Habari Za Hivi Punde Habari Za Hivi Punde
Soma zaidi

at Saturday, November 14, 2026 0


Diwani wa Kata ya Kigamboni, Dotto Msawa, amesema utekelezaji wa miradi ya maendeleo kupitia Mradi wa Uendelezaji wa Jiji la Dar es Salaam (DMDP) unaifanya kata hiyo kuelekea kuwa kama ‘Masaki Ndogo’, kutokana na ujenzi wa barabara za lami na mifereji ya kisasa katika mitaa mbalimbali.

Msawa ameyasema hayo Novemba 13, 2026, wakati wa ziara ya ukaguzi wa miradi akiongozana na Kamati ya Siasa ya CCM ya kata hiyo pamoja na wenyeviti wa mitaa, ambapo alieleza kuwa ujenzi wa mifereji unatarajiwa kukamilika ndani ya siku 10, huku barabara zikitarajiwa kukamilika Januari 2027.

Alisema kukamilika kwa awamu ya tatu ya mradi huo kutaiwezesha Kigamboni kunufaika na miradi mingine ikiwemo soko la kisasa la Mjimwema, uwanja wa kisasa wa mpira wa miguu eneo la Machava na ujenzi wa bwawa Kichangachui kwa ajili ya kudhibiti maji yanayotiririka na kusababisha changamoto kwa wananchi.

Aidha, aliishukuru Serikali inayoongozwa na Rais Dkt. Samia Suluhu Hassan kwa kutoa fedha za utekelezaji wa miradi hiyo, akisema kasi ya maendeleo inayoshuhudiwa sasa katika kata hiyo haijawahi kutokea.

Msawa pia aliitaka Kampuni ya Group Six International (GSI) kuongeza kasi ya ujenzi wa mifereji ili ikamilike kabla ya kuanza kwa msimu wa mvua na kuwaondolea wananchi adha ya mafuriko.

Katika hatua nyingine, aliwahakikishia wakazi wa Magenge ya Juu na maeneo jirani kuwa barabara yenye urefu wa kilomita 1.6, kuanzia Mkunguni kupitia Konabaa, Tuamoyo na Raleo hadi kuungana na Machava, itawekewa lami ili kurahisisha usafiri na kuchochea shughuli za kiuchumi.

Wakati huohuo, aliwataka wanafunzi wa Shule ya Sekondari Paul Makonda kuzingatia maadili mema na kujikita katika masomo badala ya kutumia vibaya mitandao ya kijamii, akisisitiza kuwa nidhamu ni msingi wa mafanikio yao kitaaluma.

Kwa upande wake, Katibu wa Siasa na Uenezi wa CCM Kata ya Kigamboni, Juma Kitumbe, amesema wanatarajia miradi hiyo kukamilika kwa wakati na kwa viwango vinavyotakiwa ili kuleta manufaa kwa wananchi, huku akiwataka wakazi wa Kigamboni kuendelea kukiamini CCM katika kusimamia utekelezaji wa miradi ya maendeleo.











Read more »

at Saturday, November 14, 2026 0
WAZIRI MKUU Dkt. Mwigulu Nchemba leo asubuhi (Jumamosi, Novemba 14, 2026) ametembelea kiwanda cha kutengeneza mipira ya kusambazia maji cha MALC kilichopo Kata ya Mlangali, wilayani Ludewa, mkoani Njombe na kukagua uzalishaji kiwandani hapo.

Akizungumza na wafanyakazi wa MALC Investment Company Ltd baada ya kuangalia utendaji kazi wake, Waziri Mkuu amesema amevutiwa na uwekezaji uliofanywa na kazi inayofanyika kwenye kiwanda hicho.

"Nimefurahishwa na kazi inayofanyika kwenye hiki kiwanda. Hongera kwa uthubutu na uwekezaji ulioufanya," amesema Waziri Mkuu wakati akimpongeza Mkurugenzi Mtendaji wa kampuni hiyo, Bw. Maiko Lameck Ng’ahala.

Amesema bidhaa wanayozalisha ni ya muhimu kwa sababu inahitajika kwenye miradi ya maji inayojengwa na Serikali. “Kuna miradi iliwahi kukwama kwa sababu ya mabomba kuchelewa kufika kutoka India. Sasa hii ni fursa na ndiyo njia ya kujenga uchumi wa kisasa,” amesema.

Dkt. Mwigulu amesema kuwa nchi nyingi zimeendelea kwa sababu ziliingia kwenye uchumi wa viwanda na na kuamua kufanya uongezaji wa thamani. “Kwetu sisi, njia hii inatusaidia kuongeza ajira na wigo wa kodi na hivyo kuongeza mapato ya nchi,” amesema.

Mapema, akitoa taarifa kuhusu kiwanda hicho, Bw. Maiko Ng’ahala alisema kuwa ujenzi wa kiwanda hicho ulianza mwanzoni mwa mwaka 2025 na kilianza rasmi uzalishaji Mei, mwaka huu.

