Habari Za Hivi Punde Habari Za Hivi Punde
Soma zaidi

at Thursday, November 12, 2026 0


MAKAMU  wa Rais wa Jamhuri ya Muungano wa Tanzania, Mheshimiwa Deogratius Ndejembi, ameanza ziara ya kikazi mkoani Mtwara tarehe 12 Novemba 2026, ambapo amekagua miradi mbalimbali na kuzungumza na wananchi wa Wilaya za Masasi, Newala na Halmashauri ya Wilaya ya Tandahimba kuhusu masuala mbalimbali ya maendeleo, ikiwemo Sekta ya Kilimo.

Katika mikutano hiyo ya hadhara, Makamu wa Rais amewahimiza wakulima wa zao la Korosho kuongeza uzalishaji ili kuinua kipato cha mkulima mmoja mmoja, kukuza uchumi wa mkoa wa Mtwara na kuongeza mchango wa zao hilo katika maendeleo ya uchumi wa Taifa.

Aidha, Mhe. Ndejembi amesema kuwa Serikali inatambua changamoto zilizojitokeza katika upatikanaji na matumizi ya viuatilifu vya Korosho (sulfur) msimu uliopita. Kutokana na hali hiyo, ameiagiza Wizara ya Kilimo kufanya tathmini na uchunguzi wa kina kubaini iwapo viuatilifu vilivyotumika vilikuwa vimechakachuliwa au havikuwa na ufanisi uliotarajiwa.

Amesisitiza kuwa endapo itabainika kuwa viuatilifu vya maji havina ufanisi unaohitajika, Wizara ichukue hatua stahiki, ikiwemo kuangalia uwezekano wa kurejesha matumizi ya viuatilifu vya unga ili kuhakikisha wakulima wanapata huduma bora ya kudhibiti visumbufu vya zao la Korosho na kulinda uzalishaji wake.

Kwa upande wake, Waziri wa Kilimo Mhe. Daniel Chongolo (Mb) amesema kuwa tayari timu ya wataalamu imeundwa kufanya tathmini ya kiuatilifu aina ya ‘sulfur’ ili kubaini iwapo sulfur ya unga au maji ndiyo inayofaa zaidi kutumika katika msimu ujao wa uzalishaji wa zao la Korosho.

Aidha, amewapongeza wakulima wa Tandahimba na Newala kupitia Chama chao cha TANECU kwa kufanikisha mauzo ya zaidi ya tani 70,000 za Korosho tangu kuanza kwa msimu wa minada wa Mwaka 2026/2027.







Read more »

at Thursday, November 12, 2026 0


Na Mwandishi Wetu

KATIBU Mkuu wa Wizara ya Viwanda na Biashara Balozi Waziri Rajab Salum, ameielekeza Wakala wa Usajili wa Biashara na Leseni (BRELA), kuimarisha usimamizi wa utoaji wa Leseni za biashara kundi A ili kulinda fursa za kiuchumi zilizotengwa kwa Watanzania.

Hayo ameyazungumza leo Novemba 12,2026 jijini Dar es Salaam alipofanya ziara katika ofisi ya BRELA kwa lengo la kuzungumza na Menejimenti na Watumishi wa taasisi hiyo.

“Naielekeza BRELA, kuhakikisha wageni hawapati Leseni za biashara kundi A ambazo kwa mujibu wa katazo la Serikali Na.487A la mwaka 2025 kuhusu biashara zilizopigwa marufuku kufanywa na wasio raia wa Tanzania na kwa Leseni zilizotolewa awali kabla ya katazo hilo pindi zitakapo kwisha muda wake hampaswi kuzihuisha tena”, amesema.

Aidha Balozi Salum amewataka vijana wabunifu wenye mawazo na bidhaa bunifu wanazipa ulinzi wa Miliki Ubunifu sambamba na kuwahamasisha wafanyabiashara wadogo kusajili biashara zao.

Na kuongeza kuwa, kampuni zenye changamoto hasa zenye migogoro ya hisa zinapaswa kutembelea ofisi za BRELA ili kusaidiwa na kupata suluhu ya changamoto zao.

Sambamba na hilo, ameielekeza BRELA kuandaa kliniki maalumu ya kuwahudumia wasanii ili kuwapa huduma ya kusajili na kulinda bunifu zao ili waweze kunufaika, na kuepusha kuibiwa bunifu hizo zitakazopelekea kuwa na migogoro.

