at Wednesday, September 30, 2026 0
ALGIERS: Tanzania na Algeria zimepiga hatua katika kuimarisha ushirikiano katika sekta tano muhimu, huku nchi hizo zikitarajia kupanua ushirikiano huo katika maeneo mengine kwa lengo la kuleta manufaa kwa wananchi wa pande zote mbili.

Hayo yamesemwa na Balozi wa Jamhuri ya Muungano wa Tanzania nchini Algeria, Mhe. Mobhare Matinyi, wakati akizungumza na waandishi wa habari wa vyombo mbalimbali vya Algeria leo asubuhi katika ofisi za Ubalozi wa Tanzania jijini Algiers.

Balozi Matinyi amesema sekta ambazo zimepiga hatua katika kipindi cha miezi michache iliyopita ni viwanda vya dawa, nishati, elimu ya juu, biashara ya mazao ya kilimo na ufugaji wa nyuki.

Amesema hatua hizo zinafuatia maelekezo ya viongozi wa nchi hizo mbili ya kugeuza maeneo ya ushirikiano yaliyobainishwa kuwa fursa halisi za maendeleo kwa wananchi.

“Nilipowasilisha hati zangu za utambulisho mnamo Juni 10, 2026, Rais Abdelmadjid Tebboune alisisitiza kwamba sasa umefika wakati wa kuuweka ushirikiano wetu katika vitendo. Nilipokuja Algeria, Rais Dkt. Samia Suluhu Hassan pia alisisitiza kwamba kutokana na ushirikiano wetu wa kimkakati, sasa ni wakati wa kupata manufaa kwa ajili ya wananchi wetu,” amesema Balozi Matinyi.
Ushirikiano katika dawa

Akizungumzia sekta ya dawa, Balozi Matinyi amesema Mamlaka ya Taifa ya Bidhaa za Dawa ya Algeria (ANPP) pamoja na Saidal Group, kampuni ya dawa inayomilikiwa na Serikali ya Algeria, zinatarajiwa kufanya ziara nchini Tanzania mwezi Oktoba kwa mwaliko wa Mamlaka ya Dawa na Vifaa Tiba (TMDA).

Amesema ziara hiyo inalenga kujadili namna ya kuimarisha ushirikiano wa kitaalamu kati ya taasisi hizo.

Ameeleza kuwa Tanzania ilikuwa nchi ya kwanza barani Afrika kufikia kiwango cha juu cha ML3 katika mfumo wa ukaguzi wa dawa mwaka 2018, kwa mujibu wa tathmini ya Shirika la Afya Duniani (WHO), huku Algeria ikiwa na takribani theluthi moja ya viwanda vya dawa vilivyopo barani Afrika.

Balozi Matinyi amesema hali hiyo inaweka msingi mzuri wa nchi hizo mbili kushirikiana na kufikia mafanikio makubwa katika sekta ya dawa.

Aidha, amesema kampuni ya dawa ya Hikma iko katika hatua za mwisho za kukamilisha makubaliano ya ushirikiano katika biashara na uwekezaji na Medipharm, kampuni tanzu ya Bohari Kuu ya Dawa (MSD), kwa lengo la kuhudumia masoko ya nchi za Afrika Mashariki, Kati na Kusini.

Amesema kampuni nyingine ya Algeria, Frater Razes, inatarajiwa kufika Tanzania mwezi Oktoba kwa ajili ya kufanya mazungumzo na Serikali kuhusu fursa za biashara na uwekezaji.
Nishati

Katika sekta ya nishati, Balozi Matinyi amesema Kampuni ya Usafirishaji na Usambazaji Umeme (ETDCO), kampuni tanzu ya Shirika la Umeme Tanzania (TANESCO), ilifanya ziara nchini Algeria mwezi Julai kwa ajili ya kujadili fursa za ushirikiano wa kiufundi.

Amesema wakati wa ziara hiyo, wataalamu wa ETDCO walitembelea maeneo ya kiufundi ya Shirika la Umeme na Gesi la Algeria (SONELGAZ), pamoja na kiwanda cha vifaa vya umeme cha GISB Electric.
Algeria kutoa nafasi 176 za masomo

Katika sekta ya elimu ya juu, Balozi Matinyi amesema Algeria imetoa nafasi 176 za masomo ya juu kwa wanafunzi kutoka Tanzania.

Amesema Serikali ya Tanzania imeamua kuchagua wanafunzi 150 wenye ufaulu wa juu chini ya mpango wa Samia Scholarship Extended, ambao wataenda kusoma masomo ya sayansi, teknolojia, uhandisi na tiba nchini Algeria.
Korosho na usindikaji wa mazao

Akizungumzia biashara ya mazao ya kilimo, Balozi Matinyi amesema kampuni ya Algeria ya Sarl Anacard’Or imenunua ghala la kuhifadhia korosho mkoani Mtwara kwa ajili ya kurahisisha usafirishaji wa korosho kwenda Algeria.

Amesema kampuni hiyo pia iko katika hatua za kukamilisha mipango ya kuanza shughuli za ubanguaji wa korosho nchini Tanzania.

Aidha, amesema kampuni nyingine ya Algeria inayotengeneza mashine za kusindika mazao ya kilimo, dawa na vifaa vya kufungashia, CAM Sarl, imekubali kushirikiana na Tanzania katika upatikanaji wa mashine hizo kwa ajili ya kuongeza thamani ya mazao kabla ya kupelekwa katika masoko ya kimataifa.
Ushirikiano katika ufugaji wa nyuki

Balozi Matinyi amesema Tanzania na Algeria pia zinatarajia kuanza ushirikiano katika sekta ya ufugaji wa nyuki na mazao yake.

Amesema hatua hiyo imefuatia ziara ya maafisa na wataalamu kutoka Wizara ya Maliasili na Utalii, Mamlaka ya Huduma za Misitu Tanzania (TFS) pamoja na wadau wa sekta binafsi nchini Algeria mwezi Septemba 2026, ambapo pande hizo zilikubaliana kuanza ushirikiano katika eneo hilo.

