benki ya NBC yatoa misaada ya vifaa vya maabara

Mbunge wa Kigamboni Mh. Mwinchumu Abdulrahmani (shoto) akipokea msaada wa NBC wa vifaa vya maabara kwa shule ya sekondari ya Mbagala Kuu jana. Anayetoa ni mkuu wa Hazina wa NBC Lawrence Mafuru. Mbunge wa Kigamboni Mh. Mwinchumu Abdulrahmani na mwalimu mkuu wa shule ya sekondari ya Mbagala Kuu Secondary Bi. Chriphoster Simbano wakishukuru kwa msaada wa vifaa vya maabara ambavyo NBC imetoa kwa shule ya sekondari ya Mbagala Kuu jana Mbunge wa Kigamboni Mh. Mwinchumu Abdulrahmani akihutubia kwenye hafla hiyo jana. Na chini akiangalia vifaa hivyo vya maabara vilivyotolewa na NBC

NBC yaendeleza mipango yake ya kusaidia jamii

• yatoa msaada wa vifaa vya elimu
• kuendelea kusaidia nyanja ya elimu nchini

Benki ya Taifa ya Biashara (NBC) imetoa msaada wa vifaa vya elimu kwa shule mbili jijini Dar es Salaam katika mpango wake unaoendelea wa kusaidia shughuli za maendeleo katika jamii (CSR) ambao unalenga elimu.

Jana wafanyakazi kutoka Idara ya Hazina ya benki hiyo walitoa vifaa vya maabara vyenye thamani ya Sh. milioni 2 kwa Shule ya Sekondari Mbagala Kuu, wakati wenzao wa Tawi la Samora jijini Dar es Salaam walitoa madawati yenye thamani ya Sh. milioni 2 kwa Shule ya Msingi Buguruni.

Akiongea jijini Dar es Salaam, Meneja Masoko wa NBC, Bw. William Kallaghe alisema, “NBC ilipoanza mpango huu, ulikuwa ni mwanzo wa azma yetu ya muda mrefu ya kuhakikisha kwamba elimu nchini inatolewa katika mazingira bora. Tunatambua thamani na umuhimu wa kuwa na mazingira yenye vifaa vyote muhimu kwa ajili ya elimu na misaada hii inalenga moja kwa moja katika hilo.”

Mpango huo, ambao ulianzishwa mwaka 2007 wakati NBC ikisherehekea miaka 40 tangu kuanzishwa kwake, unalenga kuwashirikisha wafanyakazi wake katika miradi inayokusudia kuboresha maisha katika jamii wanazoishi.

Msaada huu ni sehemu ya mpango wa miezi mitano wenye thamani ya zaidi ya Sh.milioni 120 ambao utawashirikisha wafanyakazi katika kusaidia nyanja ya elimu nchi nzima. Kusudi la miradi hii ni kurudisha faida ambayo benki hiyo inapata ili isaidie jamii zilezile ambazo NBC inazihudumia.

Mipango ya maendeleo ya benki hiyo kwa mwaka 2008 inatoa kipaumbele kwa elimu, ambapo wafanyakazi wa benki hiyo watashiriki katika miradi 70 ya jamii inayolenga elimu.