JK apokea ujumbe wa Rais Hosni Mubarak wa Misri

JK akipokea ujumbe kutoka kwa Rais wa Misri Hosni Mubarak wa Misri toka kwa Mhe.Profesa Mohamed Nasr El-Deem Allam ambaye ni Waziri wa maji na Umwagiliaji wa Misri ikulu jijini Dar leo asubuhi. Picha na mdau Freddy Maro wa Ikulu

Mheshimiwa Jakaya Mrisho Kikwete, Rais wa Jamhuri ya Muungano wa Tanzania, leo, Ijumaa, Aprili 2, 2010, amepokea ujumbe maalum kutoka kwa Rais Hosni Mubarak wa Misri.

Ujumbe huo maalum kutoka kwa Rais Mubarak umewasilishwa kwa Rais Kikwete na mjumbe maalum wa kiongozi huyo wa Misri, Mheshimiwa Muhamed Nasra Eldinallam, ambaye ni Waziri wa Maji na Umwagiliaji wa Misri katika shughuli fupi iliyofanyika Ikulu, Dar Es Salaam.

Ujumbe huo maalum unahusu jinsi Tanzania na Misri zinavyoweza kuongeza ushirikiano katika uendeshaji wa Bonde la Mto Nile.

Akipokea ujumbe huo kutoka kwa Mheshimiwa Eldinallam, Rais Kikwete amemshukuru Rais Mubarak kwa kumtumia ujumbe huo na kumtakia afya njema kiongozi huyo wa Misri ambaye karibuni alipelekwa Ujerumani kwa matibabu.

“Namshukuru sana Rais Mubarak kwa ujumbe wake maalum. Mapendekezo yake kwenye ujumbe huu ni mapendekezo mazuri na makini, tutakaa kama Serikali baada ya Sikukuu ya Pasaka, tutayajadili na tunawatumia majibu mazuri,” amesema Rais Kikwete baada ya kuwa amesoma ujumbe huo maalum wa Rais Mubarak.

Ameongeza Rais Kikwete: “Namwombea Mheshimiwa Mubarak apone haraka. Namtakia afya njema. Ameifanyia mengi mazuri Misri na ameifanyia mengi mazuri Afrika.”