JK azindua mradi mkubwa wa maji shinyanga

JK, Rais Mstaafu wa awamu ya tatu Benjamin Mkapa na Waziri wa Majui Profesa Mark Mwandosya wakizungumza wakati wakikagua mitambo mikubwa ya kusafisha maji iliyopo katika kijiji cha Ihelele Wilaya ya Misungwi jana mchana.Rais Mstaafu Benjamin Mkapa nmdiye aliyeasisi mradi huo mkubwa wa maji kutoka Ziwa Victoria hadi miji ya Kahama na Shinyanga

JK akimtwisha Maji Bi.Janet Fadi Mkazi wa mtaa wa Ndala Shinyanga mjini wakati wa hafla ya uzinduzi wa kituo cha kuchotea maji mjini Shinyanga.Kituo hicho ni sehemu ya Mradi mkubwa wa maji kutoka ziwa Victoria hadi miji ya Kahama na Shinyanga uliozinduliwa na JK jana
JK akifunua kitambaa katika jiwe la Msingi katika kituo cha maji Mjini Kahama jana huku Waziri wa Maji Profesa Mark Mwandosya akiangalia.Kituo hicho cha maji Mjini Kahama ni sehemu ya Mradi wa Maji Kutoka Ziwa Victoria hadi miji ya Kahama na Shinyanga uliozinduliwa na Rais Kikwete jana na kuhudhuriwa na Rais mstaafu wa awamu ya Tatu Benjamin Mkapa.

akimpongeza msanii chipukizi Farida Fadi(7) baada ya kusoma shairi zuri wakati wa hafla ya uzinduzi wa kituo cha kuchotea maji Shinyanga mjini jana.Sherehe za uzinduzi huo ni sehemu ya Mradi mkubwa wa maji kutoka ziwa victoria hadi miji ya Kahama na Shinyanga.Msanii huyo chipukiizi ni mwanafunzi katika shule ya Msingi Ndala, Shinyanga mjini. Picha na mdau Freddy Maro wa Ikulu



HABARI KAMILI
JK amezindua mradi mkubwa wa maji kuliko yote Kusini mwa Jangwa la Sahara wa Ziwa Victoria ambao umegharimiwa na Serikali ya Tanzania bila ya msaada wa wahisani kwa zaidi ya Sh bilioni 200.

Uzinduzi huo ulionyeshwa moja kwa moja na televisheni ya taifa,TBC1.
Katika hotuba yake ya uzinduzi uliofanyika wilayani Misungwi mkoani Mwanza jana, Rais Kikwete alisema uzinduzi huo ni sehemu tu ya utekelezaji wa ahadi za serikali yake kwa wananchi .

Alisema mradi huo ni kielelezo cha dhamira ya serikali na Chama Cha Mapinduzi (CCM) kutekeleza ahadi zake za kuwapatia wananchi maji safi na salama.

Aidha alimsifu Rais mstaafu wa Serikali ya Awamu ya Tatu, Benjamin Mkapa, aliyekuwapo katika uzinduzi huo kwa uthubutu wa kuamua kuanzishwa kwa mradi huo.

“Ndani ya Ilani ya CCM, mradi huu ulipaswa kukamilika mwaka 2010, Rais Mkapa alituachia na akaamini tutaweza na kweli Serikali ya Awamu ya Nne imekamilisha mradi huo kabla ya wakati uliokuwa umepangwa.

“Hii inadhihirisha CCM inaweza. Tumewaweza Busanda na bado tutaendelea kushinda, na mradi huu ni ushahidi,” alisema JK..

Mbali na Mkapa, JK pia alimshukuru aliyekuwa Waziri Mkuu Edward Lowassa ambaye pia alihudhuria uzinduzi huo, kwa usimamizi mzuri wakati wa uanzishwaji wa mradi huo wakati akiwa Waziri wa Maji.

Pia aliwashukuru mawaziri walioiongoza wizara hiyo katika nyakati tofauti za utekelezaji wa mradi huo wakiwemo Stephen Wasira, Shukuru Kawambwa na Waziri wa sasa wa Maji na Umwagiliaji, Profesa Mark Mwandosya, kwa kusimamia vizuri utekelezaji wa mradi huo.

Mradi huo unaopita katika mkoa wa Mwanza hadi Shinyanga wilayani Kahama, utafaidisha vijiji 54 na wananchi zaidi ya milioni moja watakuwa wakipata maji kwa saa 24. Rais alikemea tabia ya baadhi ya wananchi ya kuharibu miradi ya maendeleo inayotekelezwa na serikali.

“Kuna baadhi ya watu hapa wanakwenda kukata mabomba na kuchukua vifaa wakidai vya Wachina.

“Vitu hivyo sio vya Wachina, serikali imegharimia kwa fedha zake halafu nyie mnakwenda kunyofoa kisha mkikosa maji mnalaumu serikali, vitendo vya kuharibu miradi ni upuuzi na inasikitisha,” alisema JK.

Aliitaka mamlaka iliyopewa jukumu la kusimamia mradi huo chini ya Mwenyekiti wake ambaye ni Naibu Katibu Mkuu wa Wizara ya Maji na Umwagiliaji, Christopher Sai, kusimamia na kuendesha mradi huo kwa ufanisi.