Habari Za Hivi Punde Habari Za Hivi Punde
Soma zaidi

at Friday, October 30, 2026 0

Mwenyekiti wa Bodi ya Wakurugenzi Mamlaka ya Hifadhi ya Ngorongoro, Mkuu wa Majeshi Mstaafu Jenerali Venance Mabeyo amekabidhiwa rasmi tuzo ya kimataifa ya Uhifadhi na Utalii endelevu ambayo eneo la hifadhi ya Ngorongoro limepokea hivi karibuni nchini Ghana.

Akikabidhi tuzo hiyo mbele ya wakurugenzi wa bodi Kamishna wa Uhifadhi Ngorongoro Abdul-Razaq Badru amesema tuzo hiyo imetolewa na Africa Business Forum and Awards kutokana na utafiti uliofanyika na kubaini kuwa Hifadhi ya Ngorongoro inafanya vizuri katika shughuli za uhifadhi na utalii endelevu kwenye eneo lake.

Katika salaam zake Jenerali Mabeyo ameipongeza menejimenti ya Mamlaka ya Hifadhi ya Ngorongoro kwa kufanikiwa kutwaa tuzo hiyo ambayo ni matokeo chanya ya usimamizi wa Uhifadhi, utalii na maendeleo ya jamii.

Eneo la Hifadhi ya Ngorongoro limekuwa kivutio kikubwa katika uhifadhi na utalii wa wanyamapori , malikale na urthi wa utamadunu na kuwa kimbilio la watalii kutoka kila pembe ya Dunia. 





Read more »

at Friday, October 30, 2026 0


 Na Said Mwishehe,Michuzi TV

MAMLAKA ya Udhibiti wa Ununuzi wa Umma (PPRA) imesema zabuni 430,643 zenye thamani ya Sh.trilioni 42.6 zimetolewa kupitia Mfumo wa Ununuzi wa Umma kwa Njia ya Kielektroniki (NeST).

Hayo yamesemwa leo Oktoba 29,2026 na Mkurugenzi Mkuu wa PPRA, Dennis Simba, alipokuwa akizungumza na wahariri wa vyombo vya habari kuhusu mafanikio ya mfumo huo ulioanza kutumika rasmi Septemba 2023 kusimamia na kurahisisha michakato ya ununuzi wa umma nchini.

Amesema asilimia 70 ya bajeti yote ya Serikali hutumika kupitia ununuzi wa umma, hivyo matumizi sahihi ya mfumo huo yana umuhimu mkubwa katika kuhakikisha fedha zinazotengwa kwa miradi na huduma za umma zinatumika kwa ufanisi na kuleta thamani halisi kwa fedha.

Amefafanua matumizi ya NeST yamechangia kuongezeka kwa uzingatiaji wa sheria za ununuzi wa umma kutoka asilimia 65 mwaka wa fedha 2023/24 hadi asilimia 76 mwaka 2024/25, kabla ya kufikia asilimia 79 mwaka 2025/26.

Simba amesema mfumo huo pia umewezesha kuzuia uchapishaji wa zaidi ya kurasa milioni 288.57 za nyaraka za zabuni, hatua iliyosaidia kuokoa takribani Shilingi bilioni 27.64 pamoja na kupunguza gharama na muda wa wazabuni kushiriki zabuni kwa kuondoa ulazima wa kusafiri kuwasilisha nyaraka katika taasisi husika.

Akizungumza kuhusu kuimarisha usalama wa michakato hiyo, amesema NeST sasa imeunganishwa na mifumo zaidi ya 30, ikiwemo ya benki, malipo, hifadhi za jamii na leseni.”Hatua hiyo imesaidia kurahisisha uhakiki wa nyaraka na kupunguza uwezekano wa matumizi ya nyaraka za kughushi.”

Pia mfumo huo umeunganishwa na Benki ya NMB kwa ajili ya uhakiki wa dhamana za zabuni, huku benki za TCB na CRDB zikiwa katika hatua za mwisho za kuunganishwa. Kupitia Bank Security Portal iliyoanza kutumika Oktoba Mosi mwaka huu, zaidi ya benki 36 zimeunganishwa ili kuwezesha utoaji na uhakiki wa dhamana hizo.

Katika kukuza ushiriki wa wazawa, Mkuu Mkuu huyo wa PPRA amesema Sheria ya Ununuzi wa Umma inaweka upendeleo kwa wazabuni wa ndani, ambapo zabuni zenye thamani isiyozidi Sh.bilioni 50 zimetengwa kwa wazawa pekee. 

