uzinduzi wa kampeni za CCM jimbo la arumeru mashariki

mgombea wa ubunge katika jimbo la Arumeru Magharibi,Gooduluck Ole Medeye(kulia) akiwa na mshauri wake mkuu katika kinyang'anyiro cha ubunge,Kanali Mstaafu Mika Metili.
baadhi ya wakereketwa wa CCM wilayani Arumeru walioshiriki katika uzinduzi wa kampeni za mgombea ubunge wa jimbo hilo,Gooduluck Ole Medeye.

Novatus Makunga,Arumeru

Mgombea ubunge katika jimbo la Arumeru magharibi kupitia Chama Cha Mapinduzi (CCM) Goodluck Joseph Ole Medeye ameahidi kuimarisha mfuko wa maendeleo wa jimbo kwa kuhakikisha wananchi wote kutoka wilaya hiyo waliosambaa sehemu mbalimbali duniani wanachangia.

Alisema kuwa lengo la mkakati huo ni kuuwezesha mfuko huo kutatua kero mbalimbali badala ya kutegemea kodi na fedha za serikali.

Ole Medeye alitoa ahadi hiyo wakati wa uzinduzi wa kampeni zake katika uwanja wa Ngaramtoni na kuhudhuriwa na mamia ya wananchi ambao waliongozwa na msururu mrefu wa magari na pikipiki kuanza makao makuu ya chama hicho eneo la Sekei

Alibainisha matatizo yanayohitaji mkakatati wa haraka wa mfuko huo kuwa ni pamoja na shida sugu ya upatikanaji wa maji safi na salama katika maeneo mengi ya jimbo hilo pamoja na kwamba jimbo hilo lipo karibu na mlima Meru

Ole Medeye ambaye pia ni kamanda wa umoja wa vijana (UVCCM) wilayani Arumeru alisema kuwa mlima huo ndiyo wenye vyanzo vingi vya maji ambayo yanatumika katika jiji la Arusha pamoja na wilaya jirani ya Monduli

“Lazima tuweke mkakati wa kushughulikia tatizo la mabomba kukatisha katika jimbo letu yakipeleka maji katika wilaya ya Monduli huku hapa maeneo mengi yakiwa na tatizo la maji,”alisema

Alitaja matatizo mengine kuwa ni pamoja na ukosefu wa barabara ambazo zinaweza kutumika katika vipindi vyote vya mwaka na kuahidi kuwa uimara wa mfuko huo utawezesha jimbo kuwa na barabara bora kiangazi na masika

Akizundua kampeni hizo mwenyekiti mstaafu wa CCM mkoani Arusha Yonah Nnko alisema kuwa anaamini aliyekuwa mbunge wa jimbo hilo kwa miaka kumi na tano,Elisa Mollel atamsaidia ole Medeye katika kampeni na hatimaye kuibuka na ushindi wa kishindo.

“Mollel ni mbunge ambaye amefanya kazi kubwa hapa jimboni na pia ni msomi na mtu ambaye anajiweza kiuchumi hivyo sina shaka naye kabisa katika kushiriki katika kampeni hizi,”alisema.

Hata hivyo Mollel ambaye alishika nafasi ya tatu katika kura za maoni kwa kupata kura 2,603 pamoja na mkuu wa wilaya ya Songea Thomas Ole Sabaya ambaye alishika nafasi ya pili kwa kura 6,715 maoni ndani ya chama hicho hawakuhudhuria uzinduzi huo wa Ole Medeye aliyepata kura 7,481.

Ole Medeye anatarajiwa kupata upinzani mkali kutoka kwa mgomba wa Chama cha Maendeleo na Demokrasia(CHADEMA),Mathius Ole Kisambu ambaye hata katika uchaguzi wa mwaka 2005 alimpa shida kubwa sana Mollel kwa kupata kura 33,593 dhidi ya 57,397

Katika uzinduzi huo imejidhihirisha kwamba aliyekuwa mpinzani wa karibu wa Mollel katika kura za maoni za mwaka 2005 kanali mstaafu Mika Metili ndiye mshauri mkuu wa Ole Medeye katika kampeni zake.