MICHUZI BLOG

Shirika la Posta Tanzania (TPC) limeendelea kuimarisha nafasi yake katika sekta ya usafirishaji na usambazaji wa bidhaa nchini kupitia ushiriki wake katika uzinduzi wa jukwaa la biashara la Xerin Market, linalolenga kuwaunganisha wafanyabiashara na wateja kupitia teknolojia pamoja na huduma za usafirishaji.

Uzinduzi huo umefanyika Novemba 11, 2026, Kariakoo, jijini Dar es Salaam, ukihudhuriwa na Mkurugenzi Mkuu wa Mamlaka ya Maendeleo ya Biashara Tanzania (TanTrade), Ephraim Mafuru, aliyemwakilisha Waziri wa Viwanda na Biashara, pamoja na Mkurugenzi wa Masoko na Mauzo wa Posta, Ferdinand Kabyemela, aliyemwakilisha Postamasta Mkuu.

Akizungumza katika hafla hiyo, Kabyemela amesema mafanikio ya biashara za mtandaoni hayaishii katika kuwaunganisha wauzaji na wanunuzi kupitia teknolojia pekee, bali yanahitaji pia mfumo madhubuti wa usafirishaji na usambazaji wa bidhaa, ambao Posta imejipanga kuutoa.

Amesema ushirikiano huo utaongeza fursa kwa wafanyabiashara wa Kariakoo na maeneo mengine nchini kufikia masoko mapana zaidi, huku wateja wakinufaika na huduma za usafirishaji na usambazaji wa bidhaa.

Kupitia ushirikiano huo, Posta Tanzania inaendelea kutumia mtandao na miundombinu yake kuunganisha biashara, watu na fursa za kiuchumi katika maeneo mbalimbali nchini.

HABARI HABARI JAMII

Matukio katika picha

MICHUZI BLOG at Wednesday, November 11, 2026 0

MATUKIO katika picha wakati wa hitimisho la ziara ya Makamu wa Rais wa Jamhuri ya Muungano wa Tanzania, Mhe. Deogratius Ndejembi wilayani Namtumbo, mkoani Ruvuma tarehe 11 Novemba 2026.

Mhe. Daniel Chongolo (Mb), Waziri wa Kilimo anashiriki katika ziara hiyo akiambatana na viongozi mbalimbali wakiwemo Bi. Tagie Daisy, Mkurugenzi wa Mawasiliano wa Wizara ya Kilimo; Dkt Andrew Komba, Afisa Mtendaji Mkuu wa Wakala wa Taifa Hifadhi ya Chakula (NFRA); Bw Joel Laurent, Mkurugenzi Mkuu wa Mamlaka ya Udhibiti wa Mbolea Tanzania (TFRA; Bw. Samwel Mshote, Mkurugenzi Mkuu wa Kampuni ya Mbolea Tanzania (TFC) na aimu Mtendaji Mkuu wa Wakala wa Mbegu za kilimo (ASA) Mhandisi, Innocent Masaka.

HABARI HABARI JAMII

MKUU WA MKOA AZINDUA MAABARA YA TEHAMA YENYE THAMANI YA SHILINGI MILIONI 188 KIBAHA GIRLS

MICHUZI BLOG at Wednesday, November 11, 2026 0

MKUU wa Mkoa wa Pwani, Mhe. Stanslaus Nyongo, amezindua maabara ya Teknolojia ya Habari na Mawasiliano (TEHAMA) katika Shule ya Sekondari ya Wasichana Kibaha, mradi uliogharimu jumla ya Shilingi milioni 188, uliotekelezwa kwa ufadhili wa Taasisi ya Capitalpay Foundation.

Akizungumza Novemba 11, 2026, wakati wa uzinduzi huo, Nyongo ameipongeza Capitalpay Foundation kwa kushirikiana na Serikali katika kuboresha mazingira ya kujifunzia na kuimarisha matumizi ya teknolojia katika sekta ya elimu.

