MICHUZI BLOG

VODACOM YAKABIDHI KOMPYUTA 30, MADAWATI 90 NA VIFAA VINGINE SHULE YA MSINGI NA UFUNDI MBEZI

MICHUZI BLOG at Thursday, November 12, 2026 0

Kampuni ya mawasiliano ya Vodacom Tanzania kupitia taasisi yake ya Vodacom Tanzania Foundation imetoa msaada wa vifaa vya elimu kwa Shule ya Msingi na Ufundi Mbezi, iliyopo Wilaya ya Ubungo, ikiwa ni sehemu ya juhudi za kuboresha mazingira ya kujifunzia na kufundishia pamoja na kuimarisha matumizi ya teknolojia katika sekta ya elimu.

Msaada huo unajumuisha kompyuta 30, vifaa vya UPS 30, televisheni moja yenye ukubwa wa inchi 75 pamoja na madawati 90, ambavyo vinatarajiwa kuongeza ufanisi wa ufundishaji na ujifunzaji shuleni hapo.

Akizungumza katika hafla hiyo, Mkuu wa Idara ya Vodacom Tanzania Foundation, Uendelevu na Ubia, Pauline Alexander Koola, amesema Vodacom inaendelea kutekeleza wajibu wake wa kijamii kwa kushirikiana na wadau mbalimbali katika kuchangia maendeleo ya jamii, hususan katika sekta ya elimu.

Kwa upande wake, Mkuu wa Wilaya ya Ubungo, Albert Msando, ameeleza umuhimu wa ushirikiano kati ya Serikali na sekta binafsi katika kuboresha huduma za kijamii, akitambua mchango wa Vodacom katika kuimarisha mazingira ya elimu.

Msaada huo unatarajiwa kuwanufaisha wanafunzi na walimu wa Shule ya Msingi na Ufundi Mbezi kwa kuboresha upatikanaji wa vifaa vya kujifunzia na kufundishia, pamoja na kuongeza fursa za wanafunzi kujifunza kupitia teknolojia.

HABARI

MAKAMU WA RAIS AWEKA JIWE LA MSINGI MRADI WA MAJI WA BILIONI 38.4 NANYUMBU

MICHUZI BLOG at Thursday, November 12, 2026 0

Nanyumbu, Mtwara

MAKAMU wa Rais ameweka jiwe la msingi la mradi wa maji wa Nanyumbu wenye thamani ya Shilingi bilioni 38.4, unaotarajiwa kunufaisha zaidi ya wananchi 81,000 na kupunguza adha ya kutafuta maji, ikiwemo hatari ya kushambuliwa na mamba katika Mto Ruvuma.

Akizungumza katika hafla hiyo, akiwa katika Kijiji cha Masuguru Wilaya ya Nanyumbu wakati wa ziara yake mkoani Mtwara, Makamu wa Rais amesema mradi huo ni sehemu ya juhudi za Serikali inayoongozwa na Rais Dkt. Samia Suluhu Hassan za kuwafikishia wananchi maji safi na salama karibu na makazi yao.

Amesema wananchi wa Masuguru na maeneo ya jirani wamekuwa wakitegemea maji ya mtoni, hali iliyosababisha baadhi yao kupoteza maisha kwa kushambuliwa na mamba, huku wanawake na wasichana wakikabiliwa na hatari ya ukatili wa kijinsia wakati wa kutafuta maji.

Ameeleza kuwa Serikali ilichukua hatua baada ya Mwakilishi wa Jimbo hilo, , Yahya Mhata kuwasilisha changamoto hizo kwa Rais Samia.

“Kazi ya Serikali ni kusikia kilio cha wananchi na kutafuta majawabu ambayo yanaleta mabadiliko katika maisha yao,” amesema.

Makamu wa Rais amesema utekelezaji wa mradi huo unaonesha dhamira ya Serikali ya kufikisha uwekezaji mkubwa wa huduma za msingi vijijini. Amesema wananchi waliokuwa wakitarajia kuchimbiwa visima sasa wamepata miundombinu ya kuwafikishia maji karibu na makazi yao.