Kwa upande wake Ofisa Mtendaji Mkuu wa BRELA Bw.Godfrey Nyaisa, amemueleza Katibu Mkuu Mhe.Balozi Salum kuwa, Katika kipindi cha robo ya kwanza ya mwaka wa fedha 2026/2027 BRELA imeendelea kuwezesha utoaji wa huduma mbalimbali kwa wananchi na wadau wa biashara.

Katika kipindi hicho, BRELA imesajili Kampuni 5,811 sawa na asilimia 96, Majina ya biashara 11,044 sawa na asilimia 109, Leseni za Biashara kundi A 8,171 zimetolewa sawa na asilimia 69, vyeti vya usajili wa viwanda tisa (9) sawa na asilimia 47, pamoja na Leseni za Viwanda 283 sawa na asilimia 163 zimetolewa.

Aidha, Wakala amesajili Alama za Biashara na Huduma 1,075 sawa na asilimia 96, huku maombi ya Hataza yakiwa ni 95 sawa na asilimia 396 yamepokelewa. Mafanikio haya yanaonesha juhudi za BRELA katika kuimarisha utoaji wa huduma na kuwezesha ukuaji wa biashara na uwekezaji nchini.” Alisema Nyaisa.

Ziara ya Katibu Mkuu Viwanda na Biashara katika ofisi za BRELA imelenga kujionea shughuli na huduma zinazotolewa na BRELA na kutathmini utekelezaji wa majukumu yake. 



Read more »

at Thursday, November 12, 2026 0


Waziri wa Fedha, Mhe. Balozi Khamis Mussa Omar (Mb), akiwa na Mkurugenzi Mtendaji wa Benki ya Exim ya Uturuki, Bw. Ali Guney baada ya kufanya kikao kuhusu maendeleo ya ujenzi wa mradi wa kimkakati wa Reli ya SGR, kando ya Mkutano wa 31 wa Nchi Wanachama wa Mkataba wa Umoja wa Mataifa kuhusu Mabadiliko ya Tabianchi COP31, Jijini Antalya nchini Uturuki.

Waziri wa Fedha, Mhe. Balozi Khamis Mussa Omar (Mb) (wa nne kushoto), akiwa katika picha ya pamoja na Mkurugenzi Mtendaji wa Benki ya Exim ya Uturuki, Bw. Ali Guney (wa nne kutoka kulia) pamoja na ujumbe wa pande mbili (Tanzania na Exim Bank ya Uturuki), baada ya kufanya kikao kuhusu maendeleo ya ujenzi wa mradi wa kimkakati wa Reli ya SGR, kando ya Mkutano wa 31 wa Nchi Wanachama wa Mkataba wa Umoja wa Mataifa kuhusu Mabadiliko ya Tabianchi COP31, Jijini Antalya nchini Uturuki. Baadhi yao katika picha ni Naibu Katibu Mkuu Wizara ya Fedha, Bi. Asha Khamis Abdulla (wa tatu kushoto) na Kamishna wa Idara ya Fedha za Nje, Wizara ya Fedha, Bw. Rished Bade (wa pili kushoto).


(Picha na Kitengo cha Mawasiliano Serikalini-WF-Uturuki)


*****************


Na Benny Mwaipaja, Antalya-Uturuki


Serikali ya Tanzania iko katika hatua za mwisho za mazungumzo na Benki ya Exim ya Uturuki ili kupata ufadhili wa dola za Marekani milioni 280 kwa ajili ya kukamilisha ujenzi wa kipande cha tatu na cha nne cha mradi wa reli ya kisasa (SGR).


Mazungumzo hayo yamefanyika Jijini Antalya nchini Uturuki, kando ya Mkutano wa 31 wa Nchi Wanachama wa Mkataba wa Umoja wa Mataifa kuhusu Mabadiliko ya Tabianchi COP31, kati ya ujumbe wa Tanzania ukiogozwa na Waziri wa Fedha, Mhe. Balozi Khamis Mussa Omar na Ujumbe wa Benki ya Exim ya Uturuki ukiongozwa na Mkurugenzi Mtendaji wake, Bw. Ali Guney.


Mhe. Balozi Omar alisema kuwa ujenzi wa mradi huo wa kimkakati wa SGR kipande cha tatu na nne wenye urefu wa zaidi ya kilometa 700, una thamani ya dola za Marekani bilioni 1.6 ambapo kiasi cha dola bilioni 1.32 kimeshapatikana, na kiasi cha dola milioni 280 ndicho kinachosubiriwa ili kukamilisha bajeti hiyo.