Akihitimisha mazungumzo yake na waandishi wa habari wa Algeria, Balozi Matinyi amewakaribisha wananchi wa Algeria kutembelea Tanzania na kujionea vivutio mbalimbali vya utalii, ikiwemo Hifadhi za Taifa za Serengeti na eneo la Ngorongoro, Mlima Kilimanjaro pamoja na fukwe za Zanzibar.


Read more »

at Wednesday, September 30, 2026 0
Katibu wa NEC, Itikadi, Uenezi na Mafunzo wa Chama Cha Mapinduzi (CCM), Kenani Kihongosi, amewasilisha taarifa kuhusu mafunzo ya kuongeza uelewa wa itikadi ya CCM, ujenzi wa Chama na kuongeza wanachama wapya, yaliyohitimishwa leo Septemba 30, 2026, katika Chuo cha Umoja wa Vijana wa CCM (UVCCM), Tunguu, Zanzibar.

Mafunzo hayo ya awamu ya pili yamehitimishwa na Makamu Mwenyekiti wa CCM Zanzibar ambaye pia ni Rais wa Zanzibar na Mwenyekiti wa Baraza la Mapinduzi, Dkt. Hussein Ali Mwinyi.

Akizungumza katika hafla hiyo, Kihongosi amesema usaili wa makada waliohudhuria mafunzo hayo ulizingatia uelewa wa historia, muundo, misingi na itikadi ya CCM, uwezo wa kujenga na kuwasilisha hoja, mbinu za ufundishaji, maadili na nidhamu, pamoja na uwezo wa kuendeleza elimu ya Chama.

Amesema mfumo huo wa usaili umewezesha kuweka viwango vinavyofanana vya uteuzi kabla ya makada hao kuanza mafunzo.

Kwa mujibu wa Kihongosi, mchakato huo wa usaili umekamilisha hatua muhimu ya udhibiti wa ubora kwa kuunganisha viwango vya uteuzi katika mikoa 32 na wilaya 168.

Amesema mafunzo hayo yamejikita katika maeneo mbalimbali, yakiwemo muundo na historia ya CCM, misingi na itikadi ya Chama, maadili katika itikadi na falsafa ya CCM, ujenzi wa makada, ujenzi upya wa imani ya wanachama na wananchi, pamoja na uwezo wa kujenga hoja.

Aidha, amesema mafunzo hayo yamezingatia matumizi ya mazingira ya kidijitali katika utoaji wa elimu na mawasiliano ya kisiasa, hatua inayolenga kuwawezesha makada kuendana na mabadiliko ya teknolojia na mazingira ya sasa ya mawasiliano.








Read more »

at Wednesday, September 30, 2026 0

Na Munir Shemweta

Serikali kuendelea kuweka mazingira wezeshi kwa ushiriki wa wadau katika maendeleo ya makazi, kwa kuzingatia sera, sheria na mipango ya kitaifa.

Hayo yameelezwa leo tarehe 30 Sept 2026 na Waziri wa Ardhi Nyumba na Maendeleo ya Makazi Mhe. Dkt Leonard Akwilapo wakati wa sherehe za miaka 40 ya UN Habitat for Humanity Tanzania jijini Dar es Salaam. Maadhimisho hayo yameambatana pia na kampeni ya ‘’Opening the door campaign’’ pamoja na uzinduzi wa mpango mkakati wa miaka mitano ya shirika hilo (Strategic Plan 2025-2029).

Mhe. Dkt Leonard Akwilapo amesema, Serikali, inatamani kuona Tanzania ambayo kila familia inapata fursa ya kuishi katika makazi salama, bora, yenye huduma muhimu na yanayomudu uwezo wa kiuchumi. 

Amebainisha kuwa, Serikali ya Awamu ya Sita, chini ya uongozi wa Mhe. Dkt. Samia Suluhu Hassan, Rais wa Jamhuri ya Muungano wa Tanzania imedhamiria kuhakikisha kuwa watanzania wanakuwa na makazi salama. 

Amesema, wizara yake inafanya juhudi pia za Kuimarisha upangaji na usimamizi wa ardhi; Urasimishaji wa makazi yasiyopangwa na Kuweka mazingira wezeshi kwa sekta binafsi na wadau wengine kushiriki katika utoaji wa makazi bora na nafuu nchini.

Amelipongeza Shirika la Habitat for Humanity Tanzania kwa kuandaa na kuzindua Mkakati wake wa Miaka Mitano (Strategic Plan 2025-2029) mkakati alioueleza kuwa, utatoa fursa ya kuangalia miaka ijayo kwa mtazamo mpana zaidi.

Akielezea kampeni ya “Opening the Door Campaign” ya Habitat for Humanity amesema, kampeni hiyo inao ujumbe mzito na muhimu ambapo ametoa rai kuwa kampeni hiyo itumike kuhamasisha wadau wengi zaidi kuwekeza katika makazi na fursa zinazotokana na makazi bora. 

‘’Ninaamini kwamba mafanikio ya kampeni hii yatategemea uwezo wetu wa kuunganisha nguvu za wadau mbalimbali na kuzifanya rasilimali zifike kwa wananchi wenye uhitaji zaidi ili lengo la kuwafikia watu millioni tatu na laki mbili ifikiwe’’. Amesema

Ametoa wito kwa sekta binafsi, taasisi za fedha, wafadhili, mashirika ya kimataifa, wataalamu na wananchi kuendelea kushirikiana na Habitat for Humanity Tanzania katika kufikia malengo yao haya.

Amesema, Wizara yake inapongeza kuanzishwa kwa Mkakati wa Miaka Mitano na “Opening the Door Campaign” ambapo ameeleza kuwa, iwapo utatekelezwa vyema utachangia kwa kiasi kikubwa kupunguza changamoto ya makazi nchini.

Mkurugenzi wa Taifa wa Un Habitat for Humanity Tanzania Bi. Magdalena George amesema shirika hilo limekuwa msaada mkubwa kwa jamii hususan katika upande wa makazi bora na kubainisha kuwa tayari shirika hilo limewafikia zaidi ya watu milioni 1.3.

