DC ROMBO AWARUSHIA SHUTMA POLISI NA MAAFISA TRA

Mkuu wa wilaya ya Rombo Peter Toima akizungumza na wanahabari ,kushoto kwake ni mkuu wa wilaya ya Moshi Musa Samizi.

Na Dixon Busagaga,Kilimanjaro

MKUU wa wilaya ya Rombo, Peter Toima amesema baadhi ya polisi na maofisa wa Mamlaka ya Mapato Tanzania(TRA) ndio kikwazo katika kudhibiti uvushaji wa mahindi kwenda nchi jirani ya Kenya .

Baadhi ya magari ambayo yalishikiliwa na jeshi la polisi baada ya
kukutwa na shehena ya mahindi yakisafirishwa kuelekea wilayani Rombo

 Toima ameyasema hayo katika mkutano wake na waandishi wa habari,aliouitisha kuzungumzia biashara hiyo ya mahindi, mkutano ambao ulihudhuriwa pia na Samizi ambaye ni mwenyekiti wa wakuu wa wilaya za mkoa Kilimanjaro.

Alisema wapo baadhi ya vijana wasio waaminifu wa TRA na polisi wanaohongwa na wafanyabiashara kuruhusu mahindi yavushwe kwenda Kenya na kufanya zoezi la kuzuia kuwa gumu.

Mkuu huyo wa wilaya, alisema wafanyabiashara hao sasa wamebuni njia mpya mbili mpya ambazo ni Kitobo-Same-Ziwa Jipe-Kenya na Sanya Juu-Ngaranairobi-Olmolok wilayani Siha hadi -Kikelelwa wilayani Rombo na baadaye kuingia Kenya.

Malori yaliyokamatwa yakiwa yamepaki pembeni mwa barabara.

“Tumefanikiwa kudhibiti mchana lakini malori yanavuka usiku wa manane…kama wanapitisha tani 400 za mahindi kwa siku kwenda Kenya hivi tangu biashara hii waanze ni shehena kiasi gani imevushwa kwenda Kenya?”alihoji Toima.

Alifafanua kuwa wilaya yake ina upungufu wa tani 4,000 za nafaka katika vijiji vya maeneo ya tambarare ambavyo ni Shimbi Mashariki,Ibukoni, Kiraeni, Msaranga, Mahorosha na Leto na hakuna tatizo la njaa Rombo.

Toima alisema uongozi wa serikali wilaya ya Rombo hauwezi kukubali mahindi yasemekane yanapelekwa Rombo wakati mahindi hayo hayauzwi katika masoko ya wilaya hiyo na badala yake huvushwa kupitia njia za panya 320 kwenda Kenya.

Mkuu huyo wa wilaya alisema serikali imeanza kuchunguza madai kuwa baadhi ya polisi waliohamishwa wilayani humo baada ya kuhusishwa na vitendo vya rushwa hawajaondoka na ndio wanaowasaidia wafanyabiashara hao.

Kwa upande wake, Samizi aliwataka polisi kutafuta taarifa za kiintelijensia ili kuwabaini wafanyabiashara wanaoendelea na uvushaji huo wa mahindi usiku kwa kutumia pikipiki, baiskeli, malori na pick-up ili waweze kukamatwa mara moja.

Mkuu huyo wa wilaya alifafanua kuwa wananchi wa mkoa Kilimanjaro wametoa ushirikiano mkubwa wa kuzuia mahindi hayo kwenda ya nchi na akavipongeza vyombo vya habari kwa namna vilivyofichua biashara hiyo ya mahindi.

“Kama chakula kingekuwa kinakwenda kwenye masoko ya Rombo isingekuwa tatizo na hata bei ya mahindi ingeshuka, lakini mahindi haya hayaendi Rombo kinachofanyika Rombo inatumika kama kisingizio tu,”alisema Samizi.

Mizigo iliyokamatwa.

Inakadiriwa kuwa malori kati ya 200 na 300 huvuka kila siku kwenda Kenya kupitia njia za panya zilizotapakaa katika wilaya za Moshi Vijijini na Rombo huku baadhi ya polisi na maofisa wa TRA wakidaiwa kugeuza biashara hiyo kuwa mradi.

Nyumba za kulala wageni katika mji mdogo wa Himo zinadaiwa kufurika wageni wakiwemo raia wa kigeni na wafanyabiashara wa mahindi kutoka maeneo mbalimbali ya nchi huku polisi wakionekana kuzidiwa nguvu wafanyabiashara hao.