“SGR Ni mradi mkubwa wa miundombinu unaochukua zaidi ya kilomita 2,000, unaolenga kuunganisha jiji la bandari la Dar es Salaam kwenye pwani ya mashariki na mikoa ya magharibi ya Mwanza na Kigoma hadi nchi jirani, ikiwemo Rwanda, Uganda, Burundi na Jamhuri ya Kidemokrasia ya Kongo” alisema Mhe. Balozi Omar


Alisema kuwa Mradi huo umegawanywa katika sehemu sita tofauti, zinazojulikana kama loti ambapo loti mbili za kwanza, zinazounganisha Dar es Salaam na Mji Mkuu wa Serikali, Dodoma, tayari zimekamilika na zinafanya kazi na kupokelewa vizuri na umma.


Mhe. Balozi Omar aliongeza kuwa, tofauti na miradi mingi ya reli ya kikanda inayotegemea dizeli, reli ya Tanzania (SGR) inatumia umeme, hatua inayoendana na ajenda ya Mkutano wa COP 31 unaofanyika Antalya-Uturuki, unaohimiza matumizi ya nishati safi ili kutunza mazingira na kuufanya mradi huo kuwa kielelezo endelevu cha usafiri wa kikanda.


Kwa Upande wake, Mkurugenzi Mtendaji wa Benki ya Exim ya Uturuki, Bw. Ali Guney, amesema kuwa Benki yake inathamini ujenzi wa mradi huo kwa maendeleo ya Tanzania na nchi jirani na kwamba Bodi ya Wakurugenzi ya Benki hiyo itakutana mwezi huu kujadili maombi ya ufadhili huo unaohitajika ili kukamilisha ujenzi wa Reli hiyo ya kisasa.


Bw. Guney alisema kuwa licha ya ujenzi wa Reli, Benki yake inaangalia pia maeneo mengine ya ushirikiano kati ya Tanzania na Uturuki katika nyanja za kiuchumi na kibiashra, ufadhili wa miradi ya miundombinu ya baadaye, ikiwemo barabara na madaraja, kama sehemu ya kuimarisha zaidi uhusiano wa kiuchumi.


Hatua hiyo inaendana na malengo ya biashara kati ya nchi mbili yaliyowekwa na Mhe. Dkt. Samia Suluhu Hassan, Rais wa Jamhuri ya Muungano wa Tanzania, na Mhe. Recep Tayyip Erdogan, Rais wa Jamhuri ya Uturuki ambao wamelenga ukuaji wa biashara kati ya Mataifa hayo mwili ufikie angalau dola za Marekani bilioni moja.
Read more »

at Thursday, November 12, 2026 0

Mkuu wa Wilaya ya Kilolo, Atupele F. Mwakibete, ameahidi kushirikiana na mamlaka za barabara kutafuta ufumbuzi wa changamoto ya miundombinu ya barabara isiyopitika, huku akichangia Sh milioni moja kuunga mkono ujenzi wa zahanati katika Kijiji cha Mhanga, Kata ya Kimara.

Mwakibete ametoa ahadi hiyo Novemba 11, 2026, wakati akiendelea na ziara ya kutembelea Kata za Kimara na Dabaga, ambapo pia amefanya mikutano ya hadhara kwa lengo la kusikiliza kero za wananchi na kutafuta ufumbuzi wa changamoto zinazokwamisha maendeleo yao.

Katika ziara hiyo, ametembelea na kukagua maendeleo ya ujenzi wa Shule ya Sekondari Itonya, ambao unaendelea vizuri, huku shule hiyo ikitarajiwa kuanza kupokea wanafunzi wa Kidato cha Kwanza Januari 2027.

Akizungumza na wananchi wa Vijiji vya Kidabaga na Mhanga, Mkuu huyo wa Wilaya amesisitiza umuhimu wa kudumisha umoja, mshikamano na ushirikiano katika kutekeleza shughuli za maendeleo, sambamba na kuwataka kuacha vitendo vya uchomaji moto misitu na badala yake kulinda mazingira.