Aidha, ametoa wito kwa taasisi na wadau wengine wa maendeleo mkoani Pwani kuendelea kuunga mkono juhudi za Serikali kwa kuchangia miradi ya maendeleo, hususan katika sekta ya elimu.

Amesema katika kipindi cha mwaka 2021/22 hadi 2025/26, Mkoa wa Pwani ulipokea jumla ya Shilingi bilioni 118.31 kwa ajili ya kuboresha miundombinu ya elimu, ambapo utekelezaji wake umehusisha ujenzi wa shule mpya 75, zikiwemo shule 35 za Awali na Msingi na shule 40 za Sekondari. Shule hizo ni pamoja na Shule ya Sekondari ya Wasichana ya Sayansi Bibi Titi Mohamed na Shule ya Sekondari ya Wavulana ya Kanda Mkuranga Boys.

Aidha, Serikali imejenga jumla ya vyumba vya madarasa 1,889, vikiwemo 64 vya Elimu ya Awali, 809 vya Elimu ya Msingi na 1,016 vya Elimu ya Sekondari, pamoja na matundu ya vyoo, maabara, maktaba, mabwalo, mabweni na majengo ya utawala, sambamba na ukarabati wa miundombinu ya shule.

Mkuu wa Mkoa Pia amesisitiza umuhimu wa wazazi na walezi kuhakikisha watoto wote wenye umri wa kwenda shule wanandikishwa na wanafunzi waliochaguliwa kujiunga na Kidato cha Kwanza mwaka 2027 wanaripoti katika shule walizopangiwa.

Kwa upande wake Katibu tawala Mkoa wa Pwani Richard Kayombo shule hiyo imepata nafasi ya kipekee na kuwataka wanafunzi kutumia maabara hiyo kama nyenzo muhimu katika kuongeza tija kwenye masuala ya teknolojia.

Naye Mkurugenzi wa Taafisi ya Capital pay Foundation kwa upande wa Tanzania Isack Nchunda amesema maabara hiyo itawafanya wanafunzi kuwa wabuni katika teknologia za mifumo na kuahidi kuwa kwa wale watakaokuwa wabobezi wataweza kupata fursa za ajira katika taasisi hiyo.

Uzinduzi wa maabara hiyo ni sehemu ya ushirikiano kati ya Serikali na wadau wa maendeleo katika kuimarisha elimu na kuwawezesha wanafunzi kupata maarifa na ujuzi wa TEHAMA.

HABARI HABARI JAMII

TRA KUWAJENGEA UWEZO MADEREVA WA MIZIGO YA TRANSIT

MICHUZI BLOG at Wednesday, November 11, 2026 0

MAMLAKA ya Mapato Tanzania (TRA) imeanza kutoa elimu kwa madereva wanaosafirisha mizigo ya mpito (transit) kutoka Bandari ya Dar es Salaam kwenda nchi nyingine ili kuwajengea uelewa wa sheria na taratibu za forodha na kuhakikisha mizigo inafika katika nchi husika bila kukiuka masharti ya usafirishaji.

Kaimu Naibu Kamishna wa Udhibiti na Ushurutishaji wa TRA, Anangisye Mtafya, amesema baadhi ya changamoto zinazojitokeza katika usafirishaji wa mizigo hiyo zinatokana na baadhi ya madereva kutofahamu taratibu wanazopaswa kuzifuata, hali inayoweza kusababisha mizigo kuingizwa nchini kinyume cha sheria.

Mtafya ameyasema hayo Novemba 11, 2026, wakati TRA ilipokutana na madereva wa magari yanayosafirisha mizigo ya transit jijini Dar es Salaam kwa lengo la kuwapatia elimu kuhusu sheria na taratibu za usafirishaji wa mizigo hiyo.

Amesema kumekuwa na matukio ya baadhi ya madereva kushawishiwa na watu wasio waaminifu kumwaga mizigo ya transit ndani ya nchi badala ya kuipeleka katika nchi zilizokusudiwa, jambo linalosababisha changamoto kati ya madereva na waajiri wao.

