filamu jipya la cut off

Kasti ya Cut Off kutoka kushoto ni Tino, Queen Darleen, Rose Ndauka na Chekibudi

Ni Bonge la picha linaloanzia kijijini, Hisan Muya “Tino” anacheza kama kijana fukara akiwa amekomea kidato cha sita na kushindwa kuendelea na elimu ya juu kutokana na uwezo duni wa wazazi wake (Mzee Magari na Mama Kawele).

Uwezo wake duni pia unamfanya asikubaliwe kumuoa kipenzi chake cha muda mrefu Rose Ndauka ambaye anatoka familia yenye uwezo. Wazazi wa Rose Ndauka Mzee Olotu na Dotnata wanaamua kumuoza Rose kwa mtoto kutoka familia ya kitajiri Mohamed Nurdin “Chekibudi” Rose bila hiyari yake anaolewa na kwenda kuishi nyumbani kwa kina Chekibudi ambako huko anakutana na vituko vya wifi Aunt Ezekiel, mama mkwe Bi Hindu na shemeji Basupa. Mwana dada kutoka fani ya Bongo Fleva Queen Darleen nae anafunika vilivyo ndani ya filamu hii na kuwa kiungo muhimu katika kuwakutanisha tena Tino na Rose Ndauka.

Safari hii Tino akiwa mtu mwenye uwezo anapambana kumrejesha Rose katika himaya yake huku Chekibudi nae akisimama kidete kuhakikisha ndoa yake haitetereki. Ndani ya filamu hii iliyojaa simulizi za mapenzi yanatokea matukio kadhaa ya kisiasa na kisasi pamoja na watu kuporomoka na kupanda kimaisha huku wengine wakiishia kwenye mikono ya sheria.

Cha kuvutia zaidi ndani ya Cut Off ni kwamba maadili yamezingatiwa ipasavyo, ni filamu ambayo unaweza kuitazama mwanzo hadi mwisho ukiwa na wanao au mkweo bila adha ya lugha chafu au matukio yaliyo kithiri kimapenzi.

Filamu imeandaliwa na Screen Masters huku production ikifanywa na Sofia Production, Imetungwa na Hisan Muya “Tino” na kuongozwa na Issa Mussa “Cloud”. Sehemu kubwa ya filamu ya Cut Off imechezewa Boko Mbweni na Mbezi Beach Dar es Salaam. Mkurugenzi wa Screen Masters Said Mdoe amesema Cut Off ipo jikoni katika hatua za mwisho kabisa na inatarajiwa kuingia madukani muda si mrefu.

Mdoe ameongeza kuwa Cut Off ni filamu ambayo imejaza mastaa wengi pengine kuliko filam nyingine yoyote ile hapa Bongo. Miongoni mwa sura zitakazoonekana katika Cut Off ni pamoja na Mzee Yusuf, Cloud, Big Matovola, Nyoshi El Saadat, Nurdin Canavaro, Banza Stone, Mwinjuma Muumin, Juma Mbizo, Isha Ramadhan “Mashauzi” , Juma Pondamali na wengine kibao.