Kuhusu changamoto ya barabara, Mwakibete amesema atawasiliana na Wakala wa Barabara Tanzania (TANROADS) pamoja na Wakala wa Barabara za Vijijini na Mijini (TARURA) ili kujadili na kutafuta suluhisho la barabara zinazokuwa hazipitiki, hasa wakati wa mvua, hali inayosababisha usumbufu katika shughuli za kijamii na kiuchumi.

Katika hatua nyingine, akijibu kilio cha wananchi wa Kijiji cha Mhanga kuhusu ukosefu wa zahanati, Mwakibete ametoa Sh milioni moja kusaidia ujenzi wa zahanati inayotekelezwa na Kanisa, hatua inayolenga kuongeza kasi ya mradi huo na kusogeza huduma za afya karibu na wananchi.

Aidha, amewahimiza wananchi kujiunga na mpango wa Bima ya Afya kwa Wote unaogharimu Sh 150,000, akieleza kuwa usajili huo ni muhimu katika kuwawezesha kupata huduma za afya kwa uhakika na kupunguza changamoto za gharama za matibabu.






Read more »

at Thursday, November 12, 2026 0


Tume ya Taifa ya UNESCO (NATCOM) imesisitiza umuhimu wa kuimarisha usimamizi shirikishi wa Hifadhi ya Biosphere ya Rufiji-Mafia-Kilwa-Kibiti (RUMAKI), kwa kuzingatia uwiano kati ya uhifadhi wa bioanuwai, maendeleo endelevu ya jamii na matumizi endelevu ya rasilimali za bahari na pwani.

Hayo yameelezwa na Naibu Katibu Mtendaji wa Programu wa Tume ya Taifa ya UNESCO, Dkt. Khamis Khalid Said, wakati wa kufungua rasmi Kikao cha Kitaalamu cha Kuhakiki Rasimu ya Mpango Mkuu wa Usimamizi (GMP) wa Hifadhi ya Biosphere ya RUMAKI kilichofanyika katika Ukumbi wa TUJIWAKI, Kilwa Masoko, Wilaya ya Kilwa, Mkoa wa Lindi.


Kikao hiki kinalenga kupitia na kuboresha rasimu ya mpango huo ili kuhakikisha unazingatia changamoto zinazokabili mifumo ikolojia ya bahari na pwani, zikiwemo athari za mabadiliko ya tabianchi, uvuvi uliokithiri na uharibifu wa makazi ya viumbe vya baharini.

Mpango huo unalenga kulinda mifumo muhimu ya ikolojia, ikiwemo misitu ya mikoko, miamba ya matumbawe na maeneo ya kutagia mayai ya kasa, sambamba na kuimarisha maisha ya jamii za pwani kupitia uvuvi endelevu, utalii wa kiikolojia na ufugaji endelevu wa viumbe vya majini.



Kupitia Mpango wa UNESCO wa Binadamu na Hifadhi Hai (MAB), NATCOM inaendelea kuratibu na kusimamia juhudi za kuunganisha uhifadhi wa bioanuwai, utafiti wa kisayansi na maendeleo endelevu, kwa kuhakikisha kuwa uhifadhi wa mazingira unaenda sambamba na ustawi wa jamii na vizazi vijavyo.

Uhifadhi wa mazingira ni uwekezaji katika maisha ya sasa na mustakabali wa vizazi vijavyo.
#UNESCOTanzania #RUMAKI #MABProgramme #Biodiversity #SustainableDevelopment
Read more »

at Thursday, November 12, 2026 0
Mkuu wa Mkoa wa Dar es Salaam, Albert Chalamila, ameitaka jamii kuachana na dhana potofu kuwa Vyuo vya Elimu na Mafunzo ya Ufundi Stadi (VETA) ni kwa ajili ya wanafunzi waliofeli, akisisitiza kuwa taasisi hiyo ina heshima kubwa na ni muhimu katika kujenga ujuzi na kukuza ajira nchini.

Akizungumza leo, Novemba 12, 2026, katika mahafali ya 56 ya Chuo cha VETA Dar es Salaam, Chalamila amesema Rais Dkt. Samia Suluhu Hassan anatambua umuhimu wa elimu ya ufundi stadi, ndiyo maana amewekeza fedha nyingi katika ujenzi wa vyuo vya VETA nchini.

Amesema Tanzania ina zaidi ya vyuo 80 vya VETA, huku Dar es Salaam pekee Rais Samia akijenga vyuo vitano, kila kimoja kikigharimu Sh bilioni 1.5.