Hata hivyo, amesema Pamoja na shirika hilo kutilia mkazo ujenzi wa nyumba salama na za gharama nafuu pia linaangalia vifaa vya ujenzi ili jamii iweze kumudu gharama za ujenzi.

Kwa upande wake Mlezi wa Un Habitat for Humanity Tanzania ambaye ni mke wa Rais Mstaafu wa Serikali ya Awamu ya Tatu Mama Anna Mkapa amesema, amekuwa akilishawishi Shirika la Un Habitat for Humanity Tanzania kujenga nyumba za wahitaji wasiojiweza na kutolea mfano wa ujenzi wa nyumba eneo la Chamwino Mkoani Dodoma na kueleza kuwa ujenzi huo uliacha alama.

Shirika la Un Habitat for Humanity Tanzania mbali na kushiriki kusaidia ujenzi wa nyumba kwa wasiojiweza na wenye uhitaji pia linashiriki kwenye miradi ya majisafi na usafi wa mazingira pamoja na Matumizi ya Nishati Safi ya Jua katika mashule.Waziri wa Ardhi, Nyumba na Maendeleo ya Makazi Mhe. Dkt Leonard Akwilapo akipata maelezo ya utekelezaji miradi mbalimbali ya shirika la Un Habitat for Humanity Tanzania kutoka kwa Mkurugenzi wa Taifa wa shirika hilo Bi. Magdalena George wakati wa sherehe za miaka 40 zilizofanyika jijini Dar es Salaam Sept 30, 2026. Kushoto ni mlezi wa shirika hilo Mama Anna Mkapa.

aziri wa Ardhi, Nyumba na Maendeleo ya Makazi Mhe. Dkt Leonard Akwilapo akizindua kampeni ya “Opening the Door Campaign” wakati wa sherehe za miaka 40 ya shirika la Un Habitat for Humanity Tanzania zilizofanyika jijini Dar es Salaam Sept 30, 2026. Kushoto ni mlezi wa shirika hilo Mama Anna Mkapa na kulia ni Mwenyekiti wa Bodi Bi. Neema Ndikumwani.
Mmoja wa wanufaika na miradi ya Shirika la Un Habitat for Humanity Tanzania akielezea namna alivyonufaika na miradi ya shirika hilo wakati wa sherehe za miaka 40 ya Un Habitat for Humanity Tanzania zilizofanyika jijini Dar es Salaam.
Waziri wa Ardhi, Nyumba na Maendeleo ya Makazi Mhe. Dkt Leonard Akwilapo akizungumza katika sherehe za miaka 40 ya shirika la Un Habitat for Humanity Tanzania zilizofanyika jijini Dar es Salaam Sept 30, 2026. Kushoto ni mlezi wa shirika hilo Mama Anna Mkapa.
Mlezi wa shirika la Un Habitat for Humanity Tanzania ambaye ni mke wa Rais Mstaafu wa Serikali ya Awamu ya Tatu Mama Anna Mkapa akizungumza wakati wa sherehe za miaka 40 ya shirika la Un Habitat for Humanity Tanzania zilizofanyika jijini Dar es Salaam.
Waziri wa Ardhi Nyumba na Maendeleo ya Makazi Mhe. Dkt Leonard Akwilapo akiwa katika picha ya pamoja na wajumbe wa Bodi ya Shirika la Un Habitat for Humanity Tanzania wakati wa sherehe za miaka 40 ya shirika hilo zilizofanyika jijini Dar es Salaam.  Wa pili kushoto ni Mlezi wa shirika hilo mama Anna Mkpa (PICHA ZOTE NA WIZARA YA ARDHI)


 

Read more »

at Wednesday, September 30, 2026 0

Kamishna wa Polisi Jamii, CP Alex Mkama, amewataka Maafisa Habari wa Jeshi la Polisi kutumia maarifa waliyoyapata katika mafunzo kuboresha utendaji wao na kuendana na mabadiliko ya teknolojia katika tasnia ya habari.

CP Mkama ametoa kauli hiyo wakati akifunga kikao kazi cha Maafisa Habari wa Jeshi la Polisi kilichofanyika katika Chuo cha Polisi Tanzania, Moshi, kuanzia Septemba 28 hadi 30, 2026.

Amesema mafunzo hayo yanapaswa kutafsiriwa kwa vitendo katika maeneo yao ya kazi, akiwataka Maafisa Habari kuwa wabunifu, hususan katika matumizi ya mitandao ya kijamii, ili kufikisha taarifa kwa wananchi kwa haraka, usahihi na kwa wakati.

Aidha, amewataka Maafisa Habari hao kutekeleza majukumu yao kwa kuzingatia nidhamu, haki, weledi, uadilifu na uzalendo, huku wakitambua wajibu wao katika kulinda na kuimarisha amani ya Jeshi la Polisi na nchi kwa ujumla.

CP Mkama pia amewataka kuendelea kuboresha utendaji wao katika tasnia ya habari kwa kutumia maarifa na ujuzi walioupata, akisisitiza umuhimu wa kutekeleza majukumu yao kwa ufanisi na kuhakikisha hawamwangushi Mkuu wa Jeshi la Polisi Tanzania.
Read more »

at Wednesday, September 30, 2026 0
Taasisi ya Jiolojia na Utafiti wa Madini Tanzania (GST) imetoa elimu kuhusu tahadhari za majanga ya asili, masuala ya jiolojia na El Nino kwa wakazi wa Kijiji cha Mamba Miamba, Jimbo la Same Mashariki, Wilaya ya Same mkoani Kilimanjaro.

Elimu hiyo imetolewa leo katika kikao kilichowakutanisha viongozi wa Serikali ya Kijiji, Mtendaji wa Kijiji pamoja na wananchi, ambapo wamejadili hatua mbalimbali za kuchukua ili kupunguza athari za majanga ya asili katika eneo hilo.