Amesema vitendo hivyo vina athari mbalimbali, ikiwemo kupoteza mapato ya Serikali kutokana na bidhaa kuingia nchini bila kulipiwa kodi, kuhatarisha afya za wananchi pale bidhaa kama chakula na dawa zinapoingia sokoni bila kupitia taasisi zinazohusika na udhibiti wake, pamoja na kuathiri ushindani wa kibiashara.

Aidha, amesema uingizaji huo wa bidhaa unaweza kuhusishwa na vitendo vya utakatishaji fedha, hivyo ni muhimu kwa madereva kufahamu wajibu wao na kuzingatia taratibu za forodha katika safari zao.

Akizungumzia umuhimu wa elimu hiyo, Mtafya amesema dereva atakayebainika kuhusika na kumwaga mzigo wa transit anaweza kuwajibishwa kwa kulipa faini, huku gari lililotumika kusafirisha mzigo huo likiwa katika hatari ya kutaifishwa kwa mujibu wa sheria. Pia, dereva anaweza kufikishwa mahakamani.

Amesema utoaji wa elimu hiyo ni endelevu na TRA itaendelea kuwafikia madereva katika vituo mbalimbali vinavyopitisha mizigo ya transit nchini.

Ametaja vituo hivyo kuwa ni pamoja na Rusumo, Mutukula na Kabanga, huku akieleza kuwa watarejea Tunduma kutokana na wingi wa mizigo inayopita katika kituo hicho. Aidha, TRA itaendelea kutumia vipeperushi kuwafikishia madereva na wadau wengine elimu kuhusu taratibu za usafirishaji.

Kwa upande wake, dereva wa malori, Nelson Impinzile, amesema mafunzo hayo yamemsaidia kufahamu makosa ya kiforodha ambayo awali hakuwa na uelewa nayo, ikiwemo kuongeza mizigo kwenye mzigo wa transit na kushusha mizigo katika maeneo ambayo hayajaidhinishwa.

Amesema elimu hiyo ni muhimu kwa kuwa makosa hayo yanaweza kusababisha madereva kulipa faini kubwa au kufungwa, hivyo ameiomba TRA kuendeleza mafunzo hayo mara kwa mara ili kuwajengea uelewa wa kutosha.

Naye Mwenyekiti wa Madereva Wanawake Tanzania, Naetwe Ihema, amesema mafunzo hayo yamemsaidia kufahamu taratibu za usafirishaji, ikiwemo muda na mazingira yanayofaa kwa dereva kusimama au kuegesha gari wakati wa safari na umuhimu wa kuhakikisha nyaraka za gari zinaendana na taarifa zilizoandaliwa na mamlaka za forodha.

Ihema, anayewakilisha madereva wanawake wa mabasi, malori, meli, SGR, pikipiki, mitambo na madereva wa viongozi, ameiomba TRA kuendeleza elimu hiyo kupitia redio, televisheni na magazeti ili kuwafikia madereva wengi zaidi.

Amesema madereva wana muda mchache wa kupata taarifa sahihi kutokana na majukumu yao ya kila siku, hivyo utoaji wa elimu mara kwa mara utawasaidia kuongeza uelewa na kutekeleza majukumu yao kwa kuzingatia sheria na taratibu.

HABARI HABARI JAMII

Serikali yataka teknolojia za ndani kuingia sokoni

MICHUZI BLOG at Wednesday, November 11, 2026 0

Dar es Salaam

WABUNIFU na watafiti nchini wametakiwa kuangalia mapengo yaliyopo katika soko la bidhaa na huduma ili kuelekeza ubunifu wao katika kutengeneza bidhaa zinazohitajika, badala ya kuwekeza katika teknolojia zisizo na uhakika wa kupata soko.

Hatua hiyo inalenga kuifanya sayansi na teknolojia kuwa kichocheo cha uzalishaji viwandani, kupunguza utegemezi wa bidhaa zinazoagizwa kutoka nje na kuongeza fursa za biashara kwa wabunifu wa ndani.