Amewataka wahitimu zaidi ya 400 waliohitimu katika chuo hicho kutumia ujuzi walioupata kujiajiri, kubuni fursa na kutafuta mitaji kupitia mikopo inayotolewa na halmashauri badala ya kusubiri ajira.

Aidha, ameahidi kukutana na uongozi wa VETA kujadili namna ya kutatua changamoto za upungufu wa vifaa vya kufundishia na miundombinu.

Kwa upande wake, Meneja wa VETA Kanda ya Dar es Salaam, Wilhard Soko, amesema uwezeshaji wa chuo hicho kwa vifaa vya kisasa, hususan katika fani ya udereva, utaongeza uwezo wake wa kujiendesha kupitia mapato yake.

Naye Mkuu wa Chuo cha VETA Dar es Salaam, Abraham Mbuguni, amesema chuo hicho kilichoanzishwa mwaka 1994 kimeendelea kutoa wahitimu wanaopata fursa za ajira na kujiajiri, licha ya kukabiliwa na changamoto za uchache na uchakavu wa magari ya mafunzo, samani, madarasa na vifaa vya kisasa.












Read more »

at Thursday, November 12, 2026 0

 

 Pembezoni mwa Mkutano wa 31 wa Nchi wanachama wa Mkataba wa Umoja wa Mataifa kuhusu Mabadiliko ya Tabianchi (COP31), unaondelea kufanyika Jijini, Antalya, Uturuki, kwa kipindi cha 9 - 20 Novemba 2026, tarehe 11 Novemba 2026, umefanyika Mkutano wa Wadau wa Sekta ya Kilimo uliolenga katika kuhamasisha ufadhili na uwekezaji wa miradi ya kukabiliana na athari za Mabadiliko ya Tabianchi kwa ajili ya kuimarisha uhimilivu wa sekta ya kilimo.

Mkutano huo uliwakutanisha wawakilishi kutoka Serikalini, taasisi za fedha, sekta binafsi na washirika wa maendeleo duniani kujadili mikakati ya kuongeza upatikanaji wa fedha za miradi ya kukabiliana na athari za Mabadiliko ya Tabianchi  katika mifumo ya chakula na kuhakikisha  wakulima hasa wanawake na vijana wananufaika na fursa za ufadhili huo.

 Akizungumza katika mkutano huo, mwakilishi kutoka Wizara ya Kilimo Bi. Zaninabu T. Sheuya, Mkurugenzi wa Kitengo cha Usimamizi wa Mazingira alisisitiza umuhimu wa ushirikiano kati ya Serikali, sekta binafsi na washirika wa maendeleo katika kuongeza uwekezaji wa kilimo himilivu na dhamira ya Serikali ya kuhakikisha fedha za Mabadiliko ya Tabianchi zinapatikana kwa wingi na kutoa kipaumbele kwa wakulima wanaoathirika moja kwa moja.

Aidha, Bi. Prudence Masako, Mkurugenzi Mkazi wa Taasisi ya CARE Tanzania alitoa wito kwa Wadau  kuendelea  kuunga mkono juhudi za Serikali ya Jamhuri ya Muungano wa Tanzania katika kuongeza uwekezaji wa miradi ya kukabiliana na athari za Mabadiliko ya Tabianchi yenye matokeo chanya ili kuimarisha usalama wa chakula, kuongeza kipato cha wakulima wadogo ili kuimarisha uchumi endelevu.

Ufadhili wa miradi ya kukabiliana na mabadiliko ya tabianchi utawezesha kuchochea utekelezaji wa vipaumbele vya Dira 2050 katika sekta ya kilimo kwa kuelekeza rasilimali katika uwekezaji  unaochangia maendeleo ya kilimo chenye tija, shindani na himilivu kwa athari za mabadiliko ya tabianchi. 





Read more »

at Thursday, November 12, 2026 0

WAZIRI MKUU Dkt. Mwigulu Nchemba amewataka wadau wa elimu wajadili namna ya kuimarisha upatikanaji wa mapato ya ndani ambayo yataboresha uwezo wa nchi kutekeleza vipaumbele vya kitaifa.