“Wazabuni wa ndani wanaweza kupata upendeleo wa hadi asilimia 10 katika zabuni zinazohusisha ushindani wa kimataifa, huku bidhaa za ndani zikipata upendeleo wa hadi asilimia 15 dhidi ya bidhaa kutoka nje.”

Ameongeza sheria hiyo pia inaelekeza taasisi za umma kutenga asilimia 30 ya bajeti zao za ununuzi kwa makundi maalumu, yakiwemo vijana, wanawake, wazee na watu wenye ulemavu, ili kuongeza ushiriki wao katika fursa za kiuchumi zinazotokana na matumizi ya fedha za umma.

Akieleza zaidi Simba amesema hadi sasa makundi maalumu 33,659 yamesajiliwa kwenye NeST, yakiwemo vikundi vya vijana 16,133, wanawake 16,070, wazee 767 na watu wenye ulemavu 689. “Makundi hayo yamepata zabuni zenye thamani ya jumla ya Shilingi bilioni 82.34 kupitia mfumo huo,” alisema Simba

Ameongeza vijana wamepata zabuni zenye thamani ya Shilingi bilioni 44.74, wanawake Shilingi bilioni 33.15, wazee Shilingi bilioni 3.78 na watu wenye ulemavu Shilingi milioni 680.21. 

“PPRA inalenga kuongeza idadi ya makundi maalumu yaliyo tayari kushiriki zabuni hadi 300,000, kwa kuzingatia malengo ya Dira ya Taifa ya Maendeleo 2050,” amesema Simba na kuongeza vikundi hivyo vinaweza kupata zabuni moja yenye thamani ya hadi Sh.milioni 500.

Amefafanua  mpango huo unalenga kupanua fursa za kazi na ajira kwa Watanzania wasiokuwa na uwezo wa kuanzisha kampuni binafsi huku akieleza katika kurahisisha upatikanaji wa fursa hizo, PPRA imeanzisha programu ya simu ya NeST Tenderer inayopatikana kupitia Play Store na App Store.

“Mtumiaji anaweza kujisajili kwenye mfumo, kuomba zabuni na kufuatilia malipo yake kupitia simu janja bila kulazimika kufika ofisini.NeST imeendelea kutambuliwa kimataifa.

“Tumepata tuzo ya mfumo bora wa ununuzi wa umma barani Afrika mwaka 2024 na kutambuliwa mwaka huu miongoni mwa mifumo 20 bora ya Serikali mtandao duniani katika tuzo za WSIS. Pia, Septemba 21, 2026, ilichaguliwa miongoni mwa mifumo 15 bora ya Serikali ya kidijitali duniani katika tuzo za Digital@UNGA2026.”

Mwisho







Read more »

at Friday, October 30, 2026 0


 BENKI Kuu ya Tanzania (BOT), kupitia chuo chake kilichopo Mwanza, imeingia makubaliano ya miaka mitano na Chama cha Wafanyakazi Wakusanya Mapato Tanzania (TAREWU) kwa ajili ya kutoa elimu ya fedha na uwekezaji kwa wanachama zaidi ya 7,000 wa chama hicho kote nchini.

Makubaliano hayo yanalenga kuwawezesha wanachama kusimamia vizuri mapato na vipato vyao, kutunza fedha, kufanya maamuzi ya uwekezaji yanayotokana na taarifa sahihi na kutumia fursa za uwekezaji kuongeza thamani ya mitaji yao.

Akizungumza baada ya kusainiwa kwa makubaliano hayo, Gavana wa BOT, Emmanuel Tutuba, alisema ushirikiano huo utawezesha Chuo cha Benki Kuu ya Tanzania kilichopo Mwanza kutoa mafunzo ya elimu ya fedha kwa watumishi wa Mamlaka ya Mapato Tanzania (TRA).

Alisema chuo hicho kina wataalamu wenye ujuzi katika masuala ya elimu ya fedha na kitatoa mafunzo kulingana na utaratibu utakaowekwa kwa kushirikiana na TAREWU.


Tutuba alisema wataalamu wa chuo hicho watakuwa tayari kuwafuata watumishi katika maeneo yao ya kazi au sehemu watakazokutana kwa ajili ya mafunzo, ili kuhakikisha wanapata maarifa yatakayowasaidia kuboresha usimamizi wa fedha zao.

Alisema kupata kipato kikubwa pekee hakumaanishi kuwa mtu atakuwa na maisha bora ikiwa hana elimu ya kukitunza na kukitumia kwa tija.