Wito huo umetolewa na Waziri wa Elimu, Sayansi na Teknolojia, Profesa Adolf Mkenda, akizungumzia maandalizi ya kilele cha maadhimisho ya miaka 40 ya Tume ya Taifa ya Sayansi na Teknolojia (Costech), yatakayofanyika Novemba 17 na 18 mwaka huu katika ukumbi wa Mlimani City, Dar es Salaam.

Profesa Mkenda amesema Tanzania ina watafiti na wabunifu wenye uwezo wa kutengeneza teknolojia mbalimbali, lakini changamoto iliyopo ni kuhakikisha ubunifu huo unajibu mahitaji halisi ya soko na kugeuzwa bidhaa zinazoweza kuzalishwa kwa wingi.

"Hakuna nchi duniani inaweza kuendelea bila kuwa na maendeleo ya sayansi na teknolojia na kwenye ubunifu unaosaidia sekta mbalimbali kama kilimo, madini, huduma mbalimbali," amesema.

Amesema badala ya taasisi za elimu na utafiti kuwekeza katika malengo makubwa yasiyoendana na uwezo wa sasa wa uzalishaji, zinapaswa kuanza kwa kubaini bidhaa ambazo nchi inazihitaji na ambazo bado zinategemea kuagizwa kutoka nje.

Ametolea mfano Chuo cha DIT, akisema kinaweza kuelekeza nguvu katika kutengeneza vipuri vya magari na pikipiki, ikiwamo mifumo ya breki (brake pads), ambavyo vina soko nchini kutokana na matumizi ya vyombo hivyo vya usafiri.

"Huwezi kuanza kutengeneza gari, au pikipiki au helkopta lazima uanze na vipuri mfano nimewapa kazi DIT waangalie kupitia Mamlaka ya Mapato Tanzania ni bidhaa au vipuri gani vya pikipiki ambazo zinaagizwa sana kutoka nje, halafu angalieni namna ya kuanza kuzalisha kisha mnakuja na kampuni tanzu," amesema.

Kwa mujibu wa waziri huyo, mkakati huo utasaidia kujenga uwezo wa viwanda vya ndani hatua kwa hatua, huku ukitoa nafasi kwa wabunifu kushirikiana na taasisi za uzalishaji na wafanyabiashara.

Baadhi ya bunifu zilizofanywa na Watanzania tayari zimeonyesha uwezekano wa kupata soko hata nje ya nchi, akitaja kifaa cha Mkanda Salama kinachosaidia kudhibiti tatizo la kutokwa na damu nyingi baada ya kujifungua (Postpartum Haemorrhage—PPH).

Amesema kiwanda cha kutengeneza kifaa hicho kimeanzishwa Kimara Suka, Dar es Salaam, huku Rwanda na Ethiopia zikionyesha nia ya kukinunua.

Bunifu nyingine ni chanjo ya samaki inayolenga kuzuia magonjwa katika ufugaji wa samaki na teknolojia nyingine ya kuzalisha gesi ya oksijeni na hidrojeni kwa kutumia maji, iliyobuniwa na Mbunifu Luvanda wa Chuo Kikuu cha Sayansi na Teknolojia Mbeya (MUST).

"Unatenganisha gesi hizo ambapo Oksijeni unaweza kutumia hospitalini na hidrojeni unawwza ukatumia kupikia. Tumeagiza vyuo vyetu viangalie ili ikiwa sawa tuokoe hela kwa kutumia maji tu tunayoyachota" amesema.

Pia ametaja teknolojia ya kutengeneza saruji ya gharama ndogo zaidi kwa kuchanganya pozzolana na chokaa, iliyobuniwa na mwanafunzi wa shahada ya uzamivu kutoka Ethiopia anayesoma Chuo cha Nelson Mandela jijini Arusha.