Alisema kiwanda hicho ambacho uwekezaji wake umefikia sh. bilioni 1.2, hivi sasa kinazalisha mipira ya kusambazia maji yenye ukubwa na madaraja mbalimbali ambapo wameanza na daraja “A” na “B” kwa ajili ya kilimo, umwagiliaji na matumizi mengine.

Alisema mbali na kuzalisha mipira ya kusambazia maji yenye ukubwa na madaraja tofauti, lengo kuu la kiwanda hicho ni kuongeza uzalishaji wa bidhaa za ndani, kuchangia maendeleo ya kiuchumi katika Wilaya ya Ludewa na kutoa fursa za ajira ambapo hadi sasa vijana 30 wameajiriwa.







Read more »

at Saturday, November 14, 2026 0
Na Seif Mangwangi, Michuzi TV, Arusha

WAHITIMU wa Chuo cha Ufundi Arusha (ATC) wametakiwa kutafakari na kujiwekea mikakati ya namna ya kutumia ujuzi na maarifa waliyoyapata chuoni hapo katika kuchangia utekelezaji wa Dira ya Taifa ya Maendeleo 2050, inayolenga kuifanya Tanzania kuwa nchi yenye uchumi wa kipato cha juu na shindani.

Wito huo umetolewa Novemba 12, 2026 na mkuu wa chuo cha ufundi Arusha (ATC), Profesa Mussa Chacha alipokuwa akitoa hotuba katika mahafali ya 18 ya chuo hicho yaliyofanyika chuoni hapo.

Profesa Chacha amewataka wahitimu hao wa ngazi mbalimbali za uhandishi kwa viwango vya Stashahada na Shahada kutambua kuwa elimu na ujuzi walioupata ni nyenzo muhimu katika kujenga uchumi wa viwanda, kukuza teknolojia na kuongeza uzalishaji nchini.

Amesema Dira ya Taifa ya Maendeleo 2050 inahitaji nguvu kazi yenye maarifa, ujuzi, ubunifu na uzoefu katika sekta mbalimbali, hivyo wahitimu wa elimu ya ufundi wana nafasi muhimu katika kufanikisha malengo hayo.

“Mnatakiwa kutambua kuwa kuhitimu si mwisho wa kujifunza, bali ni mwanzo wa safari ya kutumia maarifa katika kutatua changamoto za kijamii na kiuchumi, lakini pia napenda kuishukuru Serikali yetu chini ya Rais Dkt Samia Suluhu Hassan , wadau wa maendeleo, wazazi, walezi na washirika wa chuo kwa mchango wao katika kuendeleza elimu ya ufundi nchini.l,” amesema.

Kwa upande wake, Mgeni rasmi katika mahafali hayo Mkurugenzi wa Utafiti na Mafunzo wa Wizara ya Elimu na Mafunzo ya Ufundi, Dkt. Fredrick Salukile, Kwa niaba ya Katibu Mkuu Wizara ya Elimu Prf.Carolyne Nombo amesema wahitimu hao wanatakiwa kuunganisha elimu ya ufundi na mahitaji halisi ya soko la ajira na maendeleo ya viwanda.

Dkt. Salukile amesema maendeleo ya taifa hayaishii katika kujenga miundombinu pekee, bali yanahitaji pia wataalamu wenye uwezo wa kuendesha, kuhudumia na kutengeneza mifumo na vifaa mbalimbali, akisisitiza kuwa teknolojia, ubunifu na ujuzi ni msingi muhimu wa kujenga uchumi imara.

Amesema Serikali inatambua umuhimu wa vijana wenye ujuzi katika sekta za uzalishaji na ndiyo maana imeendelea kuimarisha elimu ya ufundi, huku akizitaka kampuni, viwanda na taasisi mbalimbali kutoa nafasi kwa wahitimu ili wapate uzoefu wa kazi na kutumia maarifa yao katika mazingira halisi ya uzalishaji.

Aidha Dkt Salukile, amesisitiza umuhimu wa kuendeleza kituo cha Uhandisi wa Vifaa Tiba (Biomedical Engineering) kwa ajili ya mafunzo, tafiti, ubunifu na matengenezo ya vifaa tiba, huku akieleza kuwa chuo hicho kufanya ushirikiano na vyuo na taasisi za kimataifa ikiwemo Cornell University, Clemson University na vyuo vikuu vya Korea Kusini ni fursa ya kuongeza uwezo wa wataalamu wa ndani.

Mwenyekiti wa bodi ya chuo hicho Dkt. Noel Mbonde, amesema chuo hicho kinaendelea kuimarisha mafunzo yanayozingatia ujuzi wa vitendo, sayansi, teknolojia, nishati endelevu na ujasiriamali ili kuandaa wahitimu watakaokidhi mahitaji ya uchumi wa kisasa.

