sherehe za miaka 32 ya kuzaliwa CCM

Kiongozi wa wasanii wa jadi wa ngoma ya Kisukuma ya Wagalu, Bwana Madebe Jinasa akionesha ujuzi wake mbele ya Rais Jakaya Kikwete na viongozi wengine wa chama wakati wa maadhimisho ya kuzaliwa kwa CCM yaliyofanyika katika uwanja wa Kambarage,mjini Shinyanga wikiendi hii
JK akiwasili uwanja wa kambarage shinyanga

Mwenyekiti wa CCM Rais Jakaya Mrisho Kikwete akiwasalimia wananchi wa mkoa wa Shinyanga muda mfupi baada ya kuwasili katika uwanja wa michezo wa Kambarage amabapo alihutubia katika kilele cha sherehe za miaka 32 ya kuzaliwa CCM.

Rais Jakaya Mrisho Kikwete akiagana na baadhi ya wakazi wa mji wa shinyanga muda mfupi baada ya kuwahutubia katika mkutano wa hadhara katika uwanja wa michezo wa Kambarage mjini humo wikiendi hii

Rais Jakaya Mrisho Kikwete amerejea Dar Es Salaam mchana wa leo, Jumapili, Februari 8, 2009, kutoka Mkoani Shinyanga ambako jana alikuwa mgeni rasmi kwenye sherehe za miaka 32 ya kuzaliwa Chama cha Mapinduzi (CCM), katika nafasi yake kama mwenyekiti wa taifa wa chama hicho.

Rais Kikwete ameondoka mjini Shinyanga leo asubuhi kwa gari kwenda mjini Mwanza, ambako amepanda ndege kurudi Dar.

Rais Kikwete alitumia sherehe za jana kukiandaa chama chake tayari kwa Uchaguzi Mkuu wa mwakani, akisisitiza kuwa maandalizi tayari yanaendelea kwa ajili ya Uchaguzi wa Serikali za Mitaa uliopangwa kufanyika baadaye mwaka huu.

Akizungumza na maelfu ya wananchi kwenye Uwanja wa Kambarage, Rais Kikwete pia alisisitiza kuwa nia kuu ya CCM, kama ilivyo kwa chama chochote cha siasa duniani, inabakia kukamata na kudumisha madaraka ya kuongoza dola. “Chetu siyo chama cha mpira kama Yanga na Simba…”

Rais pia alitumia nafasi hiyo kukemea kwa mara nyingine tena mauaji ya vikongwe na maalbino kwa sababu za kiushirikina, akisisitiza kuwa ukatili huo kamwe hauwezi kuvumilika. Mkoa wa Shinyanga unaongoza katika mauaji ya makundi yote hayo mawili ya wananchi.

Aidha, Rais alitangaza hatua za Serikali kupunguza kiwango cha gharama ya kuunganisha maji kwa wananchi wa Kahama na Shinyanga, ambao watanufaika na maji kutoka mradi mkubwa wa maji kutoka Ziwa Victoria.

Vile vile, aliondoa sharti ya watu kulipia kwanza gharama za kuunganishiwa maji, akisema kuwa watu waunganishiwe maji na walipe gharama hizo hatua kwa hatua.

Mradi huo unaonufaisha watu nusu milioni kwa sasa, utanufaisha watu 1,000,000 ifikapo mwaka 2025, na umekamilika kujengwa kwa fedha ya Serikali ya Tanzania. Mpaka sasa kiasi cha sh bilioni 227 zimetumika kwa ajili ya mradi huo ambao sasa umefikia hatua ya kutawanya maji kwa wananchi.