“Lengo zaidi ni kuhakikisha kwamba kila Mtanzania ananufaika na elimu ya fedha, na kwa namna tulivyojipanga kupitia Chuo cha BOT hapa Mwanza ni kwamba elimu hii itawafikia watu mbalimbali,” alisema.

Aliongeza kuwa ushirikiano huo ni sehemu ya juhudi za kueneza elimu ya fedha kwa makundi mbalimbali ya jamii, huku akieleza kuwa mikataba inayosainiwa na wadau wa ndani na nje inaonesha imani waliyonayo kwa BOT na chuo chake kutokana na uwezo wake wa kutoa mafunzo katika eneo hilo.

Kwa upande wake, Katibu Mkuu wa TAREWU, Dk.Michael Marere, alisema makubaliano hayo yanaendana na Mpango Mkakati wa pili wa chama hicho wa mwaka 2026 hadi 2030, unaolenga kuhakikisha wanachama wote wanapata elimu ya fedha bila kumuacha mtu nyuma.


Marere alisema moja ya changamoto wanazotaka kuzitatua kupitia ushirikiano huo ni namna wanachama wanavyoweza kutumia mapato na vipato vyao kuanzisha uwekezaji unaozalisha na kukuza mitaji yao.


Alisema chama hicho kinaamini kipato kinachopatikana kutokana na jasho la mfanyakazi ni kama mbegu inayopaswa kuwekezwa katika eneo sahihi ili kuleta matokeo yanayotarajiwa.


“Katika kuhakikisha wanachama wetu wanapanda mbegu hiyo sehemu sahihi, tumeona ni muhimu tuungane na BOT kupitia chuo chao hiki kuhakikisha kwamba wanachama wetu wanaweka kipato chao sehemu stahiki na wanapata rejesho stahiki kwa uwekezaji wao,” alisema.


Alieleza kuwa licha ya wanachama hao kufanya kazi katika sekta ya ukusanyaji wa mapato, bado wanahitaji elimu itakayowawezesha kuwa na nidhamu ya fedha katika maisha yao binafsi, ikiwamo kujua namna ya kupata, kutunza na kuwekeza fedha.


Marere alisema kupitia makubaliano hayo, wanachama zaidi ya 7,000 watapata fursa ya kujifunza namna ya kufanya maamuzi sahihi ya kifedha kwa kutumia taarifa zinazotegemewa, badala ya kuhatarisha fedha walizozipata kwa juhudi zao katika uwekezaji usio na uelewa wa kutosha.

Alisema mafunzo hayo pia yatawasaidia kutambua maeneo yanayofaa kwa uwekezaji, kuongeza thamani ya fedha zao na kuelewa fursa zinazopatikana katika masoko ya mitaji na maeneo mengine ya kiuchumi.

Akizungumzia mchango wa uwekezaji katika maendeleo ya taifa, Marere alisema TAREWU inatambua kuwa kufikiwa kwa Dira ya Maendeleo ya Taifa ya mwaka 2050, inayolenga kujenga uchumi wa dola trilioni moja, kunahitaji mchango wa Serikali pamoja na wananchi kupitia shughuli mbalimbali za kiuchumi na uwekezaji.

Alisema watumishi wanaofanya kazi katika sekta ya mapato nao ni sehemu ya wachangiaji wa pato la Serikali, hivyo wanapaswa kuwa na uwezo wa kusimamia vizuri vipato vyao na kutumia fursa za uwekezaji kwa manufaa yao na taifa.

Aliongeza kuwa manufaa ya elimu hiyo yataenea zaidi ya wanachama wenyewe, kwa kuwa wana familia, wenza na wategemezi ambao pia watanufaika na mabadiliko ya namna wanavyosimamia fedha zao.

Marere alisema kupitia elimu hiyo, chama kinatarajia kuwawezesha wanachama kuboresha maisha yao, kuimarisha ustawi wa familia zao na kuchangia maendeleo ya jamii kwa ujumla.


Katibu Mkuu wa Chama cha Wafanyakazi Wakusanya Mapato Tanzania (TAREWU), Dk. Michael Marere (kushoto) na  Mkuu wa Chuo cha BoT Mwanza, Dk. Nicas Yabu (kulia), wakitiliana saini hati ya makubaliano (MoU), makubaliano onyesha nyaraka jijini Mwanza jana, baada ya kusaini ambapo chuo hicho kitawajengea uwezo wanachama wa chama hicho katika elimu ya fedha na ustawi wa kifedha.