Dkt. Mbonde amesema bodi inatambua mchango wa wadau wa maendeleo na taasisi za kimataifa katika kuimarisha uwezo wa chuo, akitaja ushirikiano na Shirika la Maendeleo la Umoja wa Mataifa (UNDP) pamoja na UNESCO Global Skills Academy kuwa sehemu ya juhudi za kuboresha elimu ya ufundi.

Amesema ushirikiano huo unapaswa kuzaa matokeo yanayoonekana katika viwanda, taasisi na maeneo mbalimbali ya uzalishaji badala ya kuishia katika maonesho na makubaliano, huku akisisitiza umuhimu wa kufanya tathmini ya mafanikio ya mafunzo na matumizi ya teknolojia zinazozalishwa.

Aidha, ameeleza kuwa chuo kinaendelea na ujenzi wa kiwanda cha mafunzo na uzalishaji wa mashine, ambapo vifaa na mashine kutoka Austria vinatarajiwa kuwasili mwishoni mwa Novemba 2026 na kuanza kufungwa mara baada ya kufika ili kuwawezesha wanafunzi kupata mafunzo katika mazingira halisi ya viwanda.

Amewapongeza wahitimu kwa kufikia hatua hiyo na kuwataka kuendelea kuongeza maarifa, kuwa wabunifu na kutumia ujuzi wao kujiajiri na kuajiriwa, huku akiwataka kuwa mabalozi wazuri wa chuo kwa kuonesha nidhamu, uadilifu na umahiri katika maeneo yao ya kazi.

Katika mahafali hayo ya 18, jumla ya wahitimu 1337 wametajwa kuhitimu katika ngazi mbalimbali za mafunzo ya ufundi katika kozi za uhandisi wa mitambo, uzalishaji wa umeme, petroli na gesi, ujenzi wa barabara, majengo.




Read more »

at Saturday, November 14, 2026 0


Na Mwandishi

WAZIRI wa Ujenzi Masanja Kungu Kadogosa, amesema Serikali ya Tanzania imejipanga kuimarisha utekelezaji wa miradi ya miundombinu kupitia mfumo wa Ubia kati ya Sekta ya Umma na Sekta Binafsi (Public Private Partnership – PPP), kwa kujifunza uzoefu wa Kenya katika kuvutia uwekezaji na kusimamia miradi mikubwa ya maendeleo.

Kadogosa ameyasema hayo jijini Nairobi, Kenya, wakati wa Kongamano la 16 la Bara la Afrika kuhusu Ushirikiano kati ya Sekta ya Umma na Sekta Binafsi (PPP), ambapo amesisitiza umuhimu wa nchi za Afrika kutumia mfumo huo kama njia mojawapo ya kuongeza uwezo wa kugharamia na kutekeleza miradi mikubwa ya miundombinu.

Amesema Tanzania inaendelea kuandaa na kutekeleza mikakati ya kutumia mfumo wa PPP katika miradi mbalimbali, hivyo kujifunza uzoefu wa Kenya kutasaidia kubaini mifumo bora ya utekelezaji, namna ya kuvutia wawekezaji binafsi na kukabiliana na changamoto zinazoweza kujitokeza katika utekelezaji wa miradi hiyo.

Aidha, amesema katika mazungumzo yaliyofanyika pembezoni mwa kongamano hilo, wamejadili fursa za uwekezaji katika sekta ya miundombinu nchini Tanzania, hususan miradi ya barabara ya Kibaha–Chalinze, Chalinze–Morogoro, Morogoro–Iringa na Igawa–Tunduma.

Kadogosa ameeleza kuwa miongoni mwa mambo muhimu yaliyojadiliwa ni namna Kenya ilivyoanzisha Mfuko wa Taifa wa Miundombinu (Kenya National Infrastructure Fund), wenye mtaji unaokadiriwa kufikia dola za Marekani bilioni tatu, kwa lengo la kusaidia kugharamia miradi ya miundombinu na kupunguza vihatarishi vya uwekezaji vinavyoweza kuwafanya wawekezaji binafsi kusita kushiriki katika miradi ya PPP.

Amesisitiza kuwa uzoefu huo ni muhimu kwa Tanzania katika kuimarisha mazingira ya uwekezaji, kuongeza ushiriki wa sekta binafsi na kuhakikisha miradi mikubwa ya miundombinu inapata vyanzo endelevu vya fedha kwa ajili ya utekelezaji wake.

Kongamano hilo limewakutanisha wadau kutoka mataifa mbalimbali, yakiwemo Kenya, Uganda, Ufaransa, Tunisia, Ivory Coast na Senegal, kwa lengo la kubadilishana uzoefu na kujadili mikakati ya kuimarisha ushirikiano kati ya sekta ya umma na sekta binafsi katika kufadhili na kutekeleza miradi ya maendeleo barani Afrika.

