mh. Rungwe kugombea urais kupitia NCCR-MAGEUZI

Kiongozi wa shughuli za uchaguzi na msemaji wa NCCR-Mageuzi, Faustin Sungura (kulia) akimkabidhi fomu ya kinyang'anyiro cha kiti cha Uraisi Tanzania, bw. Hashim Rungwe. Aliyesimama kati ni bw.George Kahangwa, mkuu wa idara ya mafunzo na sera wa NCCR-Mageuzi.

Hashim Rungwe (61) ambaye ni mjumbe wa kamati kuu ya chama cha siasa cha National Convention and Construction Reform (NCCR-Mageuzi) jana Jummane, alijitokeza kuchukua fomu za kuwania kiti cha Urais wa Jamhuri ya Muungano wa Tanzania kwa tiketi ya chama hicho.

Rungwe aliyekuwa akijinadi kwa kauli mbiu ya ‘Mwanzo wenye nguvu’ amekuwa kada wa kwanza wa chama hicho kuchukua fomu hizo licha ya mchakato wa utoaji fomu kuanza tangu Juni 16 mwaka huu. Rungwe huyo ambaye ni Mjumbe wa Baraza la Wadhamini na Mjumbe wa Halmashauri Kuu ya chama hicho alichukua fomu hizo jana katika ofisi za makao makuu ya NCCR jijini Dar es Salaam ikiwa ni siku tatu kabla ya kumalizika kwa mchakato wa uchukuaji wa fomu hizo.

Akizungumza na waandishi wa habari mara baada kuchukua, Rungwe alisema anagombea Urais ili kulipatia Taifa siasa na uongozi safi kwa kuwa mambo hayo mawili ndio yanayokosekana katika Serikali iliyopo madarakani.

“Nikifanikiwa kupata ridhaa ya Chama na Watanzania, kwanza nitahakikisha tunaongeza mchakato wa kulipatia Taifa katiba mpya itakayotokana na Watanzania wenyewe, kuunda serikali ya umoja wa kitaifa itakayojumuisha Watanzania walioko katika vyama vya mbalimbali vya siasa” alisema Rungwe

Alisisitiza kuwa atalijenga Taifa lenye uadilifu ili kutokomeza ufisadi, uzembe na ukosefu wa uzalendo, kusimamia maslahi ya wafanyakazi hasa kima cha chini cha mshahara kuwa 315,000, kuheshimu uhuru wa wananchi kuabudu kulingana na imani zao pamoja na kusimamia maamuzi ya mambo ya msingi ila yasifanywe kuwa jambo la mzaha.

“Pamoja na mambo mengine ninaamini kwamba nchi ikiwa na raia wengi makini, wenye elimu na ujuzi wa mambo mbalimbali wataifanya Serikali iwe makini sana katika utekelezaji wa kazi zake za kila siku jambo ambalo litaliletea taifa maendeleo ya hali ya juu chini ya mpango uitwao mwanzo wenye nguvu” alisema Rungwe

Mkutano wa Halmashauri Kuu ya Chama cha hicho unatarajiwa kufanyika Julai 31 mwaka huu ambao utampitisha mgombea Urais wa chama hicho ambacho kilipata asilimia 28 ya kura zote za urais katika uchaguzi Mkuu mwaka 1995. NCCR-Mageuzi hivi karibuni ilikimbiwa na Mwenyekiti wake kwa kwanza, Mabere Marando ambaye alijiunga CHADEMA.