kamati ya wangwe

jk akipozi na kamati ya profesa wangwe baada ya kuwasilisha ripoti yao jana ikulu

Kamati ya kukusanya maoni kuhusu uharakishwaji wa uundwaji wa Shirikisho la Afrika Mashariki, jana ilimemkabidhi Rais Jakaya Kikwete ripoti yake katika hafla fupi iliyofanyika ikulu.

Akiwasilisha ripoti hiyo, Mwenyekiti wa Kamati Profesa Joseph Wangwe amesema asilimia 75.9 ya Watanzania waliohojiwa wamesema hakuna sababu ya kuharakisha uundwaji wa Shirikisho la Afrika Mashariki ili hali ni asilimia 20.8 ndio waliotaka kuharakishwa kwa shirikisho hilo.

Professa amemweleza Rais kwamba jumla ya Watanzania 65.000 walipata fursa ya kutoa maoni yao na kwamba kamati yake ilitembelea mikoa yote 26 na wilaya zote pamoja na kukutana na makundi yote muhimu ya kijami kama ambavyo Rais alivyokuwa ameagiza.

Mwenyekiti huyo wa kamati amefafanua kwamba ukusanyaji wa maoni hao umechukua muda mrefu kutokana umuhimu wa jambo lenyewe lakini pamoja na kuzingatia maagizo waliyopewa na Rais Jakaya Kikwete.

Amefafanua kwamba njia mbalimbali zilitumika katika ukusanyaji wa maoni hayo zikiwamo za mikutano ya hadhara, madodoso, radio, televisheni na tovuti.

Aidha Profesa Wangwe amebainisha kwamba taarifa hiyo ambayo imo katika vitabu viwili pamoja na mkanda wa video imegawanywa katika maeneo makuu mawili – ambayo ni ya kisiasa, kiuchumi na kijamii.

Katika Siasa, Professa anaeleza kuwa elimu ya ufahamu kuhusu Shirikisho ni jambo ambalo lilisisitizwa na wananchi wakati wakitoa maoni yao .

“Kuhusu Demokrasia na Utawala Bora, wananchi walionyesha wasiwasi wao kama nchi jirani zina demokrasia na utawala bora kiasi cha kuridhisha kuwa na shirikisho. Lakini pia suala la kero za muungano lilijitokeza huku wananchi wakishauri kwamba kero hizo zipatiwe ufumbuzi kabla ya kuingia kwenye shirikisho” akasema.

Ameeleza kuwa katika sababu hizo za kisiasa, wananchi pia walielezea wasiwasi wao kuhusu tofauti za kiitikadi kwamba bado kunatofauti ambazo ni lazima zishughulikiwe.

Kwa upande wa uchumi na maendeleo ya Kijamii, Professa Wangwe anasema, Watanzania wengi wamekuwa na wasiwasi katika mambo manne.

Kwanza ni tofauti za kiuchimi kati ya Tanzania na Kenya, pili uwezo wa ushindani wa kibiashara na hasa soko la ajira, tatu umuhimu wa kuweka misingi mizuri ya kiuchumi na nne umiliki wa ardhi na maliasili.

“Kwa wale wanaosema tuharakishe uundwaji wa shirikisho nao walielezea faida mbalimbali kuhusu shirikisho hilo .

"Lakini pia Mheshimiwa Rais kuna maswali mengine yaliyojitokeza ambayo hayahusiani na mambo ya shirikisho ni ya kitaifa nayo pia tumeyaweka kwenye ripoti hiyo” alieleza Profesa Wangwe.

Akihitimisha maelelezo yake, Professa Wangwe amemweleza Rais kwamba katika mchakato huo wa kukusanya maoni hayo wananchi waliihoji kamati kama maoni yao yangefikishwa kwa Rais kama yalivyo na kama yatafikishwa, je yatafanyiwa kazi?

Akizungumza baada ya kupokea ripoti hiyo, Rais Jakaya Kikwete amesema kuwa baada ya kamati kukamilisha kazi yake, sasa kazi iliyobaki ni ya serikali na kuongeza kuwa ripoti hiyo itawasilishwa katika Baraza la Mawaziri na Waziri wa Jumuia ya Afrika Mashariki, Professa Ibrahimu Msabaha.

“Baada ya kuwasilisha katika Baraza la Mawaziri, Wizara husika watakutana na wenzao na Sekretariati ya Afrika Mashariki,” akasisitiza Rais Kikwete.
Amesema Rais “Ninawashukuru sana kwa kazi nzuri na kwa ripoti hii nzuri mliyonikabidhii, nawashukuruni kwa uvumilivu maana hata kusikiliza nako kunahitaji uvumilivu, nina imani wako baadhi ya wananchi waliokuwa wakali sana kuhusu mchakato huu na wakawafokea kama vile nyie ndio mlioliamua jambo hili. Mmemaliza kazi yenu sasa kazi iliyobaki tuachie sisi”.

Kuhusu kama Serikali itayazingatia na kuyafanyia kazi maoni yaliyotolewa na wananchi, Rais Kikwete amewahakikishia wananchi kwamba serikali imeyapokea maoni yao na itayafanyia kazi kama ambavyo wameshauri.

Kamati ya kukusanya maoni kuhusu uharakishwaji uundwaji wa Shirikisho la Afrika Mashariki ilianza kazi yake mwezi Oktoba mwaka jana na imekamilisha kazi yake Julai 13, 2007