kwa ufanisi miradi mbalimbali ya maendeleo, hususan katika sekta ya elimu.

Ndugu Abdi ameyasema hayo baada ya kukabidhi vifaa vya ujenzi katika Skuli ya Maandalizi Kikaangoni, ikiwa ni sehemu ya muendelezo wa ziara yake ya kukagua uhai wa Chama kuanzia ngazi ya matawi ndani ya Jimbo la Mfenesini.

Amesema vifaa hivyo, vilivyotolewa kupitia Mfuko wa Jimbo la Mfenesini, vitasaidia kupunguza baadhi ya changamoto zinazoikabili skuli hiyo na kuboresha mazingira ya kujifunzia na kufundishia.

Vifaa vilivyokabidhiwa ni pamoja na gypsum board, ndoo za rangi na mbao, ambavyo vitatumika katika ujenzi na ukarabati wa miundombinu ya skuli hiyo.

Amesisitiza kuwa CCM itaendelea kushirikiana na Serikali pamoja na wananchi katika kuhakikisha miradi ya maendeleo inatekelezwa na inawanufaisha wananchi kwa wakati.