"Kimachobuniwa tunatakiwa tuhakikishe kinaingia sokoni, sio kila mara tunaonesha leo tumebuni gari miaka 20 mbele halisogei. Tunataka ubunifu unaozalisha," amsema.

Profesa Mkenda amesema mifano hiyo inaonyesha umuhimu wa kuunganisha utafiti, ubunifu na mahitaji ya watumiaji ili kuhakikisha teknolojia zinazotengenezwa zinakuwa na matumizi yanayoeleweka na uwezo wa kuuzwa.

Hata hivyo, amesema mafanikio ya ubunifu hayawezi kupimwa kwa idadi ya teknolojia zinazoonyeshwa kwenye maonesho au zinazobaki maabara, bali kwa uwezo wake wa kutatua changamoto, kuzalishwa kwa wingi na kuingia sokoni.

Katika hatua nyingine, amesema Serikali inaendelea kuweka mazingira ya kukuza ubunifu kupitia Mfuko wa Ubunifu wa Samia (Samia Innovation Fund), unaolenga kusaidia wabunifu kuendeleza mawazo yao na kuyageuza kuwa biashara zinazoweza kuzalisha ajira na kuchochea uchumi.

Amesema pia inawekeza katika elimu ya sayansi, ufadhili wa wanafunzi wanaofanya vizuri katika masomo ya sayansi na utoaji wa tuzo kwa wahadhiri na watafiti wanaofanya tafiti zenye mchango mkubwa.

Waziri huyo amesema kilele cha maadhimisho ya miaka 40 ya Costech kitakuwa fursa kwa wananchi kujionea bunifu mbalimbali za Watanzania na kujifunza namna sayansi na teknolojia zinavyoweza kutumika kutatua changamoto za kijamii na kiuchumi.

Waziri Mkuu, Dk Mwigulu Nchemba, anatarajiwa kuwa mgeni rasmi katika kilele hicho Novemba 18.

HABARI

MAMIA YA WAKAZI WA MIRERANI WAJITOKEZA KUMZIKA MKE WA KATIBU WA MAREMA

MICHUZI BLOG at Wednesday, November 11, 2026 0

Na Mwandishi Wetu, Mirerani

Mamia ya wakazi wa mji mdogo wa Mirerani, Wilaya ya Simanjiro, wamejitokeza katika mazishi ya marehemu Laura Lawrence Massawe, aliyekuwa mke wa Katibu wa Chama cha Wachimbaji Madini Mkoa wa Manyara (MAREMA), Tariq James Kibwe.

Mazishi hayo yalifanyika Mirerani, huku mwili wa marehemu ukizikwa katika eneo la Kia, Mkoa wa Kilimanjaro.

Afisa Madini Mkazi wa Mkoa wa Kimadini wa Mirerani (RMO), George Kaseza, aliongoza waombolezaji katika mazishi hayo na kutoa pole kwa Kibwe pamoja na familia yote kutokana na msiba huo.

Kwa upande wake, Naibu Katibu Mkuu wa Shirikisho la Vyama vya Wachimbaji Madini Tanzania (FEMATA), Peter Kabepera, akimwakilisha Rais wa shirikisho hilo, John Bima, alitoa salamu za pole na rambirambi kwa familia ya marehemu.

Alisema Rais Bima hakuweza kuhudhuria mazishi hayo kutokana na kuwa nje ya nchi, hivyo kumtuma kumwakilisha katika msiba huo.

Naye Mwenyekiti wa MAREMA, Elisha Nelson Mnyawi, aliwapa pole wafiwa na kuwataka kuwa na moyo wa subira na kumtegemea Mungu katika kipindi hicho kigumu.

Viongozi wengine waliotoa pole ni pamoja na Mwenyekiti Mstaafu wa MAREMA, Justin Nyari, na Diwani wa Kata ya Mirerani, Salome Nelson Mnyawi, ambaye aliwataka watoto wa marehemu kuendelea kumpenda, kumheshimu na kumthamini baba yao katika kipindi hiki cha majonzi.