Hatua hiyo inaendana na Dira ya Taifa ya Maendeleo 2050 inayolenga kujenga uchumi shindani na jumuishi kupitia uwekezaji katika miundombinu ya kisasa, kuongeza ushiriki wa sekta binafsi na kuharakisha utekelezaji wa miradi ya kimkakati kwa maendeleo ya Taifa




Read more »

at Saturday, November 14, 2026 0
Waziri wa Nchi, Ofisi ya Makamu wa Rais (Muungano na Mazingira), Mhandisi Hamad Masauni, amepongeza Kituo cha Taifa cha Ufuatiliaji wa Kaboni (NCMC) na Benki ya CRDB PLC kwa kuingia makubaliano ya ushirikiano yenye lengo la kuimarisha soko la biashara ya kaboni nchini na kuvutia uwekezaji katika kukabiliana na mabadiliko ya tabianchi.

Masauni ameyasema hayo wakati wa hafla ya utiaji saini wa Hati ya Makubaliano (MoU) kati ya NCMC na Benki ya CRDB iliyofanyika jijini Antalya, Uturuki.

Amesema ushirikiano huo ni muhimu katika kuunganisha uwezo wa Serikali kupitia NCMC katika kusimamia na kuratibu biashara ya kaboni pamoja na utaalamu wa CRDB katika huduma za kifedha na uwekezaji.

Ameeleza kuwa Tanzania kupitia Dira ya Taifa ya Maendeleo ya 2050 imeitambua biashara ya kaboni kuwa sekta muhimu katika kuvutia uwekezaji wa kijani, kupata fedha za kukabiliana na mabadiliko ya tabianchi na kuchochea maendeleo endelevu ya kiuchumi.

Aidha, ameitaka CRDB kubuni mifumo bunifu ya kifedha ikiwemo mikopo ya vifaa, dhamana na nyenzo nyingine zitakazowezesha utekelezaji wa miradi ya kaboni na kuongeza upatikanaji wa mitaji kwa wawekezaji.

Hata hivyo, Masauni amesisitiza kuwa upatikanaji wa fedha kwa ajili ya miradi ya kaboni haupaswi kuchukuliwa kama kibali cha utekelezaji, akieleza kuwa miradi yote lazima izingatie sheria, kanuni na taratibu zilizowekwa na Serikali.

Ameongeza kuwa biashara hiyo inapaswa kuzingatia haki za binadamu, kulinda jamii zinazozunguka maeneo ya miradi, kuhifadhi mazingira na kuhakikisha wananchi wanapata manufaa ya kiuchumi na kijamii, yakiwemo ajira na uhamishaji wa teknolojia.

Amesisitiza kuwa Serikali itaendelea kuimarisha mifumo ya kitaasisi na udhibiti wa biashara ya kaboni ili kuhakikisha uwazi, uwajibikaji na manufaa ya sekta hiyo yanawafikia Watanzania.






Read more »

at Saturday, November 14, 2026 0
Makamu wa Rais wa Jamhuri ya Muungano wa Tanzania, Mhe. Deogratius Ndejembi, Novemba 14, 2026, ameanza ziara ya kikazi mkoani Lindi kwa kuzungumza na wananchi wa Madangwa, Jimbo la Mtama, ikiwa ni mwendelezo wa ziara yake katika mikoa ya Kusini.

Madangwa ni kituo cha kwanza cha ziara yake mkoani Lindi baada ya kutoka mkoani Mtwara. Akiwasili katika eneo hilo, alipokelewa na Mkuu wa Mkoa wa Lindi, Adam Malima, Mbunge wa Mtama, Nape Nnauye, wabunge wa Mkoa wa Lindi pamoja na viongozi mbalimbali wa CCM na Serikali.

Akiwa Madangwa, Makamu wa Rais ameiagiza Wizara ya Ujenzi kuanza kulipa fidia kwa wananchi waliopisha maeneo yao kwa ajili ya ujenzi wa barabara, ikiwezekana malipo hayo yafanyike kwa awamu.

Aidha, Wizara ya Maji imeahidi kutoa Sh milioni 500 kwa ajili ya ukarabati wa mradi wa maji ili huduma hiyo irejeshwe na kupatikana kwa wananchi ndani ya miezi miwili.

Katika hatua nyingine, Wizara ya Kilimo imeahidi kuhakikisha salfa ya unga kwa ajili ya zao la korosho inawafikia wakulima kabla ya Machi 2027.

Makamu wa Rais alianza ziara ya siku saba katika mikoa ya Kusini Novemba 9, 2026, akitembelea mikoa ya Ruvuma, Mtwara na Lindi kwa ajili ya kukagua miradi ya maendeleo na kusikiliza pamoja na kutatua kero za wananchi.











