india yatupiga jeki kusaidia Kilimo Kwanza

Waziri wa Kilimo Chakula na Ushirika Mh. Prof. Jumanne Maghembe akiwa na Balozi wa India nchini Mh. Kocheril Velayudhan Bhagirath

Na Alpha Natai & Issa Sabuni

Waziri wa Kilimo Chakula na Ushirika Mhe. Prof. Jumanne Maghembe amefanya mazungumzo na Balozi wa India nchini Bwana Kocheril Velayudhan Bhagirath na kumueleza kuwa nchi yake imeamua kuisaidia Tanzania fedha, kiasi cha dola 92,000 za Kimarekani ambazo zitaelekezwa kwenye miradi ya Kilimo katika kutekeleza azma ya KILIMO KWANZA.

Balozi huyo wa India nchini aliwasilisha nakala ya barua iliyotoka kwa Waziri Mkuu wa India kwa Waziri Maghembe na kumueleza kuwa barua hiyo pia amemfikishia Waziri Mkuu wa Jamhuri ya Muungano wa Tanzania, Mhe. Mizengo Pinda kumfahamisha kuhusu msaada huo wa fedha.

Aidha, Balozi Bhagirath alimweleza Waziri Maghembe kuwa India imeifanya Tanzania kuwa nchi ya pili kwa kuipatia udhamini wa wanafunzi wa Elimu ya Juu kwenda kusoma nchini humo na kwa mwaka wa masomo wa 2010/2011 jumla yake imefikia wanafunzi 196 nyuma ya Afghanistan.

Balozi Bhagirath aliongeza kuwa nchi yake ipo mbioni kuanzisha kituo kikubwa cha kuzalisha mbegu za mazao ya nafaka ambayo ni mpunga na mahindi chini ya Mpango wa Export Processing Zones (EPZ) na kwamba eneo limeshapatikana huko Bagamoyo mkoani Pwani.

Waziri Maghembe alimshukuru Balozi Bhagirath kwa niaba ya India na kumuakikishia kuwa Tanzania ipo mstari wa mbele katika kushirikiana na India katika maeneo yote yanayolenga kukuza na kuendeleza kilimo