Mazishi hayo yalihudhuriwa na viongozi mbalimbali, wadau wa sekta ya madini, ndugu, jamaa na wananchi wa maeneo mbalimbali.

HABARI

RAIS SAMIA AHUTUBIA MKUTANO WA COP31 NCHINI UTURUKI

MICHUZI BLOG at Wednesday, November 11, 2026 0

Mheshimiwa Dkt. Samia Suluhu Hassan, Rais wa Jamhuri ya Muungano wa Tanzania, akiwa na viongozi mbalimbali katika Mkutano wa Wakuu wa Nchi na Serikali (Antalya Leaders’ Summit) kuhusu mabadiliko ya Tabianchi (COP31) uliofanyika kwenye ukumbi wa ANFAŞ Antalya Expo Center nchini Uturuki, tarehe 11 Novemba, 2026.

HABARI

KADOGOSA, WAZIRI WA FEDHA KENYA WAJADILI UWEKEZAJI MIRADI SEKTA YA MIUNDOMBINU

MICHUZI BLOG at Wednesday, November 11, 2026 0

WAZIRI wa Ujenzi Masanja Kadogosa, amekutana na kufanya mazungumzo na Waziri wa Baraza la Mawaziri anayesimamia Hazina ya Taifa nchini Kenya FCPA John Mbadi, jijini Nairobi nchini Kenya.

Katika mazungumzo hayo, viongozi hao wamejadili namna bora ya kutumia mfumo wa Ubia kati ya Sekta ya Umma na Sekta Binafsi (PPP) katika utekelezaji wa miradi ya barabara, hususan katika maeneo ya uwekezaji, upatikanaji wa fedha na ushirikiano wa sekta hizo katika kuendeleza miundombinu.

Mazungumzo hayo pia yalihusisha kubadilishana uzoefu na maarifa kuhusu mbinu bora za kuandaa, kufadhili na kusimamia miradi mikubwa ya maendeleo, pamoja na mifumo ya ulipaji wa huduma za baadhi ya miundombinu kwa lengo la kuhakikisha miradi hiyo inaendelezwa kwa ufanisi na uendelevu.

Mkutano huo ulihudhuriwa na Katibu Mkuu wa Uwekezaji wa Umma na Usimamizi wa Rasilimali za Serikali, Bw. Cyrell Wagunda, pamoja na viongozi wa Idara ya Ubia kati ya Sekta ya Umma na Sekta Binafsi (PPP) nchini Kenya, wakiongozwa na Mkurugenzi Mkuu, Mhandisi Kefa Seda.

Mhe. Kadogosa na ujumbe wake wapo nchini Kenya kushiriki Mkutano wa 16 wa Afrika kuhusu Ufadhili, Uwekezaji na Ubia katika Miundombinu (Africa PPP 2026), unaofanyika jijini Nairobi na kukutanisha wadau mbalimbali wa maendeleo, wawekezaji na taasisi za kifedha kujadili fursa na mikakati ya kuongeza uwekezaji katika miradi ya miundombinu barani Afrika.

HABARI

KAMBI YA MATIBABU YA KIBINGWA KUANZA NOVEMBA 16 HOSPITALI YA TUMBI

MICHUZI BLOG at Wednesday, November 11, 2026 0

Na Victor Masangu, Pwani

Madaktari bingwa kutoka hospitali mbalimbali nchini wanatarajia kutoa huduma za matibabu ya kibingwa na bobezi kwa wananchi katika Hospitali ya Rufaa ya Mkoa wa Pwani ya Tumbi, kuanzia Novemba 16 hadi 20, 2026.

Akizungumza na waandishi wa habari ofisini kwake, Mkuu wa Mkoa wa Pwani, Stanslaus Nyongo, amesema kambi hiyo itakuwa maalumu kwa wananchi wa Mkoa wa Pwani na maeneo jirani kupata huduma za kibingwa bila malipo.