“Leo hii mradi ule uko hapa kijijini kwenu, mnauona kwa macho, siyo kwa kuhadithiwa,” amesema na kuahidi kumfikishia Rais Samia taarifa ya mafanikio ya mradi huo pamoja na furaha ya wananchi wanaonufaika na huduma hiyo. Makamu wa Rais ameipongeza Wizara ya Maji kwa ufanisi na ubora katika utekelezaji wa mradi huo.

Aidha, amewataka wananchi kuutunza mradi na kuhifadhi mazingira ya Mto Ruvuma, akisema umebuniwa kukidhi mahitaji ya maji kwa miaka 40 na uendelevu wake unategemea pia ulinzi wa chanzo hicho.

Kwa upande wake, Waziri wa Maji Mhe. Jumaa Aweso amesema mradi huo ni kielelezo cha dhamira ya Serikali ya kuhakikisha huduma za msingi zinawafikia wananchi wote bila kujali maeneo wanayoishi.

Amepongeza ushirikiano wa watendaji wa Wizara ya Maji, RUWASA, wataalamu, viongozi wa Serikali za mitaa na wananchi katika kufanikisha mradi huo. Pia amelishukuru Shirika la Umeme nchini (TANESCO) kwa kuwezesha upatikanaji wa umeme wa kuendesha miundombinu ya mradi huo.

Akiwasilisha taarifa ya mradi, Katibu Mkuu wa Wizara ya Maji, Mhandisi Mwajuma Waziri, amesema utekelezaji umefikia asilimia 98.45 na huduma imeanza kutolewa kupitia vioski na miunganisho ya majumbani.

Amesema mradi huo ni sehemu ya mpango wa maji wa miji 28 nchini. Mkataba wake wa ujenzi ulisainiwa Juni 6, 2022, na utekelezaji kuanza Aprili 23, 2023.

Mradi unahusisha uchukuaji wa maji kutoka Mto Ruvuma katika kijiji cha Masuguru, mtambo wa kutibu maji wenye uwezo wa lita milioni tano, matanki mawili yenye jumla ya ujazo wa lita milioni 1.1, bomba kuu la kilomita 65.3, mtandao wa usambazaji wa kilomita 35 na vituo 20 vya kuchotea maji.

Mhandisi Mwajuma amesema mradi ulikabidhiwa kwa mwendeshaji Oktoba 23, 2026, na tayari unahudumia maeneo ya Masuguru, Nachura, Lidede, Mwambani, Sengenya, Mangaka, Kilimanihewa, Mkwajuni na Ngalinje, huku kazi za umaliziaji zikiendelea. Mradi huo unatekelezwa kwa ushirikiano kati ya Serikali ya Tanzania na India.

HABARI

SERIKALI YAIMARISHA UMEME MTWARA, ETDCO KUTEKELEZA MRADI WA KM 92.3

MICHUZI BLOG at Thursday, November 12, 2026 0

Kampuni ya Ujenzi na Ukarabati wa Miundombinu ya Usafirishaji na Usambazaji wa Umeme (ETDCO) imekabidhiwa utekelezaji wa mradi wa ujenzi wa njia ya kusafirisha umeme wa msongo wa kilovoti 33 kutoka Mtwara mjini hadi Tandahimba, mkoani Mtwara, wenye urefu wa kilomita 92.3.

Meneja wa Shirika la Umeme Tanzania (TANESCO) Mkoa wa Mtwara, Mhandisi Abdul Mihambo, amesema mradi huo unalenga kuimarisha upatikanaji wa huduma ya umeme katika Wilaya za Tandahimba na Nanyamba.

Amesema utekelezaji wa mradi huo ni sehemu ya juhudi za Serikali za kuimarisha miundombinu ya umeme na kuboresha huduma kwa wananchi, huku TANESCO ikishirikiana na ETDCO kuhakikisha kazi inakamilika kwa wakati na kwa kuzingatia viwango vinavyotakiwa.

Mihambo ameyasema hayo wakati wa ziara ya kuitambulisha ETDCO kwa viongozi wa Wilaya za Tandahimba na Nanyamba kwa ajili ya utekelezaji wa mradi huo.

