jk anguruma ngorongoro

jk akitoa maelekezo ya jinsi ya kuboresha maeneo yenye vivutio vikubwa vya asili katika hifadhi ya Ngorongoro hivi karibuni wakati alipokuwa katika likizo ya kikazi wilayani Ngorongoro,Mkoani Arusha.wanaomsikiliza ni Kaimu muhifadhi wa hifadhi ya Ngorongoro Bernard Murunya(wapili kushoto) na mjumbe wa bodi ya hifadhi hiyo Bwana Elvis Musiba.Rais Kikwete ambaye pia alivitembelea vivutio hivyo vinavyofikika kwa taabu kutokana na ukosefu wa barabara,alitoa maagizo hayo aliposimama kwa muda katika lango la kuingilia hifadhi ya Ngorongoro lililopo eneo la Lodoare. Habari kamili soma hapo chini...

Na Mwandishi Maalumu, Arusha

Rais Jakaya Kikwete ameitaka Mamlaka ya Hifadhi ya Bonde la Ngorongoro (NCAA), mkoani Arusha, kujenga makumbusho yenye hadhi inayofaa na inayofanana na historia na jinsi bonde hilo lilivyojitengeneza, miaka milioni nne iliyopita.

Rais pia ameitaka Idara ya Mambo ya Kale pia kujenga makumbusho ya kuhifadhi nyayo za kwanza za binadamu katika eneo la Laetoli, ambalo ni sehemu ya NCAA. Rais ametaka ujenzi wa makumbusho hayo kuanza mara moja kwa kadri inavyowezekana.

Rais Kikwete alitoa maagizo hayo majuzi wakati alipotembelea maeneo hayo yaliyoko chini ya NCAA – Ngorongoro Conservation Area Authority, ikiwa sehemu ya likizo yake ya kikazi ya mwisho wa mwaka.

Rais alisema kuwa badala ya NCAA kuendelea kutangaza na kuingiza mapato kutokana na bidhaa moja tu – yaani Bonde pekee la Ngorogoro, ni vyema uongozi wa Mamlaka hiyo kuongeza bidhaa nyingine katika eneo hilo lenye historia ya kipekee duniani.

Alisema kuwa kujengwa kwa makumbusho – ya historia ya jinsi Bonde la Ngorongoro lilivyojitengeneza na yale ya kuhifadhi nyanyo za kwanza za binadamu – kutaongeza thamani ya eneo hilo na kuvuatia watalii kutembelea eneo hilo.

Kwa sasa historia ya Bonde la Ngorongoro inaonyeshwa katika kibanda kidogo kwenye lango kuu la Lodoare la kuingilia katika eneo hilo la NCAA, kutokea mjini Karatu, wakati nyayo za kwanza za binadamu zimehifadhiwa kwa kufunikwa na mawe katika eneo la Laetoli, magharibi mwa Bonde la Ngorongoro.

Nyayo hizo zimefunikwa tokea mwaka 1997, miaka 10 iliyopita, bila kusaidia kwa namna yoyote, utalii wa Tanzania.

“Tuna wajibu wa kuzitunza vizuri kumbukumbu hizi muhimu na historia hii isiyopatikana pengine popote duniani kwa manufaa ya binadamu wote na kwa manufaa ya vizazi vijavyo,” Rais Kikwete aliwaambia maofisa wa NCAA wakiongozwa na mjumbe wa bodi ya NCAA, Elvis Musiba.

Eneo la NCAA lina historia ya binadamu isiyopatikana katika eneo lolote duniani. Historia hiyo ni pamoja na kuwapo kwa eneo linalokubaliwa kuwa asili ya binadamu, inayokadiliwa kuwa na umri wa miaka milioni 1.75 katika sehemu ya Oldupai (Oldvai Gorge), na nyayo za kwanza za binadamu zinazokadiriwa kuwa na umri wa miaka zaidi ya milioni tatu na laki sita.

Eneo hilo pia lina vilima tisa vya volcano, ambavyo inakadiriwa kuwa vilijitengeneza kiasi cha miaka milioni nne iliyopita. Kinachojulikana zaidi miongoni mwa vilima hivyo ni Mlima Oldonyo Lengai (Mlima wa Mungu), ambao umekuwa ukilipukalipuka katika siku za karibuni zaidi, na kusababisha matetemeko ya mara kwa mara katika eneo hilo.

Eneo la NCAA pia lina mabonde ya Olmoti na Embakaai, lenye ziwa dogo, kivutio kikubwa cha watalii, ambacho, hata hivyo, hakijulikani kwa sababu ya ugumu wa kukifikia kutokana na ukosefu wa barabara.

Vivutio vingine katika eneo hilo ni Milima ya Gor na Mchanga Unaohamama (Shifting Sands), unaotokana na majivu ya volcano ya Mlima Oldonyo Lengai.

Mbali na vivutio hivyo, ni wanyamapori wa kila aina wanaopatikana katika Bonde lenyewe la Ngorongoro, linalopakana na hifadhi maarufu duniani, ya Serengeti. Pia eneo hilo la NCAA lina ziwa la maji chumvi ya Eyasi, na nje kidogo tu ya eneo hilo ni ziwa jingine, la Natron.

.