Amesema huduma hizo zitatolewa kwa siku tano, kuanzia saa mbili asubuhi hadi saa kumi jioni, huku akiwataka wananchi kujitokeza kwa wingi kutumia fursa hiyo kupata uchunguzi na matibabu kutoka kwa madaktari bingwa.

Kwa upande wake, Kaimu Mganga Mkuu wa Hospitali ya Rufaa ya Mkoa wa Pwani ya Tumbi, Dk. Silas Msangi, amesema maandalizi ya kambi hiyo yanaendelea vizuri na kutoa wito kwa wananchi kujitokeza kupata huduma hizo.

Ameeleza kuwa madaktari bingwa watakaoshiriki katika kambi hiyo wanatoka mikoa ya Singida, Iringa, Morogoro, Dodoma na Pwani.

Kambi hiyo inalenga kuongeza upatikanaji wa huduma za kibingwa na bobezi kwa wananchi bila gharama yoyote.

HABARI KILIMO

NDEJEMBI: TATUENI KERO ZA WAKULIMA KUHARAKISHA UZALISHAJI WENYE TIJA

MICHUZI BLOG at Wednesday, November 11, 2026 0

MAKAMU wa Rais wa Jamhuri ya Muungano wa Tanzania, Mhe. Deogratius Ndejembi, ameielekeza Wizara ya Kilimo kushughulikia kwa haraka kero za wakulima, zikiwemo malipo ya madeni ya mauzo ya Tumbaku, mgawanyo wa shamba la uzalishaji wa mbegu -Namtumbo, upatikanaji wa pembejeo na bei ya Mahindi, ili kuwawezesha wakulima kuanza uzalishaji kwa wakati na kuongeza tija.

Ameelekeza hayo wakati wa ziara yake Wilayani Namtumbo, mkoani Ruvuma tarehe 11 Novemba 2026, ambapo amesisitiza utekelezaji wa agizo la Mheshimiwa Rais Dkt. Samia Suluhu Hassan la kutenga sehemu ya shamba la uzalishaji wa mbegu kwa wananchi wa eneo husika na kuagiza hatua hiyo itekelezwe mara moja.

Shamba hilo lenye ukubwa wa hekta 6,618.43 linajumuisha hekta 1,366.03 zinatumika kwa makazi ya wananchi;, hekta 3,580.39 zinatumiwa na Wakala ya Mbegu za Kilimo (ASA) kwa kuzalisha mbegu, na hekta 1,672.01 zimeelekezwa kutengwa kwa wananchi kufanya shughuli za kilimo.

Kuhusu madeni ya wakulima wa Tumbaku, Makamu wa Rais ameelekeza Kampuni ya 3H kukamilisha malipo ya deni la Dola za Marekani 450,000 ifikapo mwisho wa Novemba 2026. Kwa mujibu wa kampuni hiyo, vyama 38 kati ya 43 tayari vimeshalipwa, huku vyama vitano vilivyobaki vikiwa vimepokea asilimia 50 ya madai yao.

Akizungumzia suala la mahindi, Waziri wa Kilimo, Mhe. Daniel Chongolo (Mb), amesema Serikali imeongeza bei ya ununuzi kutoka Shilingi 450 hadi 500 kwa kilo na kwamba Wakala wa Taifa wa Hifadhi ya Chakula (NFRA) uko tayari kuanza mara moja ununuzi wa mahindi katika Ghala la Namtumbo baada ya kukamilisha maandalizi yote muhimu.

Kuhusu mbolea, Waziri Chongolo amewataka mawakala wa mbolea za ruzuku Namtumb kuzingatia bei elekezi ya Serikali ya Shilingi 93,000 hadi 95,000 kwa mfuko.

Ziara hiyo imewahamasisha wakulima kuendelea kuingia mashambani na kuongeza uzalishaji, huku Serikali ikiendelea kuchukua hatua za kutatua changamoto zilizobaki ili kuimarisha usalama wa chakula na kukuza uchumi wa Taifa.