Kwa upande wake, Meneja Mkuu wa ETDCO, Mhandisi Richard Mwanja, amesema mradi huo unatarajiwa kukamilika ndani ya mwaka mmoja, huku kazi za awali zikianza kwa kusimika nguzo za umeme. Ameeleza kuwa kutokana na kasi ya utekelezaji, kampuni hiyo inalenga kukamilisha mradi kabla ya muda uliopangwa na kuomba ushirikiano wa Ofisi ya Mkuu wa Mkoa ili kufanikisha kazi hiyo.

Naye Mkuu wa Wilaya ya Tandahimba, Kanali Michael Mtinjele, ameishukuru Serikali kwa kuanza utekelezaji wa mradi huo, akisema utasaidia kuimarisha huduma ya umeme wilayani humo.

Wabunge wa Majimbo ya Nanyamba, Abdallah Chikota, na Tandahimba wameahidi kushirikiana na ETDCO kuhakikisha changamoto zinazoweza kukwamisha utekelezaji wa mradi huo zinapatiwa ufumbuzi.

HABARI

MKUYU AFRICA, DAMAC ZAUNGANA KUSAIDIA WATANZANIA KUMILIKI MAKAZI DUBAI

MICHUZI BLOG at Thursday, November 12, 2026 0

Kampuni ya Mkuyu Africa ya Tanzania imeingia katika ushirikiano wa kibiashara na kampuni ya kimataifa ya uendelezaji wa majengo ya DAMAC Properties ya Dubai, kwa lengo la kuwawezesha Watanzania kupata fursa za kumiliki nyumba na apartments za kisasa jijini Dubai, Falme za Kiarabu (UAE).

Ushirikiano huo unalenga kufungua milango ya uwekezaji wa kimataifa kwa wafanyabiashara, wafanyakazi na Watanzania wengine wenye nia ya kuwekeza katika sekta ya nyumba na majengo nje ya nchi.

Akizungumza mara baada ya kusainiwa kwa makubaliano hayo, Mkurugenzi Mtendaji wa Mkuyu Africa, Juneid Othman, alisema mpango huo utarahisisha upatikanaji wa nyumba Dubai kwa Watanzania bila kulazimika kusafiri kwenda nchini humo katika hatua za awali za ununuzi.

Alisema kupitia ushirikiano huo, Mkuyu Africa itakuwa kiungo kati ya wanunuzi wa Tanzania na DAMAC Properties kwa kuwaonyesha miradi na nyumba zilizopo sokoni, kuwaelekeza katika taratibu za ununuzi na kuwawezesha kukamilisha malipo.

“Tumekuwa tukishuhudia wawekezaji kutoka nchi za nje wakija kuwekeza Tanzania. Sasa kupitia ushirikiano huu kati ya Mkuyu Africa na DAMAC, Watanzania nao wanapata fursa ya kumiliki nyumba na apartments Dubai wakiwa hapa nchini,” alisema Juneid.

Alifafanua kuwa mnunuzi anaweza kuanza mchakato wa kumiliki nyumba kwa kulipa asilimia tano ya thamani ya nyumba husika, huku malipo yaliyobaki yakikamilishwa kwa mujibu wa masharti na ratiba ya malipo iliyokubaliwa, hadi hatua ya kukabidhiwa nyumba pamoja na nyaraka za umiliki zinazotakiwa kisheria nchini Dubai.

Juneid alisema lengo la mpango huo ni kupanua wigo wa Watanzania kushiriki katika uwekezaji wa kimataifa, hususan katika sekta ya nyumba na majengo, ambayo ni miongoni mwa maeneo yenye fursa za kukuza thamani ya mali na kupata mapato ya ziada.

Aliongeza kuwa katika kuwarahisishia wanunuzi kupata uzoefu wa moja kwa moja, Mkuyu Africa kwa kushirikiana na DAMAC imeweka utaratibu wa kugharamia safari za wanunuzi kwenda Dubai ili kutembelea miradi, kuona nyumba wanazokusudia kununua na kushiriki katika hatua za makabidhiano kwa mujibu wa makubaliano ya ununuzi.