Amesema kwenye suala la elimu, upatikanaji wa fedha unapaswa kuwa endelevu na unaoambatana na mipango ya uhakika, utoaji wa fedha kwa wakati, manunuzi sahihi, uwazi kwenye matumizi ya fedha na matokeo yanayoweza kupimika

Ametoa wito huo leo (Alhamisi, Novemba 12, 2026) wakati akifungua Mkutano wa Sita wa Kimataifa wa Ubora wa Elimu katika ukumbi wa JNICC, jijini Dar es Salaam.

Waziri Mkuu amesema katika kupanga matumizi ya fedha zinazopelekwa kwenye sekta ya elimu, hawapaswi kuangalia tu mgao wa fedha hizo, bali wahoji endapo zinafika kwenye shule zilikopangiwa na zinatumiwa na wanafunzi wanaozihitaji zaidi.

“Lazima tuimarishe utekelezaji wa bajeti zinazopelekwa, tupunguze uzembe, tuboreshe uratibu baina ya taasisi za kitaifa na za kwenye maeneo yetu na tutumie takwimu za kuaminika katika kufanya maamuzi. Kila shilingi iliyowekezwa kwenye elimu inapaswa kuchangia ufundishaji bora, matokeo bora na fursa za sawa,” amesema.

Amesema wanajadili suala upatikanaji wa fedha na ubora wa elimu, maamuzi yatakayofikiwa yanapaswa kuzingatia usawa na ujumuishi kwa wanafunzi. “Rasilimali zitakazopatikana zinapaswa kujibu mahitaji ya wanafunzi wa kike, wanafunzi wenye mahitaji maalum ya elimu, watoto walioathiriwa na umaskini, wale walio katika jamii ambazo hazijahudumiwa na wanafunzi wote wanaokabiliwa na vizuizi vya kielimu.”

“Hakuna mtoto anapaswa kuachwa kwenye mfumo wa elimu yetu kwa sababu ya mahali anapoishi au mazingira yanayomzunguka. Tunapaswa tuhakikishe kuwa shule ziko salama, zinafikika na zina mazingira ambayo kila mwanafunzi anaweza kushiriki.”

Akielezea kuhusu maandalizi ya mfumo wa kupokea makundi mawili ya wahitimu ifikapo mwaka 2028 kutokana na mabadiliko ya mfumo wa elimu kupitia Sera ya Elimu na Mafunzo ya Mwaka 2014, Toleo la 2023, pamoja na mitaala iliyoboreshwa, Waziri Mkuu amesema kipindi hiki cha mpito kinahitaji maandalizi yaliyoratibiwa baina ya taasisi za Serikali na wadau wa elimu. 

Waziri Mkuu amesema lengo la mabadiliko hayo ni kuongeza elimu ya lazima, kuimarisha ujuzi wa vitendo na kuwawezesha wanafunzi kuingia kwenye ajira au kujiajiri.

“Hakuna wizara moja, taasisi, au shule inayoweza kusimamia mahitaji kama haya peke yake. Lazima tupange kwa pamoja, tutarajie kutakuwa na ongezeko la mahitaji ya walimu, madarasa, vifaa vya kujifunzia, fedha na tuhakikishe utekelezaji unalenga mahitaji ya wanafunzi,” amesisitiza.

Kwa upande wake, Waziri wa Elimu, Sayansi na Teknolojia, Prof. Adolf Mkenda alisema mkutano huo unafanyika katika wakati sahihi ambapo Serikali inasimamia mageuzi katika sekta ya elimu, mageuzi ambayo yana kalenda ya ukalimishaji na tayari safari imeshaanza.

“Mageuzi haya yanalenga kuongeza ujuzi katika elimu ili isiwe ya mafundisho tu ya kinadharia bali impe mwanafunzi uwezo wa kujiajiri. Hapa tuna mkondo wa elimu ya amali na mkondo wa elimu jumla,” alisema.

Akielezea mabadiliko hayo, Prof. Mkenda alisema elimu ya sasa itatoka miaka saba hadi 10 na itakuwa ni ya lazima kwa kila mtoto wa Kitanzania. Watoto lazima wasome hadi kidato cha nne, wazazi lazima wawasimamie watoto. Kwa hiyo, elimu ya msingi itakuwa ya miaka sita, na baada ya hapo inabidi waende kidato cha kwanza,” alisema.

Alisema Rais Dkt. Samia Suluhu Hassan alishawapa Wakuu wote wa Mikoa kipimo cha utekelezaji wa agizo lake kuhusiana na maandalizi ya kuanza kwa mfumo huo mpya na kwamba hivi sasa nguvu kubwa inapaswa ielekezwe kwenye suala hilo.

