JK arejea

JK na Mama Salma Kikwete wakiwa wamefuatana na Makamu wa Rais Dk Ali Mohamed Shein, Waziri Mkuu Mh Mizengo Pinda baada ya kuwasili kwenye uwanja wa Ndege wa kimataifa wa Julius Nyerere mchana wa leo wakitokea Marekani kwa ziara ya kikazi. Chini JK akiongea na D. Shein na Mh. Pinda kabla ya kuondoka uwanjani
Rais arejea baada ya ziara ya mafanikio

Na Mwandishi Maalum

Rais Jakaya Mrisho Kikwete amerejea nchini leo (Jumatatu, Septemba Mosi, 2008) mchana, baada ya kumaliza ziara ya kikazi yenye mafanikio makubwa katika Marekani, kwa mwaliko wa Rais George W Bush.

Kwenye Uwanja wa Ndege wa Dar Es Salaam, Rais Kikwete amelakiwa na viongozi mbali mbali wakiongozwa na Makamu wa Rais, Dk. Ali Mohammed Shein.

Rais Kikwete ambaye alimbatana na mkewe, Mama Salma Kikwete na Waziri wa Mambo ya Nje na Ushirikiano wa Kimataifa, Bernard Membe; na mawaziri wengine, aliondoka nchini Jumatatu iliyopita, Agosti 25, mwaka huu, 2008, kwa ziara hiyo ya kikazi.

Miongoni mwa shughuli zake kuu kwenye ziara hiyo ya siku tatu, Rais Kikwete alishiriki katika mkutano wa kutangazwa rasmi kuwa Chuo cha Kimataifa cha Wanyamapori katika Afrika (International Conservation College, Tanzania Campus) kitajegwa mjini Arusha.

Chuo hicho kitajengwa na taasisi ya kimataifa ya kutunza wanyamapori ya International Conservation Caucus Foundation (ICCF).

Rais pia alitembelea makao makuu ya Shirika la Misaada ya Kimataifa la Marekani la USAID, ambako ilitangazwa misaada mbali mbali ya kusaidia jitihada za maendeleo ya Tanzania.

Miongoni mwa misaada hiyo ni mkopo wa kiasi cha dola za Marekani milioni 20 kudhamini shughuli za wakulima wadogo wadogo nchini, na msaada wa kiasi cha dola za Marekani 623, 580 kusaidia kujenga uwezo wa Mamlaka ya Udhibiti wa Nishati na Maji (EWURA).

Mkataba wa makubaliano ya msaada wa EWURA ulitiwa saini na Waziri Membe kwa upande wa Serikali, na Naibu Mkurugenzi wa Shirika la Maendeleo ya Biashara (USTDA), Leocardia Zak kwa niaba ya Serikali ya Marekani.

USAID pia ilitangaza msaada wa dola za Marekani milioni 1.5 kwa ajili ya kuipatia Tanzania vitabu vya kufundishia masomo ya sayansi katika shule za sekondari, na kiasi cha dola nusu milioni kwa ajili ya mafunzo ya walimu na ujenzi wa maabara tatu za kufundishia lugha ya Kiingereza.

Rais Kikwete pia alikutana na kufanya mazungumzo na mwenyeji wake, Rais Bush katika Ikulu ya Marekani.

Mazungumzo hayo yalifuatiwa na chakula cha mchana, na baada ya hapo Rais Bush alimtembeleza mwenyeji wake katika maeneo na vyumba mbali mbalui vya Ikulu ya Marekani ya White House.

Rais pia alishuhudia utiaji saini wa mkataba wa msaada ambako Marekani itasaidia ujenzi wa vituo viwili vya kisasa vya kupambana na ugonjwa wa ukimwi kwa watoto.

Vituo hivyo, vitajengwa Mwanza na Mbeya, chini ya Mpango Mahsusi wa Rais wa Marekani wa Kupambana na Ukimwi wa PEPFAR, utaoshirikiana na taasisi binafsi ya Baylor International Pediatric AIDS Initiative katika ujenzi huo na utoaji wa nyenzo nyingine kwa ajili ya kujenga uwezo zaidi wa Tanzania kupambana na ukimwi.

Rais Kikwete pia alikutana na kufanya mazungumzo na Mkurugenzi Mtendaji wa Shirika la Fedha Duniani (IMF), Dominique Strauss-Kahn ambaye aliipongeza Serikali ya Kikwete kwa jinsi ilivyoshughulikia na kumaliza tatizo la upotevu wa fedha katika Malipo ya Akaunti ya Nje (External Payments Account –EPA) katika Benki Kuu ya Tanzania (BOT).

Strauss-Kahn alimwambia Rais Kikwete kuwa Tanzania haikuwa nchi ya kwanza kukumbwa na tatizo hilo, lakini ilikuwa imeonyesha mfano na njia kwa jinsi ilivyolishughulikia tatizo hilo.

Alisema kuwa kwa kadri IMF inavyohusika, suala hilo sasa limemalizika na ukurasa wa EPA kufungwa.