Read more »

at Saturday, November 14, 2026 0
Na Victor Masangu, Kibaha

HALMASHAURI ya Manispaa ya Kibaha inatarajia kuongeza vyanzo vya mapato ya ndani kupitia uboreshaji wa mradi wa maegesho ya malori katika eneo la Misugusugu, kwa kuweka huduma mbalimbali za kijamii zitakazowanufaisha watumiaji wa eneo hilo.

Mradi huo unatarajiwa kuwa mkombozi katika kupunguza changamoto ya malori kuegeshwa kiholela pembezoni mwa barabara, hali inayoweza kusababisha usumbufu na kuhatarisha usalama wa watumiaji wengine wa barabara.

Hayo yameelezwa na Mkurugenzi wa Halmashauri ya Manispaa ya Kibaha, Warda Maulid, wakati akijibu maswali ya madiwani katika kikao cha baraza la madiwani kilichojadili utekelezaji wa shughuli za robo ya kwanza ya mwaka wa fedha 2026/2027 (Julai–Septemba).

Maulid amesema halmashauri imejipanga kuweka huduma mbalimbali za kijamii katika eneo hilo, hatua itakayosaidia kuboresha mazingira ya maegesho na kuongeza mapato ya ndani kupitia huduma zitakazotolewa.

Amesema ameyapokea maoni na mapendekezo ya madiwani na kwamba halmashauri itaweka mipango ya muda mfupi na mrefu kuhakikisha mradi huo unakuwa na manufaa zaidi.

Awali, Diwani wa Kata ya Misugusugu, Ally Simba, aliomba eneo hilo liboreshwe kwa kuweka huduma mbalimbali za kijamii pembezoni mwa maegesho ili kuongeza ufanisi wake.

Kwa upande wake, Diwani wa Viti Maalumu, Sara Uledi, amesema kuna umuhimu wa kuhakikisha malori yanayoegeshwa kiholela barabarani yanaondolewa na kuelekezwa katika eneo maalumu lililotengwa kwa ajili hiyo.

Naye Mstahiki Meya wa Manispaa ya Kibaha, Dkt. Nicas, amelipongeza baraza la madiwani kwa ushirikiano na kumkaribisha Mkurugenzi huyo mpya, akiahidi ushirikiano katika kutekeleza majukumu ya halmashauri.

Wakati huo huo, Mkuu wa Wilaya ya Kibaha, Fadhili Emanuel Nkurlu, amewataka viongozi wa chama na Serikali kutekeleza majukumu yao kwa kuzingatia sheria na kanuni zilizowekwa, bila kuingiliana katika maeneo ya kiutendaji.

Mwenyekiti wa CCM Wilaya ya Kibaha Mjini, Mwl. Mwajuma Amiri Nyamka, amesisitiza umuhimu wa uzalendo, ushirikiano na mshikamano miongoni mwa madiwani ili kuongeza ufanisi katika utekelezaji wa majukumu yao.




Read more »

at Saturday, November 14, 2026 0
NA DENIS MLOWE, IRINGA

MWANASIASA na Mjumbe wa Halmashauri Kuu ya Taifa (NEC) ya Chama Cha Mapinduzi (CCM), Salim Abri Asas, ameadhimisha miaka 40 tangu alipojiunga na chama hicho, akieleza kuwa safari yake ya uanachama imejengwa katika misingi ya uaminifu, utiifu na kujitolea katika kukitumikia chama.

Asas ameadhimisha kumbukumbu hiyo Novemba 13, 2026, ikiwa ni miaka 40 tangu aanze safari yake ya kuwa mwanachama wa CCM, ambayo imeendelea kumfikisha katika ngazi mbalimbali za uongozi ndani ya chama hicho, ikiwemo nafasi ya Mjumbe wa Kamati Kuu ya Halmashauri Kuu ya Taifa.

Katika ujumbe wake alioandika katika mitandao yake ya kijamii ikiwemo Instagram jana wa kuadhimisha miaka hiyo, Asas amesema anajivunia kuwa mwanachama mwaminifu na mtiifu kwa CCM kwa kipindi chote cha miaka 40, akishukuru kwa nafasi na dhamana alizopata za kukitumikia chama chake.

Amesema safari hiyo ya muda mrefu imekuwa sehemu muhimu ya maisha yake ya kisiasa, ikimpa fursa ya kushiriki katika shughuli za chama na hatimaye kufikia nafasi za juu za uongozi.

Miaka 40 ya uanachama wa Asas inaweka alama ya safari ndefu ya kisiasa ndani ya CCM, chama ambacho amekuwa akikihusisha na maisha yake ya uongozi na utumishi.

Kufikia nafasi ya Mjumbe wa Kamati Kuu ya Halmashauri Kuu ya Taifa ni hatua inayoonesha nafasi aliyoifikia ndani ya mfumo wa uongozi wa chama hicho, baada ya miongo minne ya kuwa mwanachama.

Kwa Asas, maadhimisho hayo si kumbukumbu ya muda alioutumikia chama pekee, bali pia ni fursa ya kutafakari safari yake ya uanachama, uaminifu na dhamira ya kuendelea kuwa sehemu ya CCM.