“Kalenda ya utekelezaji imeshatoka na ifikapo Januari, 2028 tutakuwa na wahitimu wa darasa la sita na darasa la saba ambao wote kwa pamoja wataingia kidato cha kwanza. Katika hili hakuna kufeli wala hakuna kurudi nyuma,” alisisitiza.

Alitumia fursa hiyo kuwaalika wadau wa elimu nchini waangalie fursa zilizopo na wapi wanaweza kusaidiana na serikali kufanikisha lengo hilo. “Tunaalika wadau kwa sababu bado tunahitaji shule zaidi. Tunahitaji taasisi za dini na sekta binafsi zituunge mkono.”






Read more »

at Thursday, November 12, 2026 0
Dodoma, Novemba 10, 2026 
KAMPUNI ya  Airtel Tanzania imesema itaendelea kuimarisha mifumo ya ulinzi wa taarifa binafsi za wateja wake ili kuendelea kutoa huduma bora na kuhakikisha usalama wa huduma zake za kidijitali.

Dhamira hiyo imetolewa na Mkurugenzi Mtendaji wa Airtel Tanzania, Charles Kamoto, wakati wa ziara ya heshima katika Tume ya Ulinzi wa Taarifa Binafsi (PDPC), ambapo alikutana na Mkurugenzi Mkuu wa Tume hiyo, Dkt. Emmanuel Lameck Mkilia, pamoja na viongozi wengine.

Katika ziara hiyo, Kamoto aliishukuru Tume kwa mwongozo na ushirikiano iliowapatia katika kuendana na mfumo wa ulinzi wa taarifa binafsi, akieleza kuwa mafunzo na miongozo yaliyotolewa kwa wafanyakazi wa Airtel yamekuwa muhimu katika kuongeza uelewa wa namna sahihi ya kuchakata, kuhifadhi na kushughulikia taarifa za wateja.

Alisema ulinzi wa taarifa binafsi haupaswi kuonekana kama suala la kutimiza matakwa ya kisheria pekee, bali ni sehemu muhimu ya uendeshaji wa biashara na kujenga uhusiano wa muda mrefu na wateja.

“Kwa Airtel Tanzania, kulinda taarifa binafsi si wajibu wa kutimiza matakwa ya kisheria pekee, bali ni jukumu la msingi na sehemu muhimu ya namna tunavyoendesha biashara yetu. Kulinda taarifa za wateja ni muhimu katika kujenga na kudumisha imani pamoja na mahusiano ya muda mrefu,” alisema Kamoto.

Aliongeza kuwa kampuni hiyo inaendelea kuwekeza katika mafunzo na programu za uhamasishaji kwa wafanyakazi, pamoja na kuweka sera na mifumo ya ndani inayolenga kuhakikisha kuwa ulinzi wa taarifa binafsi unazingatiwa katika shughuli zake za kila siku.

Kamoto alisema hatua hizo ni muhimu zaidi wakati kampuni ikiendelea kupanua huduma zake za kidijitali na mipango ya ujumuishaji wa huduma za kifedha, hali inayoongeza umuhimu wa kutunza vyema taarifa za wateja ipasavyo.

Kwa upande wake, Mkurugenzi Mkuu wa Tume ya Ulinzi wa Taarifa Binafsi (PDPC), Dkt. Emmanuel Lameck Mkilia, aliipongeza Airtel Tanzania kwa kutembelea ofisi za Tume na kutambua umuhimu wa ushirikiano kati ya Tume na sekta binafsi. Alisisitiza pia umuhimu wa makampuni mbalimbali kuelewa dhamira ya Tume, hususan katika kuhakikisha kuwa biashara zinaweka mifumo imara ya kulinda na kuhifadhi taarifa binafsi za wateja wao.

“Naipongeza Airtel Tanzania kwa utayari wake wa kushirikiana na Tume katika kuunga mkono utekelezaji wa malengo ya Dira ya Taifa ya Maendeleo 2050, hususan katika kuendeleza safari ya Tanzania kuelekea uchumi wa kidijitali na kuhakikisha Watanzania wengi zaidi wananufaika na fursa za kidijitali,” alisema Dkt. Mkilia.