Kikao hicho kimefanyika kufuatia ombi la Mbunge wa Same Mashariki, Anne Kilango Malecela, alilolitoa Septemba 28, 2026, baada ya semina iliyowakutanisha maafisa tarafa, madiwani na watendaji wa kata.

Katika semina hiyo, pamoja na kutembelea baadhi ya maeneo hatarishi yaliyopo upande wa tambarare, mbunge huyo aliwaomba wataalamu kufika maeneo ya milimani kwa ajili ya kutoa elimu na ushauri wa kitaalamu kwa wananchi.

Katika kikao hicho, wananchi wamekubaliana kusitisha mara moja shughuli za kilimo katika eneo lililowahi kuathiriwa na maporomoko ya udongo mwaka 2009.

Badala yake, wamekubaliana kupanda miti katika eneo hilo ili kusaidia kurejesha uimara wa udongo na kupunguza mmomonyoko.

Aidha, wananchi wameiomba Serikali kuchukua hatua za kudhibiti athari za radi katika eneo hilo, ikiwemo kuweka mifumo au vifaa maalumu vya kinga dhidi ya radi, kutokana na eneo hilo kuwa na historia ya kukumbwa na matukio ya radi mara kwa mara.

Wataalamu wa GST wamewasisitiza wananchi kuendelea kufuatilia taarifa na tahadhari zinazotolewa na mamlaka husika kuhusu mabadiliko ya hali ya hewa na majanga ya asili, pamoja na kuchukua hatua mapema wanapoona dalili zinazoweza kuhatarisha usalama wa watu na mali.

GST imeendelea kutoa elimu kwa jamii katika maeneo mbalimbali nchini kuhusu masuala ya jiolojia, majanga ya asili na namna ya kuchukua tahadhari, ikiwa ni sehemu ya juhudi za kuongeza uelewa wa wananchi na kupunguza athari za majanga yanayoweza kujitokeza.










Read more »

at Wednesday, September 30, 2026 0
Benki ya Taifa ya Biashara (NBC) imezindua msimu wa tano wa kampeni yake ya “Wekeza NBC Shambani Ushinde, Tunakuona Mbali Mkulima” katika mikoa ya Mtwara na Lindi pamoja na Wilaya ya Tunduru mkoani Ruvuma, ikiwa na lengo la kuimarisha elimu ya fedha, matumizi ya huduma rasmi za kifedha na kuongeza tija katika kilimo, hususani zao la korosho.

Uzinduzi huo ulifanyika Mtwara ukiongozwa na Mkuu wa Wilaya ya Tandahimba, Kanali Mstaafu Michael Mtenjele, aliyemwakilisha Mkuu wa Mkoa wa Mtwara, Kanali Donald Msengi, na kuhudhuriwa na viongozi wa vyama vya ushirika, wakulima na viongozi waandamizi wa NBC, akiwemo Mkurugenzi wa Wateja Wadogo, Elibariki Masuke, Mkuu wa Masoko, David Raymond, Meneja wa Kanda ya Pwani, Zubeider Haroun, na Mkuu wa Kitengo cha Wakulima, Raymond Urassa.

Akizungumza katika hafla hiyo, Kanali Mstaafu Mtenjele aliipongeza NBC kwa kuwawezesha wakulima kupitia huduma za kifedha na elimu ya fedha, akisema utamaduni wa kuweka akiba ni muhimu kwa maendeleo ya mkulima, familia na uchumi wa taifa.

“Wakulima wanapaswa kuwa na utamaduni wa kuweka akiba. Akiba si kwa manufaa ya mkulima na familia yake pekee, bali pia ina mchango katika ukuaji wa uchumi wa taifa,” alisema Mtenjele.

Alisema huduma kama bima ya afya zina umuhimu mkubwa kwa wakulima kwa kuwa kipato chao kinategemea misimu ya uzalishaji, huku elimu ya fedha ikiwa muhimu katika kuwawezesha kupanga matumizi, kununua pembejeo na kuwekeza katika shughuli zao.

Mkurugenzi wa Wateja Wadogo wa NBC, Elibariki Masuke, alisema kampeni hiyo ni sehemu ya mkakati wa benki kuitikia ajenda ya Serikali ya 10/30, inayolenga kuongeza uzalishaji wa mazao ya kilimo kutoka asilimia 5 hadi asilimia 10 ifikapo mwaka 2030.

“Kilimo ni biashara, na kwa kutambua hilo tunaendelea kubuni bidhaa na huduma zinazokidhi mahitaji ya mkulima ili kumwezesha kuongeza uzalishaji, kusimamia mapato yake na kuwekeza zaidi katika shughuli za kilimo,” alisema Masuke.

Alisema NBC imeendelea kubuni huduma zinazokidhi mahitaji ya wakulima, ikiwemo akaunti za NBC Shambani zisizo na makato ya kila mwezi, bima ya mazao na afya, huduma za uwakala na kidigitali, mikopo ya pembejeo, mikopo ya matrekta na malori kwa AMCOS, ujenzi wa maghala pamoja na malipo ya awali kupitia stakabadhi ghalani.

Masuke alisema kampeni hiyo imeleta mabadiliko katika matumizi ya huduma rasmi za kifedha mkoani Mtwara, akibainisha kuwa wakulima wengi sasa wanaweka fedha zao benki, wanatumia huduma za kidigitali na kujiunga na bima za mazao na afya.

“Tunajivunia kuona fedha za wakulima sasa zikitulia benki, huku wengi wakianza kutumia huduma za kidigitali na kuchukua bima za mazao na afya. Haya ndiyo mabadiliko tuliyokusudia kuyafikia kupitia kampeni hizi,” alisema.

Kivutio kikubwa cha msimu huu ni mfumo wa zawadi unaowahusisha wakulima mmoja mmoja, AMCOS na vyama vikuu vya ushirika (Unions). Wakulima mmoja mmoja watapata nafasi ya kujishindia baiskeli na pikipiki, AMCOS zikiwania mashine za kufungia mifuko, huku vyama vikuu vya ushirika vikishindania magari mawili aina ya double cabin pickup.

