Dk. Migiro asisitiza umuhimu wa vyandarua vyenye dawa

Naibu Katibu Mkuu wa Umoja wa Mataifa Dk. Asha-Rose Migiro akipiga danadana mbele ya mtoto Charles Ssali (12) toka Uganda ambaye ni Balozi maalum wa Muungano dhidi ya Malaria (United Against Malaria) mtoto huyo alipomtembelea makao makuu ya Umoja wa Mataifa, jijini New York, leo. Wengine ni Bw. Robert Skinner kutoka taasisi ya Umoja wa Mataifa na Bw. Herve Verhyoosel kutoka Ushirikiano wa Kutokomeza Malaria ( Roll Back Malaria Partnership).

Na Mwandishi Maalum,

New York

Naibu Katibu Mkuu wa Umoja wa Mataifa Dk Asha-Rose Migiro amesisitiza umuhimu wa matumizi ya vyandarua vyenye dawa kama njia bora na rahisi ya kujikinga na Malaria.

Ameeleza tafiti mbalimbali zimeonyesha katika maeneo ambayo kumekuwa na matumizi makubwa ya vyandarua, sambamba matumizi ya dawa sahihi na utokomezaji wa vyanzo vya mazalia ya mbu, vifo vitokanavyo na malaria vimepungua kwa asilimia kubwa.

Dk. Migiro, ameyasema hayo leo wakati wa mazungumzo yake na Balozi maalum wa Muungano dhidi ya Malaria (United Against Malaria) , Charles Ssali ( 12) kutoka Uganda, wakati mtoto huyo alipomtembelea makao makuu ya Umoja wa Mataifa, jijini New York.

Akabainisha kwamba, licha ya ugonjwa huo kuwa chanzo kikubwa cha vifo hususani kwa watoto chini ya miaka mitano barani afrika, pia umekuwa na athari kubwa kwa nguvu kazi na hivyo kuathiri mapato na uchumi wa n chi zinazoendelea kutoka na nguvu kazi hiyo kutumia muda mwingi kujiuguza.
“ lakini kama hiyo haitoshi, malaria inaadhari nyingine kwa wanamichezo, kwani huadhiri kiwango chao cha uchezaji kwa kujikuta wakiugua malaria mara kwa mara” akasema Dk. Migiro.

Naibu Katibu Mkuu amefafanua kuwa Katibu Mkuu wa UN, Mh. Ban Ki Moon kwa kushirikiana na Muungano huo dhidi ya ugonjwa wa malaria amejiweka malengo ya kuhakikisha kwamba, watu wengi wanalala kwenye vyandarua ifikapo mwaka 2010.

Katika mazungumzo yao, Mtoto Charles, alimweleza Naibu Katibu Mkuu, kwamba yeye ni mpenzi sana wa mchezo wa mpira wa miguu kuliko mchezo mwingine wowote. Na anauchukia ugonjwa wa malaria kupita kiasi.

“ Mimi napenda sana mpira wa miguu, lakini nachukia sana malaria, kwa kadri ninavyokumbuka nimekuwa nikiugua ugonjwa huu tangu nikiwa na miaka minne. Lakini tangu Anti yangu alipoanza kuhakikisha nalala ndani ya chandarua, sijasubuliwa tena na ugonjwa huo”ameeleza Charles.

Akaeleza kuwa, pamoja na kutumia chandarua , Klabu yake anayoichezea imekuwa ikihakikisha kwamba wanameza dawa za kuzuia malaria kila baada ya miezi sita.

Charles katika mazungumzo hayo, alikuwa amefuatana na Bw. Robert Skinner kutoka taasisi ya Umoja wa Mataifa na Bw. Herve Verhyoosel kutoka Ushirikiano wa Kuutokomeza ( Rolls Back Malaria Partnership). Akasema Kupitia ubalozi wake huo, anatoa wito kwa wazazi , watoto na watu wote hususani barani afrika kulala kwenye vyandarua ili kujikinga na ugonjwa huo hatari.

“ kama unataka kucheza mpira wa miguu kama mimi na kushinda kombe la dunia la Ghothia kwa vijana, lala kwenye chandarua uepukane na malaria” akasisitiza Charles.

Baada ya mazumgumzo yao, Naibu Katibu Mkuu, Dkt. Asha- Rose Migiro alikabidhiwa Chandarua kikubwa kama ishara ya kuendeleza kampeni dhidi ya ugonjwa wa malaria na akacheza mpira na mtoto huyo.

Umoja dhidi ya Malaria, ni mpango mkakati wa pamoja ulioanzishwa mwaka 1998 kati ya Ushirikiano dhidi ya Malaria, Shirika la Afya la Umoja wa Mataia(WHO), Shirika la Umoja wa Mataifa la kuhudumia watoto ( UNICEF), Shirika la Maendeleo la Umoja wa Mataifa ( UNDP), Bank ya Dunia na taasisi nyingine zisizo za kiserikali ikiwamo ya Bill na Belinda Gates.

Madhumi ya Umoja huo dhidi ya Malaria ni kuwahamasisha wapenzi wa mpira wa miguu duniani kote kuunga mkono jitihada za kuhakikisha watu wengi wanapata huduma za vyandarua na dawa za kutibu malaria ifikapo mwaka 2010.

Takwimu kuhusu madhara ya ugonjwa huo ambao zimekuwa zikitolewa na wataalam mbalimbali, zinaonyesha katika kila sekunde thelathini mtoto moja hupoteza maisha barani Afrika. Huku zaidi ya watu milioni moja wakipoteza maisha kila mwaka.

Aidha takwimu hizo zinaonyesha pia kuwa duniani kote watu bilioni 3.3 sawa na nusu ya idadi ya watu wote, wamo katika hatari ya kuugua malaria. Huku Asilimia 91 ya vifo vya vitokanavyo na malaria vikitokea Afrika.

Kwa upande wa athari za kiuchumi, ugonjwa huo unachangia katika ongezeko la umaskini na kurudisha nyuma fursa za maendeleo. Wastani wa dola 12 bilioni za kimarekani hupotea kila mwaka kama sehemu ya uzalishaji.
Kama hiyo haitoshi asilimia 40 ya matumizi katika huduma za afya barani afrika huishia kwenye malaria peke yake.

Wataalamu wanaeleza kwamba ugonjwa huo unazuilika na kutibika. Kwa dola tano au kumi unaweza kumlinda mama au mtoto dhidi ya ugonjwa huo kwa kipindi cha miaka mitano, kwa kutumia njia rahisi kama matumizi ya vyandarua, dawa sahihi na kunyunyizia dawa za kutokomeza mazalia ya mbu.

Naibu Katibu Mkuu wa Umoja wa Mataifa, Dk. Asha-Rose Migiro, akiwa ameshika chandaru pamoja na mtoto Charles Ssali ambaye ni Balozi maalum wa kampeni dhidi ya ugonjwa huo na maafisa toka taasisi ya Umoja wa Mataifa ya Ushirikiano wa Kutokomeza Malaria ( Roll Back Malaria Partnership).