Read more »

at Friday, October 30, 2026 0
Rais wa Jamhuri ya Muungano wa Tanzania, Dkt. Samia Suluhu Hassan, akiwa ameambatana na mgeni wake, Rais wa Jamhuri ya Angola, João Manuel Gonçalves Lourenço, wameanza safari ya kuelekea jijini Dodoma kwa kutumia treni ya SGR.

Viongozi hao wameondoka katika Stesheni ya Magufuli jijini Dar es Salaam, kuelekea Dodoma kushiriki hafla ya uzinduzi wa Mji wa Serikali Mtumba pamoja na barabara za lami, leo Oktoba 30, 2026.



Mheshimiwa Dkt. Samia Suluhu Hassan, Rais wa Jamhuri ya Muungano wa Tanzania, pamoja na mgeni wake Mhe. João Manuel Conçalves Lourenço, Rais wa Jamhuri ya Angola wakiwa katika Stesheni ya Magufuli tayari kwa safari ya kuelekea Jijini Dodoma kwa ajili ya uzinduzi wa Mji wa Serikali Mtumba pamoja na barabara za lami, tarehe 30 Oktoba, 2026.





Mheshimiwa Dkt. Samia Suluhu Hassan, Rais wa Jamhuri ya Muungano wa Tanzania, akiwa ndani ya Treni ya SGR pamoja na mgeni wake Mhe. João Manuel Conçalves Lourenço, Rais wa Jamhuri ya Angola Treni ya SGR wakati wakielekea Jijini Dodoma kwa ajili ya uzinduzi wa Mji wa Serikali Mtumba pamoja na barabara za lami, tarehe 30



Read more »

at Friday, October 30, 2026 0

📌 Mfumo huo unatumia Akili Mnemba kurahisisha upatikanaji wa takwimu na kumbukumbu

📌 Asema Dira  2050 inatoa malengo ya kurasimisha ajira zisizo rasmi kuwa rasmi hususani kwa vijana.

Naibu Waziri wa Wizara ya Viwanda na Biashara, Mhe. Dennis Lazaro Londo (Mb), amezindua rasmi mfumo wa ajira kidijitali wa ujulikanao kama AMLine Workers Portal unaotumia teknolojia ya Akili Mnemba (Artificial Intelligence – AI) kuunganisha watu wanaotafuta ajira na waajiri.

Mhe.Londo amesema,Teknolojia hii  ni sehemu ya juhudi za kutumia teknolojia kurahisisha upatikanaji wa fursa za ajira nchini kwa kampuni ya AMLine unaolenga  kuwaunganisha watafuta kazi na waajiri kupitia jukwaa moja la kidijitali, ambapo wanaotafuta ajira wanaweza kusajili taarifa zao za kitaaluma, ujuzi na uzoefu, huku waajiri wakitumia mfumo huo kutafuta wafanyakazi wenye sifa zinazokidhi mahitaji yao.

Kupitia mfumo huo, mwajiri anaweza kusimamia mahudhurio ya wafanyakazi, upangaji wa kazi na malipo, pamoja na taarifa zinazohusu michango ya kisheria. 

Aliongeza kuwa  mfumo huo unalenga kupunguza muda na gharama za kuajiri, kurahisisha usimamizi wa wafanyakazi na kuongeza uwazi katika taratibu za ajira.

Aidha, mfumo huo unalenga kusaidia kurasimisha ajira zisizo rasmi, ikiwemo kazi za muda, kwa kuwezesha utunzaji wa kumbukumbu za kazi na taarifa za wafanyakazi na pia unalenga kuboresha upatikanaji wa takwimu za nguvu kazi zinazoweza kusaidia katika upangaji wa mipango ya maendeleo na kurahisisha usimamizi wa masuala ya ajira

Uzinduzi wa mfumo huu unaonesha nafasi ya teknolojia katika kuunganisha nguvu kazi na mahitaji ya soko la ajira, sambamba na Dira 2050 na  ushirikiano kati ya Serikali na sekta binafsi ukiwa muhimu katika kupanua fursa za kiuchumi kwa Watanzania, hususan vijana wanaoingia katika soko la ajira. 








Read more »

at Friday, October 30, 2026 0
MSTAHIKI Meya Manispaa ya Kibaha Dkt Nicas Mawazo amekielekeza kiwanda cha A-One kilichopo Kata ya Visiga kuacha kutirirsha majitaka kwenye maeneo ya makazi ya watu ambapo yanaenda kusababisha athari za kiafya kwa binadamu na viumbe hai na kuwapatia siku 14 kujenga mfumo wa uchakataji maji taka.