Ili kushiriki, wakulima, AMCOS na Vyama Vikuu vya Ushirika wanatakiwa kufungua akaunti ya NBC Shambani na kupitisha fedha zao kupitia akaunti hizo, huku zawadi zikitolewa kila mwezi.

Meneja Mkuu wa Chama Kikuu cha Ushirika cha Masasi-Mtwara (MAMCU), Biadia Matipa, aliipongeza NBC kwa kurejesha thamani kwa wakulima kupitia kampeni hiyo, akisema MAMCU imejipanga kushiriki kikamilifu na kuwania zawadi kuu ya gari la double cabin.

“Tumejipanga kuhakikisha tunanufaika na zawadi hizi, na nina uhakika zawadi hii kuu ya gari la double cabin itakuja MAMCU,” alisema Matipa.

Naye Mwenyekiti wa RUNALI na KCJE Ltd, Odas Mpunga, alisema kampeni hiyo imeongeza uelewa wa wakulima kuhusu huduma za kifedha kupitia mawakala wanaowafikia moja kwa moja vijijini.

“Bima ya afya ni muhimu kwa mkulima kwa sababu afya ndiyo inayomwezesha kufanya kazi kwa ufanisi. Pia mashine za kushonea mifuko zitatusaidia sana AMCOS katika shughuli za kuhifadhi korosho,” alisema Mpunga.

Kwa upande wake, Mkuu wa Kitengo cha Wakulima wa NBC, Raymond Urassa, alisema kampeni hiyo inalenga kuongeza uelewa kuhusu bima, mikopo, huduma za mawakala na huduma za kidigitali, akiwataka wakulima kutumia huduma hizo badala ya kusafiri umbali mrefu kufuata huduma katika matawi ya benki.

“Tunataka mkulima aweze kupata huduma za benki akiwa karibu na shughuli zake za uzalishaji. Matumizi ya mawakala na huduma za kidigitali yanamsaidia kuokoa muda na gharama za kusafiri kwenda kwenye matawi,” alisema Urassa.

Kaimu Mrajisi Msaidizi wa Vyama vya Ushirika Mkoa wa Mtwara, Robert Nsunza, alisema kampeni hiyo itasaidia kuongeza ushiriki wa wakulima katika mfumo rasmi wa kifedha na kuimarisha ushirika.

“Kampeni hii ni fursa nzuri ya kuwashawishi wakulima zaidi kuingia kwenye huduma rasmi za kibenki na kuimarisha ushiriki wao katika vyama vya ushirika,” alisema Nsunza.


Mkuu wa Wilaya ya Tandahimba, Kanali Mstaafu Michael Mtenjele (katikati), akikata utepe kuashiria uzinduzi rasmi wa msimu wa tano wa kampeni ya “Wekeza NBC Shambani Ushinde, Tunakuona Mbali Mkulima” katika mikoa ya Mtwara na Lindi pamoja na Wilaya ya Tunduru mkoani Ruvuma. Kampeni hiyo inalenga kuimarisha elimu ya fedha, matumizi ya huduma rasmi za kifedha na kuongeza tija katika kilimo, hususan zao la korosho, huku ikiwapa wakulima fursa ya kushinda zawadi mbalimbali, zikiwemo magari mawili aina ya double cabin pickup kwa vyama vikuu vya ushirika katika mikoa hiyo. Uzinduzi huo ulifanyika Mtwara jana na kuhudhuriwa na viongozi wa vyama vya ushirika, wakulima na viongozi waandamizi wa NBC. Wengine ni viongozi wa vyama vya ushirika, wakulima na viongozi waandamizi wa NBC.


Mkuu wa Wilaya ya Tandahimba, Kanali Mstaafu Michael Mtenjele (katikati), akimpongeza Mkurugenzi wa Wateja Wadogo wa NBC, Elibariki Masuke (kulia), wakati wa hafla ya uzinduzi wa msimu wa tano wa kampeni ya “Wekeza NBC Shambani Ushinde, Tunakuona Mbali Mkulima” katika mikoa ya Mtwara na Lindi pamoja na Wilaya ya Tunduru mkoani Ruvuma. Kampeni hiyo inalenga kuimarisha elimu ya fedha, matumizi ya huduma rasmi za kifedha na kuongeza tija katika kilimo, hususan zao la korosho, huku ikiwapa wakulima fursa ya kushinda zawadi mbalimbali, zikiwemo magari mawili aina ya double cabin pickup kwa vyama vikuu vya ushirika katika mikoa hiyo. Uzinduzi huo ulifanyika Mtwara jana na kuhudhuriwa na viongozi wa vyama vya ushirika, wakulima na viongozi waandamizi wa NBC. Kushoto ni Kaimu Mrajisi Msaidizi wa Vyama vya Ushirika Mkoa wa Mtwara, Robert Nsunza.


Mkuu wa Wilaya ya Tandahimba, Kanali Mstaafu Michael Mtenjele (ndani ya gari), akipima ubora wa gari aina ya double cabin pickup itakayotolewa na benki ya Taifa ya biashara (NBC) kama zawadi kwa washindi wa kampeni yake ya “Wekeza NBC Shambani Ushinde, Tunakuona Mbali Mkulima” katika mikoa ya Mtwara na Lindi pamoja na Wilaya ya Tunduru mkoani Ruvuma. Kampeni hiyo inalenga kuimarisha elimu ya fedha, matumizi ya huduma rasmi za kifedha na kuongeza tija katika kilimo, hususan zao la korosho. Uzinduzi wa kampeni hiyo ulifanyika Mtwara jana na kuhudhuriwa na viongozi wa vyama vya ushirika, wakulima na viongozi waandamizi wa NBC. Wanaoshuhudia ni Kaimu Mrajisi Msaidizi wa Vyama vya Ushirika Mkoa wa Mtwara, Robert Nsunza (katikati) na Mkuu wa Kitengo cha Wakulima wa NBC, Raymond Urassa (kushoto)


Kwa upande wake, Mkuu wa Kitengo cha Wakulima wa NBC, Raymond Urassa (pichani) alisema kampeni hiyo inalenga kuongeza uelewa kuhusu bima, mikopo, huduma za mawakala na huduma za kidigitali, akiwataka wakulima kutumia huduma hizo badala ya kusafiri umbali mrefu kufuata huduma katika matawi ya benki.


