simba yapata kocha mserbia, yamwambia phiri ang'atuke

UONGOZI wa klabu ya Simba umemtaka kocha wake Patrick Phiri kuwasilisha barua ya kujiuzulu kwa njia ya mtandao, wakati huo huo klabu hiyo imemtangaza kocha mpya raia wa Serbia Cirkovic Milovan kurithi mikoba ya Mzambia huyo.

Simba imefikia hatua hiyo kutokana na kocha huyo raia wa Zambia ambaye aliiwezesha kutwaa ubingwa msimu uliopita kwa mafanikio makubwa akiwa amecheza mechi zote za Ligi Kuu bila ya kupoteza mchezo hata mmoja kutokana kuchelewa kurudi kutoka kwao ambako alikwenda kwa mapumziko.

Hata hivyo kocha huyo aliweka wazi hawezi kurudi kwa sasa na hajui hatarudi lini nchini kuendelea na kibarua chake kutokana na kukabiliwa na matatizo ya kifamilia. Kufuatia hali hiyo, uongozi wa Simba chini ya mwenyekiti wake Ismail Aden Rage umemtaka ajiuzulu kwa ajili ya kulinda heshima yake kabla ya kumchukulia hatua zaidi za kinidhamu.

Kaimu katibu mkuu wa klabu hiyo Evodius Mtawala alisema jana kuwa "Iwapo Phiri hatotii agizo hilo la kuandika barua ya kujiuzulu, tutamchukulia hatua za kinidhamu, sisi tumemtaka afanye hivyo ili kulinda heshima yake."alisema.

Kwa mujibu wa Mtawala Milovan anatarajiwa kuwasili nchini muda wowote kuanzia sasa kusaini mkataba wa miaka miwili tayari kwa kuinoa timu hiyo ambayo ipo mafichoni visiwani Zanzibar chini ya kocha wake Sillarsaid Mziray. Milovan aliwai kuifundisha Simba mwaka juzi kwa muda wa miezi mitatu na kuondoka katika mazingira ya kutatanisha.