Kwa upande wake, Meneja Mauzo na Mshauri wa Uwekezaji wa DAMAC Properties, Farah Al Hashimy, alisema kampuni hiyo ni miongoni mwa kampuni kubwa za uendelezaji wa majengo nchini Dubai, ikiwa na miradi mbalimbali ya makazi ya kisasa na ya kifahari, ikiwamo Chelsea Residences.

Alisema ushirikiano huo utaongeza fursa kwa Watanzania kupata huduma na taarifa kuhusu miradi ya DAMAC, huku ukiimarisha mahusiano ya kibiashara kati ya kampuni hizo mbili.

Aidha, ushirikiano huo unatarajiwa kuwa na manufaa ya pande mbili, kwa kuwa utarahisisha wawekezaji kutoka Dubai kuja kutafuta fursa za uwekezaji nchini Tanzania kupitia Mkuyu Africa, wakati Watanzania watapata fursa ya kuwekeza Dubai kupitia DAMAC Properties.

Hatua hiyo inaonekana kuwa sehemu ya juhudi za kuimarisha uhusiano wa kiuchumi na kibiashara kati ya Tanzania na mataifa ya nje, sambamba na fursa zinazotokana na sera za Serikali za kufungua nchi na kuvutia mitaji pamoja na uwekezaji wa kimataifa.

Meneja Mauzo na Mshauri wa Uwekezaji wa DAMAC Properties, Farah Al Hashimy, akizungumza wakati akiwaonyesha wandishi wa habari moja ya miradi ya kampuni hiyo nchini Dubai mara baada ya kusaini makubaliano ya kibiashara na mkurugenzi wa MKUYU Africa Juneid Othumani(kushoto) nchini Dubai hivi karibuni.

HABARI

MNUNA ATAKA UDHIBITI WA EWURA ULETE MATOKEO CHANYA

MICHUZI BLOG at Thursday, November 12, 2026 0

Mkurugenzi Mkuu wa Mamlaka ya Udhibiti wa Huduma za Nishati na Maji (EWURA), Bw. Salum Mnuna,akizungumza wakati akifungua kikao cha kwanza cha Baraza la Tatu la Wafanyakazi wa Mamlaka hiyo, mjini Singida.

*Na Mwandishi Wetu-*Singida

Mkurugenzi Mkuu wa Mamlaka ya Udhibiti wa Huduma za Nishati na Maji (EWURA), Bw. Salum Mnuna, amewataka watumishi wa Mamlaka hiyo kuhakikisha wanaendelea kuwa chachu ya matokeo chanya katika utendaji na utoaji za kiudhibiti.

Mnuna ametoa maelekezo hayo wakati akifungua kikao cha kwanza cha Baraza la Tatu la Wafanyakazi wa Mamlaka hiyo, mjini Singida, leo 11 Novemba 2026.

Amesisitiza kuwa, ili kufanikisha dhima hiyo, EWURA imeweka mazingira wezeshi yanayovutia sekta binafsi kushiriki kutoa huduma zinazodhibitiwa, imeongeza hamasa ya matumizi ya nishati safi ya kupikia, kuimarisha utendaji wa mamlaka za maji nchinj sanjari na utekelezaji wa mpango kabambe wa kitaifa wa nishati.

Aidha, ameeleza kuwa, EWURA tayari inatumia mbinu thabiti na zenye ufanisi zinazochagiza matumizi ya teknolojia katika utoaji huduma za kiudhibiti, uimarishaji wa mifumo ya kidijiti na kuendelea kulinda maslahi ya wawekezaji, watoa huduma, watumiaji.

AFYA

RAIS SAMIA KUHAMASISHA NA KUJENGA WODI ZA WATOTO NJITI BARANI AFRIKA.

MICHUZI BLOG at Thursday, November 12, 2026 0

Rais wa Jamhuri ya Muungano wa Tanzania, Dkt. Samia Suluhu Hassan, amepanga kutumia uzoefu wa Tanzania katika kuimarisha huduma za watoto njiti kuhamasisha nchi nyingine za Afrika kuwekeza katika ujenzi wa wodi maalumu za watoto wachanga, huku akichangia ujenzi wa wodi hizo katika baadhi ya nchi za Bara la Afrika.