Katika hafla hiyo maofisa wa benki ya NBC walipata wasaa wa kuwajengea uelewa zaidi wakulima wa korosho kuhusu elimu ya fedha na huduma mbalimbali za benki hiyo ikiwemo huduma ya bima za afya na bima za kilimo.




Wakulima walishiriki kikamlifu hafla hiyo.



Kivutio kikubwa cha msimu huu ni mfumo wa zawadi unaowahusisha wakulima mmoja mmoja, AMCOS na vyama vikuu vya ushirika (Unions). Wakulima mmoja mmoja watapata nafasi ya kujishindia baiskeli na pikipiki, AMCOS zikiwania mashine za kufungia mifuko, huku vyama vikuu vya ushirika vikishindania magari mawili aina ya double cabin pickup.


Read more »

at Wednesday, September 30, 2026 0
BALOZI wa Jamhuri ya Muungano wa Tanzania katika Jamhuri ya Kidemokrasia ya Watu wa Algeria, Mhe. Mobhare Matinyi, amesema katika kipindi cha miezi michache iliyopita nchi hizi mbili zimepiga hatua katika sekta muhimu tano na kuweka matumaini ya ushirikiano zaidi katika sekta zingine.

Akizungumza leo asubuhi na waandishi wa habari wa vyombo mbalimbali vya Algeria kwenye ofisi za Ubalozi wa Tanzania jijini Algiers, Balozi Matinyi alizitaja sekta hizo ambazo Ubalozi umefanikisha zipige hatua kuwa ni za viwanda vya dawa za tiba, nishati, elimu ya juu, biashara ya mazao ya kilimo na ufugaji wa nyuki.

Balozi Matinyi alisema juhudi za sasa za serikali za nchi hizi mbili zinafuatia maelekezo ya marais wa nchi hizi kwamba baada ya kuainisha maeneo ya ushirikiano baina ya Tanzania na Algeria sasa ni wakati wa kuyaweka katika vitendo kwa maendeleo ya wananchi wake.

“Nilipowasilisha hati zangu za utambulisho mnamo tarehe 10 Juni, 2026, Rais Abdelmadgid Tebboune alisisitiza kwamba sasa umefika wakati wa kuuweka ushirikiano wetu katika vitendo na wakati nikija Algeria Rais Dkt. Samia Suluhu Hassan aliagiza kwamba kutokana na ushirikiano wetu wa kimkakati sasa ni wakati wa kupata manufaa kwa ajili ya wananchi wetu” alisema Balozi Matinyi.

Akielezea mafanikio hayo, Balozi Matinyi alisema katika sekta ya viwanda vya dawa za tiba Mamlaka ya Taifa ya Bidhaa za Dawa ya Algeria (ANPP) na kiwanda cha dawa cha Serikali ya Algeria cha Saidal Group, zitafanya ziara nchini mwezi Oktoba kwa mwaliko wa Mamlaka ya Dawa na Vifaa Tiba ya Tanzania (TMDA) ili kujadili namna ya kushirikiana kitaalamu.

Balozi Matinyi alisema kwa kuzingatia kuwa katika ukaguzi wa dawa Tanzania ilikuwa nchi ya kwanza barani Afrika kufikia kiwango cha juu (ML3) mwaka 2018 kwa mujibu wa tathmini ya kimataifa (GBT) ya Shirika la Afya la Dunia (WHO) huku Algeria ikiwa na theluthi moja ya viwanda 690 vya dawa Afrika, nchi hizi mbili zinaweza kufikia mafanikio makubwa.

“Kampuni ya dawa ya Hikma nayo ipo katika hatua za mwisho za kukamilisha makubaliano ya ushirikiano katika biashara na uwekezaji na kampuni tanzu ya Bohari Kuu la Dawa (MSD) ya Medipharm ili kuhudumia nchi za ukanda wa mashariki, kati na kusini mwa Afrika,” alisema Balozi Matinyi na kuongeza: “Kampuni nyingine binafsi ya Frater Razes inakuja nchini mwezi Oktoba pia kujadiliana na Serikali namna ya kuanza ushirikiano katika biashara na uwekezaji,” alisema Balozi Matinyi.

Katika sekta ya nishati Balozi Matinyi alisema Kampuni ya Usafirishaji na Usambazaji Umeme (ETDCO) ambayo ni kampuni tanzu ya Shirika la Ugavi wa Umeme Tanzania (TANESCO), ilifanya ziara nchini Algeria mwezi Julai kujadiliana namna ya kushirikiana kiufundi na kutembelea maeneo ya kiufundi ya Shirika la Umeme na Gesi la Algeria (SONELGAZ) na kiwanda cha vifaa vya umeme cha GISB Electric.

Katika ushirikiano kwenye sekta ya elimu Balozi Matinyi alisema: “Algeria ilitoa nafasi 176 za masomo ya juu kwa wanafunzi wa Tanzania ambapo Serikali imeamua kuchagua wanafunzi wenye ufaulu wa juu 150 chini ya mpango wa Samia Scholarship Extended na wanakuja kwa ajili ya masomo ya sayansi, teknolojia, uhandisi na tiba.”

Akizungumzia ushirikiano kwenye biashara ya mazao ya kilimo, Balozi Matinyi aliitaja kampuni ya Sarl Anacard’Or ya Algeria kwamba imenunua ghala la kuhifadhia korosho mkoani Mtwara kwa ajili ya kuzileta Algeria. Kampuni hiyo pia inakamilisha mipango ya kuanza ubanguaji korosho nchini Tanzania.