Airtel Tanzania inathamini ushirikiano wake na Tume na inaendelea kujizatiti kuimarisha uhusiano huo katika kukuza usimamizi na utunzaji sahihi wa taarifa binafsi kwa lengo la kukuza na kujenga mazingira salama ya kidijitali nchini.
Read more »

at Thursday, November 12, 2026 0

 

Na Karama Kenyunko Michuzi Tv
TAFITI na bunifu za kisayansi zinazolenga kutatua changamoto za wananchi zinatarajiwa kuwa sehemu muhimu ya maadhimisho ya miaka 40 ya Tume ya Taifa ya Sayansi na Teknolojia (COSTECH), yatakayofikia kilele Novemba 18, 2026, jijini Dar es Salaam.

Miongoni mwa bunifu zilizooneshwa ni mkanda maalumu wa kusaidia kudhibiti upotevu wa damu kwa mama baada ya kujifungua, chanjo ya samaki inayolenga kukabiliana na magonjwa yanayoathiri ufugaji wa samaki pamoja na teknolojia ya kuzalisha gesi kwa kutenganisha hidrojeni na oksijeni kutoka kwenye maji.

Akizungumza na waandishi wa habari kuhusu maadhimisho hayo, Waziri wa Elimu, Sayansi na Teknolojia, Prof. Adolf Mkenda, amesema bunifu hizo ni sehemu ya mchango wa sayansi, teknolojia na utafiti katika kutafuta suluhisho la changamoto mbalimbali zinazowakabili wananchi.

mesema maonesho ya tafiti, teknolojia na bunifu yatafanyika Novemba 17 na 18 katika ukumbi wa Mlimani City, Dar es Salaam, huku kilele cha maadhimisho hayo kikitarajiwa kufungwa na Waziri Mkuu, Dkt. Mwigulu Nchemba, Novemba 18.

Kuhusu ubunifu wa kuzalisha gesi kwa kutenganisha hidrojeni na oksijeni kutoka kwenye maji, Prof. Mkenda amesema ameagiza wataalamu kuchunguza usalama wa teknolojia hiyo pamoja na uwezekano wa kuitumia kiuchumi na kibiashara.

Katika eneo la afya, amesisitiza umuhimu wa vyuo vikuu na taasisi za utafiti kufanya uchunguzi wa kisayansi kuhusu mimea inayotumika kutibu magonjwa, ili kubaini ufanisi wake, kiwango sahihi cha matumizi na madhara yanayoweza kujitokeza.

Amesema pia ni muhimu kuimarisha uwezo wa kufanya majaribio ya awali ya dawa nchini kabla ya kufikia hatua ya kuzijaribu kwa binadamu, hatua itakayoongeza nafasi ya watafiti wa Tanzania kushiriki katika maendeleo ya tiba.

Prof. Mkenda ameeleza kuwa maadhimisho hayo pia ni fursa ya kutathmini mchango wa COSTECH katika maendeleo ya nchi na kuweka msukumo mpya wa matumizi ya sayansi, teknolojia na ubunifu katika utekelezaji wa Dira ya Taifa ya Maendeleo 2050.

Amebainisha kuwa matumizi ya teknolojia na tafiti yanapaswa kuimarishwa katika sekta za kilimo, ufugaji, uvuvi na uchimbaji wa madini ili kuongeza tija na kuwezesha rasilimali za nchi kutumika kwa manufaa ya wananchi.

Amesema katika kilimo, tafiti zinapaswa kuelekezwa katika kuongeza uzalishaji katika eneo linalolimwa, kupunguza umaskini wa wakulima na kuchangia upatikanaji wa chakula kwa gharama nafuu.

Aidha, amezitaja jitihada za ufadhili wa masomo kupitia Samia Scholarship, utoaji wa tuzo kwa watafiti na Mfuko wa Samia wa Ubunifu kuwa miongoni mwa hatua zinazolenga kuendeleza wataalamu na kuwawezesha wabunifu nchini.

Ameeleza kuwa kabla ya kufikia kilele hicho, shughuli mbalimbali zimefanyika zikiwemo kliniki ya ubunifu wakati wa maonesho ya Nanenane, maonesho katika viunga vya Bunge na mikutano ya wadau wa sayansi na utafiti.

Amewakaribisha wananchi, waandishi wa habari na wadau mbalimbali kutembelea maonesho hayo ili kujionea tafiti, teknolojia na bunifu zinazolenga kuchangia maendeleo ya Tanzania.

Read more »
Older Posts
Subscribe to: Posts (Atom)

Top News