Hayo yameelezwa Novemba 11, 2026, na Mshauri wa Rais wa Masuala ya Afya ya Uzazi, Mama na Mtoto na Mkuu wa Sekretarieti ya Kinara wa Umoja wa Afrika wa Masuala ya Afya ya Uzazi, Mama na Mtoto Mhe. Ummy Mwalimu wakati wa ziara katika Hospitali ya Wilaya ya Kwimba, mkoani Mwanza, ambako amejionea mafanikio ya wodi maalumu ya watoto njiti.

“Rais Dkt. Samia amepewa dhamana na Wakuu wa nchi 55 na Viongozi wanachama wa Umoja wa Afrika kuwa Kinara wa masuala ya Afya ya Uzazi, Mama na Mtoto barani humo, amedhamiria kuendeleza uwekezaji katika huduma zinazookoa maisha ya wanawake na watoto, ndani na nje ya Tanzania” amesema Mhe. Ummy Mwalimu

Amesema wodi hiyo ni mfano wa uwekezaji ambao Tanzania kwa kushirikiana na Wadau wa Maendeleo ya Sekta ya Afya wanakusudia kuutumia kuhamasisha nchi nyingine za Afrika kuongeza uwekezaji katika huduma za kuokoa maisha ya watoto wachanga.

Akifafanua namna uzoefu wa Kwimba utakavyotumika katika kuhamasisha nchi nyingine za Afrika, Mhe. Ummy amesema Tanzania itatumia mfumo wa kuhamasisha uwekezaji kwa vitendo, ambapo Rais Samia atatoa mchango wa kujenga wodi katika nchi nyingine pamoja na kusomesha wataalam wa Afya ya Mama na Mtoto huku akiendelea kuzihamasisha Serikali za. nchi husika kuongeza uwekezaji katika miundombinu na rasilimali watu.

Katika hatua nyingine, Mhe. Ummy amebainisha kuwa Rais Dkt. Samia ametoa ahadi ya kuchangia Shilingi milioni 500 kwa ajili ya ujenzi wa wodi ya wazazi katika hospitali hiyo ili kuendelea kuimarisha huduma za afya ya uzazi Wilayani Kwimba.

Kwa upande wake, Mkurugenzi Msaidizi wa Huduma za Watoto Wachanga, Watoto na Vijana kutoka Wizara ya Afya, Dkt. Felix Bundala, amesema katika kipindi cha miezi tisa baada ya kuanzishwa kwa wodi hiyo katika Hospitali ya Wilaya ya Kwimba, idadi ya watoto waliopata huduma imeongezeka kutoka 183 hadi 542, huku rufaa zikipungua kwa asilimia 70 na vifo vya watoto waliolazwa vikishuka kutoka asilimia 34 hadi asilimia 12.

Amesema mafanikio hayo yanaunga mkono mpango wa Serikali wa kujenga wodi maalumu za watoto njiti zisizopungua 60 ifikapo mwaka 2028, kwa lengo la kupunguza vifo vya watoto wachanga na kufikia lengo la vifo 12 au chini ya hapo kwa kila vizazi hai 1,000 ifikapo mwaka 2030.

“Uwekezaji huu ni sehemu ya utekelezaji wa ajenda ya Rais Samia, Kinara wa Umoja wa Afrika (AU) wa Afya ya Uzazi, Mama na Mtoto, inayolenga kufikia malengo makuu matatu ya sifuri: sifuri ya uzazi wa nyumbani, sifuri ya vifo vinavyoweza kuzuilika vya kina mama na watoto wachanga, na sifuri ya watoto wasiopata chanjo” amefafanua Dkt. Bundala.

Wodi ya kwanza na ya kisasa nchini kwa ajili ya watoto njiti imejengwa na taasisi ya Doris Mollel kwa kushirikiana na Serikali pamoja na wadau wengine wa maendeleo ya Sekta ya Afya ni kielelezo hai cha namna ushirikiano kwenye maendeleo ya Sekta ya Afya unavyoweza kuleta tija katika upatikanaji wa Huduma za Afya.