 

Read more »

at Saturday, November 14, 2026 0
Na Mwamvua Mwinyi, Mkuranga

WANANCHI wa Kata ya Kisiju wilayani Mkuranga mkoani Pwani wameiomba Serikali kuharakisha ujenzi wa Bandari ya Kisiju, wakieleza kuwa kuchelewa kwa mradi huo kwa muda mrefu kumeendelea kuwa kero na kuwaacha katika sintofahamu kuhusu hatma yake.

Wakizungumza katika mkutano wa hadhara wakati wa ziara ya siku moja ya Mkuu wa Mkoa wa Pwani, Stanslaus Nyongo, wananchi Kajumlo Mhidini na Afishi Kimo walisema wanahitaji mradi huo utekelezwe ili kuondoa changamoto zinazowakabili na kuchochea maendeleo ya eneo hilo.

Kwa upande wake, Diwani wa Kata ya Kisiju, Ally Dau, alisema bandari hiyo ina umuhimu mkubwa katika kukuza uchumi wa eneo hilo, huku akisisitiza pia umuhimu wa kupatikana kwa boti ya uokozi baharini kwa ajili ya kusaidia kukabiliana na dharura zinazotokea majini.

Akijibu kilio hicho, Nyongo amewahakikishia wananchi kuwa atalibeba na kulisimamia suala hilo chini ya Serikali ya Rais Dkt. Samia Suluhu Hassan, akitoa tamko kuwa ujenzi wa bandari hiyo unatarajiwa kuanza mwaka 2027.

Alisema mradi huo utahusisha ujenzi wa gati litakalosogea zaidi ya kilomita moja ndani ya bahari kufikia eneo lenye kina kirefu cha maji, ili meli ziweze kupakia na kupakua mizigo muda wote bila kuathiriwa na maji kupwa na kujaa.

Kwa upande wake, mwakilishi wa Mkurugenzi Mkuu wa Mamlaka ya Usimamizi wa Bandari Tanzania (TPA), Rajabu Msiku, alisema utafiti wa mradi huo katika eneo la Dindini, Kisiju, umekamilika na kwa sasa wanaendelea na taratibu za manunuzi ili kumpata mkandarasi.

Katika ziara hiyo pia Nyongo ameielekeza Halmashauri ya Mkuranga kuhakikisha inasimamia na kuharakisha ujenzi wa Shule ya Sekondari Mbezi Gongoni ili ikamilike kwa wakati na kuanza kupokea wanafunzi watakaojiunga na kidato cha kwanza mwaka 2027.

Aidha, aliitaka Halmashauri hiyo kukamilisha taratibu za usajili wa shule hiyo mapema ili kuwezesha kuanza kwa shughuli za utoaji wa elimu mara baada ya kukamilika kwa miundombinu inayohitajika.

Alisisitiza umuhimu wa Halmashauri kutenga fedha kutoka katika mapato yake ya ndani kwa ajili ya ujenzi wa mabweni, yatakayowasaidia wanafunzi wanaoishi mbali na shule hiyo kupata mazingira salama ya kujifunzia na kuepuka vishawishi vinavyoweza kuathiri maendeleo yao ya kitaaluma.

Awali, akiwasilisha taarifa ya mradi huo, Mtendaji wa Kijiji cha Msufini Kidete, Beatrice Anthony Deref, alisema awamu ya kwanza ya ujenzi wa shule hiyo ulianza Juni 2024 na kukamilika Juni 2026 kwa gharama ya Sh milioni 196.2 zilizotokana na mapato ya ndani ya Halmashauri.

Alisema mradi huo unalenga kuongeza nafasi za wanafunzi kujiunga na elimu ya sekondari mwaka 2027 na 2028, kuboresha mazingira ya ufundishaji na ujifunzaji pamoja na kupunguza adha ya wanafunzi wa Kata ya Mbezi ambao wamekuwa wakitembea zaidi ya kilomita tano kufuata elimu katika Shule za Sekondari Shungubweni na Kitumbo.






Read more »

at Saturday, November 14, 2026 0


Na Ashura Mohamed - Arusha

Zaidi ya vifaa tiba 396 vyenye thamani ya shilingi bilioni 1.2 vimekabidhiwa katika vituo vya afya 140 vilivyopo kwenye halmashauri 20 za mikoa ya Arusha, Kilimanjaro na Lindi ambapo ununuzi huo umezingatia Mahitaji na Vipaumbele vilivyobainishwa na Serikali.

Akizungumza Jijini Arusha wakati wa kupokea vifaa hivyo kwa niaba ya Katibu Mkuu wa Wizara ya Afya Dr.Grace Magembe,Katibu Tawala wa Mkoa wa Arusha, Dkt. Toba Nguvila amesema lengo la

Msaada huo ni kuimarisha huduma jumuishi za afya ya uzazi kwa mama na mtoto,ili kuunga juhudi za serikali mkono kwa kuendelea kuboresha huduma za afya ya mama na mtoto.