Kiwanda hicho kinajishughulisha na ununuaji wa chupa za plastiki na kuzichakata kisha Kupata malighafi mpya, ambapo Malighafi hiyo inaweza kutumika kutengeneza bidhaa nyingine za plastiki au kuuzwa kwa viwanda vinavyohitaji malighafi hiyo.

Mstahiki Meya Dkt Nicas ametoa maelekezo kwa kiwanda hicho kuwa hawaruhusiwi kutiririsha maji taka bila kibali kutoka kwa Bonde la Wami Ruvu na hata baada ya kupatiwa kibali ni lazima maji hayo yawe yametibiwa ili yasiwe na athari kwa wananchi wa maeneo ya karibu.

Dkt Nicas amesema, Manispaa ya Kibaha ipo makini katika kuhakikisha afya za wananchi wake zinakuwa salama, kutiririsha maji haya kwenye mazingira ya wakazi sio salama na hivyo anawapatia siku 14 kuweza kujenga mfumo sahihi wa kuchakata maji taka na wafuatilie kibali ili waruhusiwe kutiririsha maji ambayo tayari washayatibu na hayatakuwa na madhara kwa wananchi.

Afisa Mazingira Manispaa ya Kibaha, Byson Mpogoza amesema kiwanda cha A-One wamekuwa wanawapa maelekezo zaidi ya mara mbili ila wamekuwa ni watu wasiofuata maelekezo hayo na Mstahiki Meya ameagiza kiwanda hiki waandikiwe ilani na pia amewapatia wiki mbili za kurekebisha makosa yao kabla ua kuwachukulia hatua zinazostahiki.

Mstahiki Meya Dkt Nicas ameendelea na ziara zake za kukagua viwanda ndani ya Manispaa ya Kibaha ambavyo amepokea malalamiko kutoka kwa wananchi wa maeneo hayo.
Read more »

at Friday, October 30, 2026 0









Na Karama Kenyunko, Michuzi TV
NCHI nne zinazopakana na Ziwa Tanganyika zimetakiwa kuimarisha ufadhili, udhibiti wa mafuriko na uhifadhi wa samaki ili kulinda ziwa hilo na jamii zinazotegemea rasilimali zake kwa maisha na shughuli za kiuchumi.

Mwenyekiti wa kikao cha maandalizi ya Mkutano wa Mawaziri wa Mamlaka ya Ziwa Tanganyika (LTA), Dkt. Douty Chibamba, ametoa wito huo leo Oktoba 29, 2026, jijini Dar es Salaam wakati wa ufunguzi wa maandalizi ya Mkutano wa 14 wa Kawaida wa Mawaziri wa mamlaka hiyo.

Dkt. Chibamba amesema upatikanaji wa fedha za kutosha na za uhakika, pamoja na maamuzi yanayozingatia ushahidi wa kisayansi, ni muhimu katika kutekeleza makubaliano ya kikanda na kufikia malengo yaliyowekwa.

Amewataka wajumbe kuandaa mapendekezo mahususi kuhusu mpango kazi na bajeti ya mwaka 2027, akisisitiza kuwa Burundi, Jamhuri ya Kidemokrasia ya Congo (DRC), Tanzania na Zambia zinapaswa kuhakikisha vipaumbele vyao vinaendana na upatikanaji wa fedha na watumishi wenye sifa stahiki.

“Vipaumbele vyetu lazima viambatane na ufadhili wa kutosha na wa uhakika, ikiwemo kutimiza kwa wakati wajibu wa kifedha wa nchi wanachama,” amesema.

Akizungumzia udhibiti wa mafuriko, Dkt. Chibamba ametaja pendekezo la kuondoa tope na mchanga katika Mto Luga na kufanya upembuzi yakinifu kuhusu uwezekano wa kujenga bwawa la kudhibiti viwango vya maji katika Ziwa Tanganyika.

Amesema mapendekezo hayo yanahitaji tathmini za kina za kisayansi na kiufundi ili kubaini uwezekano wa kuyatekeleza na athari zake kwa jamii, miundombinu na mazingira.

Kuhusu uvuvi, amehimiza kufanyika kwa tafiti za kisayansi zitakazobaini hali ya akiba ya samaki na kusaidia kuweka mikakati ya uhifadhi na matumizi endelevu ya rasilimali hiyo.

