tsvangirai ateta na JK ikulu dar

JK katika mazungumzo na kiongozi wa Chama cha upinzania nchini Zimbwabwe MDC Bwana Morgan Tsvangirai ikulu jijini Dar asubuhi, na chini akimsindikiza baada ya mazungumzo yao. Mambo yakienda mswano Tsvangirai atashika nafasi ya Waziri mkuu wa Zimbabwe wakati serikali ya shirikisho itakapoundwa.

Na Mwandishi Maalum
Mwenyekiti wa Umoja wa Afrika (AU), Rais Jakaya Mrisho Kikwete leo, Jumatano, Novemba 5, 2008, amekutana na kufanya mazungumzo na Waziri Mkuu Mteule wa Zimbabwe, Morgan Tsvangirai.

Katika mazungumzo hayo Ikulu, Dar Es Salaam, Tsvangirai ambaye pia ni Kiongozi wa Chama cha Movement for Democratic Change (MDC-T), amemwelezea Rais Kikwete kuhusu jitihada za kuunda Serikali ya Umoja wa Kitaifa nchini Zimbabwe.

Waziri Mkuu huyu mteule wa Zimbabwe amewasili Dar Es Salaam asubuhi, na alitarajiwa kuondoka kurejea kwao baada ya mazungumzo yake na Rais Kikwete.

Tsvangirai pia amemweleza Rais Kikwete kuhusu maandalizi ya Mkutano wa Wakuu wa Nchi za SADC uliopangwa kufanyika Jumapili ijayo, Afrika Kusini, ili kujadili hali ilivyo katika Zimbabwe.

Vyama vya siasa vya MDC-T, ZANU-PF na MDC-M vilitiliana saini makubaliano ya kuunda Serikali ya Umoja wa Kitaifa katika Zimbabwe Septemba, mwaka huu, lakini tokea wakati jitihada za kutekeleza makubaliano hayo zimekwama.