Aidha amesema kuwa Tanzania imeendelea kutambuliwa kutokana na mafanikio yake katika sekta hiyo, ikiwemo kutambuliwa kwa Rais Dkt.Samia Suluhu Hassan na Umoja wa Afrika mwezi Februari 2026,kama kinara wa masuala ya Afya ya Uzazi na Mtoto

Dkt. Nguvila amewataka watumishi wa afya kuzingatia viwango na miongozo ya kitaifa katika utoaji wa huduma kwa wajawazito na watoto wachanga,huku akisisitiza umuhimu wa kutumia ujuzi walioupata kutambua viashiria vya hatari mapema na kuchukua hatua stahiki ili kuimarisha usalama wa mama na mtoto.

Kwa Upande wake Kaimu Mkurugenzi Mkuu wa Shirika la Pact Tanzania Dkt. Asheri Barankena, amesema vifaa hivyo vimetolewa kupitia mradi wa ACHIEVE ambavyo ni Mashine ya kuongeza joto kwa watoto wachanga(Infant Radiant Warmers) ambayo huongeza joto kwa watoto wachanga dhidi ya kupoteza joto katika saa za kwanza za kuzaliwa, Mashine za CPAP ambazo husaidia watoto wachanga wenye matatizo ya kupumua.

Amesema nyingine ni Mashine za Infusion Pumps ambazo huwezesha utoaji sahihi na salama wa dawa na vimiminika mwilini na vifaa hivyo sio vya kawaida na nyenzo muhimu zinazowawezesha wataalamu wa afya kuchukua hatua za haraka katika mazingira ambayo kila dakika ina umuhimu.

"Mradi wa ACHIEVE ni kielelezo cha mtazamo muhimu,Chini ya uongozi wa Wizara ya Afya na kwa ufadhili wa Serikali ya Marekani,kwa kushirikiana ma serikali katika kuimarisha afya ya mama na mtoto mchanga"Amesisitiza Barakena

Pia amesema kuwa lengo la Pact Tanzania ni ni kujenga ushirikiano na kuendelea kuimarisha mifumo iliyopo ,kujenga uwezo wa taasisi na wataalamu wa ndani na kusaidia utekelezaji wa vipaumbele vya Taifa kwa manufaa mapana ya wananchi.

Kwa Upande wake Mtaalamu wa Usimamizi wa Programu za Afya za Mama,Mtoto Mchanga na Mtoto (MNCH),Wizara ya Mambo ya Nje ya Marekani Natu Makoko amesema kuwa juhudi za pamoja za kuimarisha huduma jumuishi za dharura za uzazi na za watoto katika vituo vinavyotoa huduma za afya ya msingi katika mikoa ya Arusha,Kilimajaro na Lindi zitawezesha wahudumu wa afya kuwapatia kina mama na watoto wachanga huduma bora na kwa wakati.

"Makabidhiano haya yanaakisi misingi inayoongoza awamu mpya ya ushirikiano wetu wa afya ambapo tarehe 01.7.2026,Marekani na Tanzania zilitia saini Hati ya makubaliano ya miaka mitano ya ushirikiano katika sekta ya afya chini ya mkakati wa Marekani wa kwanza wa Afya Duniani-AFGH,ambapo yanaonyesha dhamira ya kujenga ushirikiano unaozingatia uwajibikaji wa pande zote mbili"Amesisitiza Makoko

America First Global Health Strategy (AFGH),ni mkakati wa Marekani wa kwanza wa Afya Duniani wenye lengo bayana la kuimarisha usalama,uwezo na ustawi wa wananchi wa Marekani-Making Americans Safer,Strong and more Prosperous ambao mkakati huo unatambua uwekezaji una ufanisi zaidi unapoongeza uwezo wa nchi kuongoza kugharamia na kuendeleza mifumo ya afya nchini.

Hata hivyo mradi wa ACHIEVE pia umefanikiwa kuwajengea uwezo watumishi wa afya 2,023 juu ya utoaji wa huduma za dharura katika vituo vya afya 203 vya mikoa hiyo mitatu.





Read more »

at Saturday, November 14, 2026 0






MAKAMU wa Rais wa Jamhuri ya Muungano wa Tanzania, Mheshimiwa Deogratius John Ndejembi ameweka rasmi jiwe la msingi la ujenzi wa Mradi wa Kongani la Viwanda tarehe 13 Novemba 2026, katika Kijiji cha Maranje, Halmashauri ya Nanyamba mkoani Mtwara.

