TCRA KANDA YA KASKAZINI YATAMBULISHA RASMI KWA WADAU MKATABA WA HUDUMA KWA WATEJA

Na Woinde Shizza Michuzi Tv,Arusha

MAMLAKA ya  Mawasiliano  Tanzania(TCRA)  Kanda ya Kaskazini imetambulisha rasmi kwa wadau wa mawasiliano mkataba   wa huduma kwa wateja ambao ulikwishazinduliwa tayari rasmi Mei 8 mwaka huu.

Akizungumzia na waandishi wa habari wakati wa kikao cha wadau wa sekta ya mawasiliano  kutoka Kanda ya Kaskazini ambacho kimefanyika leo Juni 26,2019 Kaimu Mkuu wa Kanda ya Kaskazini Mamlaka  ya Mawasiliano Tanzania( TCRA)Mhandisi Imelda Salum amesema lengo ni kubadili mambo mbalimbali yahusiyo taarifa za mawasiliano

Amesema kwamba mkataba huu unakusudia kuongeza uelewa wa wadau kuhusiana na mamlaka ,huduma zinazotolewa na mamlaka,haki na wajibu wa wateja na pia utaelezea jinsi ya kuhamasisha wadau wasioridhika na huduma wanazozitoa

Aidha amebainisha  pia mkataba huo utasaidia kuwafanya watumishi kuwa na mtazamo wa kujali na kuheshimu zaidi mahitaji ya wateja pamoja na wadau wote kwa kuwahudumia bila ubaguzi wowote ule

Amefafanua kuwa lengo kuu la kuboresha haya yote likiwa ni kuboresha maisha ya Watanzania kupitia uthibiti wenye ufanisi ambao unachochea na kukuza ubunifu ambao unahakikisha upatikanaji wa huduma bora na imara za mawasiliano ambazo zinatolewa kwa gharama nafuu zaidi.

Amesema mkataba huo utasaidia kujua namna gani ya kuhudumia jamii kwa ujumla na kuboresha  sekta ya mawasiliano pamoja na kutatua changamoto zilizopo.

Aidha amewashauri wadau wote wanaotumia huduma zinazotolewa na  mamlaka kuhakikisha wanajua vizuri sheria ,kanuni ,miongozo na taratibu za mamlaka ili kuzifuata vyema  sheria zinazongoza matumizi ya huduma za mawasiliano

Kikao hicho kimefunguliwa leo jijini Arusha na kimeshirikisha wadau wa mawasiliano kutoka mikoa  ya kanda ya kaskazini ambayo ni Tanga,Arusha Manyara na Kilimanjaro.

Kaimu mkuu wa kanda ya kaskazini mamlaka  ya mawasiliano TCRA Mhandisi Imelda Salum akimkabidhi leseni ya kurusha matangazo mkurugenzi  wa Radio Kicheko Live ,Phlaviana Kavishe ya mkoani kilimanjaro .

  kaimu mkuu wa kanda ya kaskazini mamlaka  ya mawasiliano TCRA Mhandisi Imelda Salum  akiongea na wadau wa mamlaka ya mawasiliano katika ukumbi wamkutano katika jengo la mkuu wa mkoa wa Arusha

wadau mbalimbali wakifuatilia mkutano huo