Aidha, Balozi Matinyi alisema kampuni nyingine ya Algeria ya kutengeneza mashine za kusindika mazao ya kilimo na dawa pamoja na kufungasha ya CAM Sarl imekubali kutoa ushirikiano kwa Tanzania wa kupata mashine hizo ili kuongezea thamani mazao ya kilimo kabla ya kuuzwa kwenye soko la dunia.

Balozi Matinyi alitaarifu zaidi kuwa Tanzania na Algeria zinatarajia kuanza ushirikiano katika sekta ya ufugaji wa nyuki na mazao yake kufuatia ziara ya maafisa na wataalamu wa Wizara ya Maliasili na Utalii na Mamlaka ya Huduma za Misitu Tanzania (TFS) pamoja na wadau wa sekta binafsi mwezi Septemba 2026 ambapo walikubaliana na wenzao wa Algeria kuanza ushirikiano.

Balozi Matinyi alimaliza taarifa yake kwa waandishi wa Algeria kwa kuwakaribisha wananchi wa Algeria kuja nchini kujionea fahari ya hifadhi za bonde la Ngorongoro na Serengeti, mlima Kilimanjaro na vilevile kuja kufurahia fukwe maridhawa za Zanzibar.

Algiers, Septemba 30, 2026.
Read more »

at Wednesday, September 30, 2026 0
Na Mwandishi Wetu

WAZIRI wa Afya, Mohamed Mchengerwa, ameiagiza Bodi mpya ya Wadhamini ya Hospitali ya Taifa Muhimbili (MNH) kusimamia kwa karibu ubora wa huduma, uwajibikaji, matengenezo ya miundombinu na utekelezaji wa mradi wa ujenzi wa Muhimbili Mpya.

Mchengerwa ametoa maagizo hayo leo jijini Dar es Salaam wakati wa uzinduzi wa Bodi ya Wadhamini ya Hospitali ya Taifa Muhimbili pamoja na miradi minne ya kimkakati iliyotekelezwa na hospitali hiyo.

Miradi hiyo ni Kitengo cha Afya ya Mama na Mtoto Tumboni (Maternal-Fetal Unit), Chumba cha Kisasa cha Upasuaji wa Uzazi (Modular Theatre), Mtambo wa Kuzalisha na Kusambaza Hewa Tiba pamoja na Kliniki ya Huduma za Haraka (Fast Track/VIP).

Amesema bodi hiyo imepewa dhamana kubwa ya kusimamia taasisi ambayo ni kituo cha mwisho cha rufaa nchini na yenye jukumu la kutoa huduma za kibobezi kwa wagonjwa kutoka maeneo mbalimbali.

“Bodi haiteuliwi ili ikae; inateuliwa ili isimame kwa ajili ya mgonjwa, isimame kwa ajili ya ukweli na isimame hata pale ambapo kusimama kunagharimu,” amesema.

Mchengerwa amempongeza Profesa Muhammad Bakari Kambi kwa kuteuliwa kuwa Mwenyekiti wa Bodi hiyo kwa kipindi cha miaka mitatu, akisema uteuzi huo unatokana na uzoefu na uwezo wake katika kusimamia taasisi kubwa.

Amesisitiza kuwa bodi inapaswa kuhakikisha Muhimbili inaendeshwa kwa misingi ya utawala bora, uwazi, uwajibikaji na nidhamu, huku ikishirikiana kwa karibu na menejimenti ya hospitali.

Aidha, ameelekeza bodi kuhakikisha vifaa tiba, mitambo na miundombinu vinapatiwa matengenezo kwa wakati ili kuepusha kusimama kwa huduma.

Akizungumzia mtambo mpya wa hewa tiba, amesema umegharimu takribani Sh1.63 bilioni na unatarajiwa kuondoa changamoto ya upatikanaji wa hewa tiba ambayo imekuwa ikilalamikiwa katika hospitali hiyo.

“Naelekeza usimamizi wa mtambo huu ufanyike ipasavyo, kwa matengenezo kinga kwa wakati, ili huduma iwe endelevu. Hewa tiba ni dawa na dawa isiyopatikana kwa wakati si dawa tena,” amesema.

Katika hatua nyingine, Mchengerwa amesema Kitengo cha Afya ya Mama na Mtoto Tumboni kitasaidia kubaini mapema changamoto na hatari zinazoweza kujitokeza kwa mama mjamzito na mtoto akiwa bado tumboni.

Amesema huduma hiyo ni sehemu ya juhudi za Serikali katika kutekeleza mkakati wa kupunguza vifo vya mama na watoto wachanga, kwa kuhamisha mfumo wa huduma kutoka kusubiri dharura hadi kuzuia na kutambua hatari mapema.

Kuhusu Chumba cha Kisasa cha Upasuaji wa Uzazi, amesema kituo hicho kinapaswa kutumika kupunguza muda wa kusubiri huduma za upasuaji, maambukizi na vifo vya akina mama na watoto.

Mchengerwa pia ameagiza hospitali nyingine kubwa nchini kujifunza kutoka mradi huo na kuweka mipango ya kuboresha mazingira ya vyumba vya upasuaji.

Akizungumzia Kliniki ya Huduma za Haraka (VIP), amesema huduma hiyo inalenga kuwapa Watanzania wenye uwezo wa kiuchumi huduma za hadhi ya juu nchini na hivyo kupunguza ulazima wa baadhi yao kusafiri nje ya nchi kutafuta huduma.

Amesema mapato yatakayopatikana kupitia kliniki hiyo yanapaswa kutumika pia kuboresha huduma kwa wagonjwa wasio na uwezo, kupitia mfumo wa ruzuku mtambuka.

“Ubunifu wa mapato usiwe kamwe sababu ya kusahau kwa nini tunakusanya mapato,” alisema.

Mchengerwa ametaka kliniki hiyo ijengewe chapa na kutangazwa ili kuwavutia wateja wa ndani na nje ya nchi wanaohitaji huduma za kibobezi.

