Yanga yaibugiza Simba 5-2 mjini Washington

nahodha wa simba saleh londa akipokea kombe la ushindi wa pili

mgeni rasmi wa mpambano wa yanga na simba washington dc richard kasesela (kati) akiwa na waandaaji na makombe ya wahindi
hatario langoni pa simba
refa manyoto ndimbo akiwa na manahodha wa yanga na simba

Washington DC, Marekani

TIMU inayoundwa na washabiki wa Yanga wanaoishi mjini Washington DC na vitongoji vyake jana iliwachapa wenzao wa Simba kwa mabao 5-2 katika mchezo mkali uliochezwa kwenye uwanja wa Meadowbrook, kilomita mbili na nusu nje ya Washington.

Ikicheza kwa staili ya Maximo ya kudhibiti mashambulizi na kupeleka mipira hatari langoni mwa wapinzani, Yanga jana iliwazidi wapinzani wao katika kila idara uwanjani tofauti na mwaka jana zilipotoka sare ya 3-3 katika mchezo uliovunjika kunako dakika za majeruhi baada ya mwamuzi kuipa Yanga penalti.

Yanga ilianza kutikisa nyavu za Simba kunako dakika ya 19 kupitia kwa Seif Ndosa kabla ya Ernest Fotachwi, mzaliwa wa Cameroon, kuongeza bao la pili kwenye dakika ya 45 na kusababisha benchi la ufundi lililoongozwa na kocha Robert Sabuni, kuzozana bila maelewano wakati wa mapumziko.

Dakika kumi baada ya kipindi cha pili kuanza, mshambualiaji hatari wa Yanga, Innocent Geofrey, nusura afunge alipobaki na kipa wa Simba, Saleh Londa aliyekuwa mchezaji bora wa mechi ya jana kutokana na kuiokoa Simba na adhabu ya magoli.

Simba ilisawazisha kunako dakika ya 63 kupitia kwa Shabani, lakini mvua ya magoli ilibadilika kwenye dakika ya 78 wakati beki Aristotle Maruma alipopachika bao la tatu kabla ya Hussein Ibrahim kuongeza la nne na tano kwenye dakika za 80 na 85.

Mwamuzi wa mchezo huo, Kassim Khamis ambaye alionekana kunogewa na mvua ya magoli aliachia dakika za majeruhi kupitiliza na kuisaidia Simba kupata bao la pili kupitia kwa Vincent Ndusilo aliyeingia kipindi cha pili kuchukua nafasi ya Tobby Nkai, mzaliwa wa Sierra Leone.

Mgeni rasmi wa pambano hilo, Richard Kasesela ‘Bibo’ ambaye ni Rais wa Shirikisho la Mpira wa Kikapu Tanzania (TBF), alikabidhi kombe la ushindi kwa nahodha wa Yanga, golikipa Diddy Ruba, ambaye baada ya sherehe kubwa alimkabidhi mzee wa timu, Profesa Nicholls Boas.

Timu zote jana zilitumia wachezaji wa kulipwa ambapo Yanga ilikuwa nao wanne kutoka Kenya, Uganda na Cameroon wakati Simba ilikuwa na watano kutoka Sierra Leone, Nigeria na Liberia. Timu zote zilibadili wachezaji zaidi ya watatu katika dakika 90.

Aidha mechi ya jana itakumbukwa kwa shoo ya jezi iliooneshwa na Simba ambapo ya kupasha msuli moto, ilibadili jezi na kuvaa zenye nembo ya Manchester United. Simba wote walivalia bukta nyeupe na soksi nyekundu.

Hata hivyo hali kwa watani zao wa Jangwani haikuwa hivyo kutokana na suala la jezi kuwaumiza vichwa ambapo kwa wakati mmoja wachezaji watatu walivalia jezi zenye namba kumi mgongoni na karibu kila mchezaji alikuwa na bukta na soksi mchanganyiko.

Baada ya hafla ya kula nyama za kuchoma uwanjani hapo, uongozi wa Watanzania mjini Washington ulitangaza kwamba mechi hiyo itarudiwa tena Julai 4, kwenye siku ya uhuru wa Marekani ili kuipa nafasi Simba kulipa kisasi.