Sherehe za miaka 49 ya Uhuru wa Tanzania zafana liberia

Bango la sherehe

Baadhi ya watanzania waishio na kufanya kazi nchini Liberia katika picha ya pamoja na Mh. Balozi Akin O. Fayomi - Mwakilishi Maalum wa Jumuia ya Afrika (AU) nchini Liberia wa kwanza kushoto waliokaa. Katikati ni Profesa Henrietta Mensa-Bonsu ambaye ni Naibu Mwakilishi Maalum wa Katibu Mkuu wa Umoja wa Mataifa nchini Liberia na watatu kulia waliokaa ni Mwenyekiti wa jumuia ya Watanzania Bw. John C. Minja.

Mwenyekiti wa jumuia hiyo Bw. John C. Minja akihutubia watanzania na wageni waalikwa katika ukumbi wa Taaj jijini Liberia. Katikati ni Mh. Balozi Akin O. Fayomi - Mwakilishi Maalum wa Jumuia ya Afrika (AU) nchini Liberia na watatu kulia ni Profesa Henrietta Mensa-Bonsu ambaye ni Naibu Mwakilishi Maalum wa Katibu Mkuu wa Umoja wa Mataifa nchini Liberia.

wadau wakiserebuka

Watanzania wanaofanya kazi nchini Liberia wamefanya sherehe maalum kuadhimisha miaka 49 ya Uhuru wa Tanzania iliyofanyika jijini Monrovia hivi karibuni.

Mgeni Rasmi katika sherehe hizo alikuwa Mheshimiwa Balozi Akin O. Fayomi - Mwakilishi Maalum wa Mwenyekiti wa Jumuia ya Afrika (AU) nchini Liberia. Umoja wa Mataifa uliwakilishwa na Profesa Henrietta Mensa-Bonsu ambaye ni Naibu Mwakilishi Maalum wa Katibu Mkuu wa Umoja wa Mataifa nchini Liberia.

Katika hotuba fupi ya kumkaribisha Mgeni rasmi, Mwenyekiti wa jumuia hiyo, Bw. John C. Minja alielezea kwa kifupi harakati za Watanganyika hadi kupatikana Uhuru, maendeleo ya kisiasa na kiuchumi yaliyofikiwa hadi sasa pamoja na jitihada za Tanzania katika kushughulikia tatizo la wakimbizi pamoja na migogoro mbali mbali barani la Afrika. Aidha walimpongeza Mheshimiwa Jakaya Mrisho Kikwete wa kuchaguliwa kuwa Rais wa Jamhuri ya Muungano wa Tanzania kwa kipindi kingine cha miaka mitano.

Naye Mgeni rasmi katika Sherehe hiyo Balozi Akin Fayomi aliipongeza jumuia ya Watanzania waishio Liberia kwa nidhamu ya kazi waliyo nayo na weledi wa hali ya juu katika kutekeleza majukumu yao ya kila siku. Aliwapongeza waasisi wa Taifa letu kwa michango yao ya hali na mali katika harakati za ukombozi katika bara la Afrika na dunia nzima kwa jumla.

Pia, aliipongeza Tanzania kwa kudumisha Muungano ambao sasa una miaka zaidi ya 46 pamoja na kuendesha Uchaguzi kwa amani na kudumisha Amani na majirani zetu.

Aidha, aliahidi ofisi ya AU Liberia kushirikiana na Watanzania waishio Liberia katika kuandaa sherehe ya kuadhimisha miaka 50 ya Uhuru hapo mwakani.
Naye Profesa Henrietta Mensa-Bonsu aliipongeza na kuishukuru Tanzania kwa kutuma Wataalamu mbali mbali kuisadia Liberia. Aliwapongeza Wataalamu hao kwa kufanya kazi kwa nidhamu ya hali ya juu. Alimalizia kwa kukipongeza Chuo Kikuu cha Dar es Salaam kwa kutoa wataalam waliobobea kitaaluma.