Hafla hiyo imefanyika katika eneo la mradi unaosimamiwa na Wizara ya Kilimo kupitia Bodi ya Korosho Tanzania (CBT), ikiwa ni sehemu ya ziara ya kikazi ya Makamu wa Rais mkoani Mtwara na kukagua na kuhamasisha utekelezaji wa miradi ya maendeleo yenye manufaa kwa wananchi na Taifa kwa ujumla.

Katika tukio hilo, Mhe. Ndejembi ameambatana na Waziri wa Kilimo, Mhe. Daniel Chongolo (Mb), pamoja na Viongozi wengine wa Serikali.

Mradi huo wa kimkakati wa Kongani la Viwanda Maranje unalenga kujenga miundombinu ya kisasa ya viwanda vya kubangua na kuongeza thamani ya zao la Korosho hapa nchini. Mradi huo unatarajiwa kuchochea ukuaji wa uchumi wa mkoa wa Mtwara, kuongeza kipato cha wakulima na kuzalisha maelfu ya ajira kwa vijana na wananchi wa Nanyamba na maeneo ya jirani.

Kupitia uzinduzi huo, Makamu wa Rais ameelekeza bomba la gesi kufikishwa katika Kongani hiyo, na pia kuagiza Wakala wa Nishati Vijijini (REA) kuweka miundombinu mahsusi ya umeme ili kuhakikisha upatikanaji wa Nishati ya uhakika kwa shughuli za viwanda.

Aidha, Makamu wa Rais amekabidhi mashine 100 za kısasa zinazotumia umeme kwa ajili ya kuwawezesha wabanguaji wadogo kuongeza ufanisi wa uzalishaji. Kila mashine ina uwezo wa kubangua kilo 700 za Korosho kwa siku, hivyo mashine zote 100 zilizokabidhiwa na Makamu wa Rais zina uwezo wa kubangua kilo 70,000 kwa siku. Hatua hiyo inatarajiwa kufungua zaidi ya ajira zaidi 4000 kwa wakazi wa Mtwara, hususan vijana.

Uzinduzi wa Mradi wa Kongani la Viwanda Maranje unaashiria hatua muhimu katika juhudi za Serikali za kuongeza thamani ya mazao ya kimkakati, kuimarisha uchumi wa viwanda na kuinua ustawi wa wakulima wa Korosho nchini.
Read more »

at Saturday, November 14, 2026 0



KARIBU cha Taifa cha Taifa cha Kuratibu Biashara ya Kaboni kimesaini Hati ya Makubaliano ya Ushirikiano (MoU) na Benki ya CRDB Makubaliano ya Ushirikiano ya miaka mitano kwa lengo la kuendeleza, kufadhili na kukuza miradi ya biashara ya kaboni nchini.

Utiaji Saini huo umefanyika leo tarehe 13 Novemba 2026, jijini Antalya Uturuki, pembezoni mwa Mkutano wa Umoja wa Mataifa wa Mabadiliko ya Tabianchi (COP31), katika kikao cha pembezoni cha Benki ya CRDB kilichokuwa na kaulimbiu ya "Dira 2050: Financing Tanzania's Resilient, Green and Inclusive Future.

Akizungumza baada ya kushuhudia utiaji Saini huo, Waziri wa Nchi, Ofisi ya Makamu wa Rais (Muungano na Mazingira), Mhe. Mhandisi. Hamad Yussuf Masauni, ameipongeza NCMC na Benki ya CRDB kwa kuanzisha ushirikiano unaolenga kukuza soko la biashara ya kaboni na kuongeza fursa za uwekezaji katika uchumi wa Kijani.

Mhe. Masauni ameipongeza Benki ya CRDB kwa kuunga mkono juhudi za serikali katika kukabiliana na mabadiliko ya tabia nchi ambapo amesisitiza makubaliano hayo yanaimarisha ushirikiano wa serikali na sekta binafsi katika kuimarisha soko la biashara ya kaboni nchini.

Akiongea awali, Katibu Mkuu wa Ofisi ya Makamu wa Rais Muungano na Mazingira, Dkt. Richard Muyungi amefafanua kuwa ushirikiano huo utawezesha utekelezaji wa Dira ya 20250 ambapo sekta ya biashara ya kaboni inaweza kuwa miongoni mwa nyenzo za kuvutia uwekezaji na kuchochea shughuli za uzalishaji.

Kwa upande wake, Mkurugenzi Mtendaji wa NCMC, Bi. Ngenda Kathryn Kigaraba, amesema hatua ya ushirikiano huo katika maendeleo ya soko la Biashara ya kaboni nchini utawezesha miradi ya kaboni kupata mitaji kutoka ndani ya nchi.

Naye Afsa Mtendaji Mkuu wa Benki ya CRDB Dkt. Abdulmajid Mussa Nsekela ameeleza kuwa ushirikiano huo utafungua fursa za uwekezaji, kuvutia mitaji na kuwezesha miradi ya kaboni yenye manufaaa kwa uchumi na jamii.






Read more »
Older Posts
Subscribe to: Posts (Atom)

Top News