Katika eneo la uwajibikaji, Waziri huyo ameiagiza bodi kuwasilisha ripoti za mara kwa mara zinazoonyesha matokeo ya miradi hiyo, ikiwemo idadi ya akina mama waliohudumiwa, kiwango cha kupungua kwa maambukizi, uzalishaji wa hewa tiba na mapato yanayotokana na Kliniki ya Huduma za Haraka.

Amesema takwimu hizo zitasaidia Serikali kupima matokeo ya uwekezaji uliofanyika na kupanga hatua nyingine za kuboresha huduma.

Mchengerwa pia ameipa Bodi ya Wadhamini jukumu la kusimamia utekelezaji wa mradi wa ujenzi wa Muhimbili Mpya, akisema ni mradi mkubwa wa kimkakati unaolenga kuipa hospitali hiyo sura mpya inayokwenda sambamba na mahitaji ya Karne ya 21 na Dira ya Maendeleo ya Taifa 2050.

“Katika majukumu ya mara kwa mara ya bodi, mradi huu upewe kipaumbele ili utekelezaji wake uende sambamba na mpango kazi uliowekwa,” amesema.

Amesema Serikali inalenga kuifanya Muhimbili kuwa kituo chenye huduma za kibobezi za hadhi ya kimataifa zitakazowafanya Watanzania kupata huduma hizo nchini badala ya kusafiri nje ya nchi.

Amewataka wajumbe wa bodi hiyo kutumia uzoefu wao katika tiba, uongozi, fedha, sheria na uhandisi kuhakikisha hospitali inaendelea kuboresha huduma na kutekeleza malengo yaliyowekwa na Serikali.

Kwa upande mwingine, ameipongeza Menejimenti ya Hospitali ya Taifa Muhimbili chini ya Mkurugenzi Mtendaji, Dkt. Delilah Kimambo, kwa kusimamia utekelezaji wa miradi hiyo na kuwataka kuendelea kushirikiana na bodi mpya.

Amesema uwekezaji katika miundombinu ya afya unapaswa kwenda sambamba na usimamizi madhubuti, ili wananchi wanufaike na huduma bora na endelevu.

Kwa upande wake Mkurugenzi Mtendaji wa MNH, Dkt. Delilah Charles Kimambo, amesema hospitali hiyo imenufaika na uwekezaji mkubwa katika kipindi cha uongozi wa Rais Dkt. Samia Suluhu Hassan.

Amesema miongoni mwa miradi mikubwa ni ujenzi wa Muhimbili Mpya unaogharimu Sh1.2 trilioni, ambao kwa sasa umefikia hatua ya kumpata mshauri elekezi kwa ajili ya utekelezaji.

Dkt. Kimambo amesema hospitali hiyo pia imepokea vifaa tiba vya kisasa ikiwemo Mammography, Angio Suite, MRI, CT Scan za kisasa na Hyperbaric Chamber, ambavyo vimeongeza uwezo wa kutoa huduma za vipimo na matibabu ya kibingwa na kibingwa bobezi.

Amesema uwekezaji huo umesaidia pia kupunguza rufaa za wagonjwa kwenda nje ya nchi kwa ajili ya kupata huduma za matibabu.

Katika hatua nyingine, Muhimbili imezindua chumba cha upasuaji cha kisasa chenye thamani ya Sh1.8 bilioni, kikilenga kuimarisha huduma za afya ya mama na mtoto.




















Read more »

at Wednesday, September 30, 2026 0
Bodi ya Utalii Tanzania (TTB), kwa kushirikiana na Ubalozi wa Tanzania nchini India, imewapokea jumla ya mawakala wa utalii 13 kutoka India kwa ajili ya ziara maalum ya utangazaji utalii (Familiarization Trip) itakayofanyika nchini kuanzia tarehe 28 Septemba 2026 hadi 04 Oktoba, 2026.

Lengo kuu la ziara hii ni kuwapa fursa mawakala hao kujionea vivutio vya utalii vilivyopo nchini, pamoja na kuimarisha ushirikiano wa kibiashara kati yao na wadau wa utalii wa Tanzania.

Akizungumza kuwakaribisha nchini Mawakala hao, Balozi wa Tanzania nchini India, Mhe. Anisa Mbega ambaye ameongozana na ujumbe huo, amesema Ubalozi utaendelea kushirikiana na wadau mbalimbali wa utalii kutoka India katika kutangaza vivutio vya utalii vilivyopo nchini ili kukuza sekta hiyo na kuchangia Uchumi wa nchi na kwamba ziara ya mawakala hao ni moja ya jitihada za Ubalozi huo katika kuhakikisha vivutio vya utalii vinatangazwa nchini India kupitia mawakala hao.

Kwa upande wake, kiongozi wa ujumbe wa Mawakala hao ambaye pia ni Rais na Mwenyekiti wa Chama cha Waendesha shughuli za Utalii cha India, Bw. Himanshu Patil amesema kuwa lengo la ziara yao hapa nchini ni kujionea vivutio vya utalii na kuzungumza na wadau muhimu katika sekta hiyo ili hatimaye kuwawezesha kushirikiana na Tanzania katika kuwafikia watalii kutoka India kuja nchini.

Kabla ya kuanza kwa ziara hiyo, mawakala hao walipata fursa ya kukutana na kufanya mazungumzo ya kibiashara (B2B) na kundi la waendesha shughuli za utalii (Tour Operators) kutoka Tanzania. Mkutano huo ulilenga kujenga mahusiano ya kibiashara ya moja kwa moja na kufungua fursa mpya za kukuza idadi ya watalii kutoka soko la India.

Ziara hii ni sehemu ya mkakati endelevu wa Bodi ya Utalii Tanzania wa kukuza soko la India ambalo kwa sasa ni miongoni mwa masoko sita yanayoongoza kwa kuleta watalii nchini.

Wakiwa nchini Mawakala hao watatembelea maeneo mbalimbali ya utalii yakiwemo Eneo la Hifadhi ya Ngorongoro, Hifadhi ya Taifa ya Serengeti na Zanzibar.
















Read more »
Newer Posts
Older Posts
Subscribe to: Posts (Atom)