Aidha, amewataka wajumbe kuchambua ripoti ya mwaka ya mamlaka hiyo, kubaini mapungufu ya kiutendaji na kupendekeza hatua za kuimarisha uwajibikaji, uratibu na utendaji, huku nchi wanachama zikishughulikia changamoto za uhaba wa fedha na watumishi.

Kwa upande wake, Naibu Waziri wa Nchi, Ofisi ya Makamu wa Rais (Muungano na Mazingira), Dkt. Reuben Kwagilwa, amesema ushirikiano wa Burundi, DRC, Tanzania na Zambia ni muhimu katika kusimamia rasilimali za ziwa na kulinda mazingira kwa manufaa ya jamii zinazozitegemea.

Amesema wajumbe wanatarajiwa kuwasilisha mapendekezo kuhusu sera, masuala ya kiufundi, uimarishaji wa taasisi na ufadhili ili yazingatiwe na mawaziri katika mkutano huo.

Mkutano huo umewakutanisha maafisa wa serikali, wataalamu na washirika wa maendeleo kutoka nchi hizo nne zinazopakana na Ziwa Tanganyika.
Read more »

at Thursday, October 29, 2026 0
Mwamvua Mwinyi, Kibaha

WANANCHI wa Miswe kata ya Mbwawa, Mailmoja ,Manispaa ya Kibaha mkoani Pwani, wamenufaika na huduma za msaada wa kisheria kupitia kampeni ya Samia Legal Aid Awamu ya Pili, kuhusu haki za wananchi, masuala ya ndoa na familia, matunzo ya watoto pamoja na ukatili wa kijinsia.

Huduma hizo zimetolewa oktoba 29,2026 ambapo wananchi wamepata fursa ya kuwasilisha changamoto zinazowakabili na kupata ufafanuzi wa masuala mbalimbali ya kisheria, huku watoa huduma wakikutana na Baraza la Usuluhishi wa Masuala ya Ndoa la kata kwa ajili ya kujadili changamoto za ndoa na familia.

Akizungumzia masuala ya ndoa, Mkurugenzi wa Kibaha Paralegal Centre, Catherine Mlenga, amewataka vijana na watu wanaotarajia kufunga ndoa kufikiria kwa kina kabla ya kufanya uamuzi huo, akieleza kuwa migogoro ya kifamilia na kuvunjika kwa ndoa vinaweza kuathiri malezi ya watoto na kuchangia baadhi yao kuishi mitaani.

Mlenga amesema kituo hicho kimekuwa kikipokea changamoto nyingi zinazohusu ndoa na familia, zikiwemo migogoro ya talaka, kutelekezwa kwa watoto, migogoro ya mirathi na wanawake kunyimwa haki zao, hali inayodhihirisha umuhimu wa wananchi kupata elimu ya kisheria ili waweze kutambua na kudai haki zao kwa njia zinazostahili.

Ameeleza kuwa, pamoja na kutoa msaada wa kisheria na kusaidia usuluhishi wa migogoro katika jamii, kituo hicho kinakabiliwa na changamoto ya ukosefu wa fedha za kuendesha shughuli zake, hivyo kuiomba Serikali kutimiza ahadi za kutoa fedha na ofisi kwa vituo vya msaada wa kisheria ili viweze kutekeleza majukumu yake kwa ufanisi.

Sambamba na huduma hizo kwa wananchi, timu ya watoa huduma wa Samia Legal Aid imetembelea Shule ya Sekondari Mbwawa na Shule ya Msingi Miswe, ambako wanafunzi wamepatiwa elimu kuhusu kujitambua, kufahamu haki zao, kujikinga na ukatili wa kijinsia na umuhimu wa kutoa taarifa kwa walimu, wazazi, walezi au mamlaka husika wanapokumbana na vitendo hivyo.







Read more »

at Thursday, October 29, 2026 0



Matukio tofauti ya picha Mhe Dkt.Samia Suluhu Hassan alipompokea Mgeni wake, Rais wa Jamhuri ya Angola, Mhe. João Manuel Gonçalves Lourenço alipowasili Ikulu ya Dar es salaam kwa Ziara ya Kitaifa Leo October 29,2026.

Fuatilia mitandao yetu ya kijamii
Instagram: @mamakajatz
Twitter @mamakajatz
Facebook: Mamakajatz
YouTube: Mama kaja tz
#Mamakaja #kazinaututunasongambele

Read more »
Older Posts
Subscribe to: Posts (Atom)

Top News