PRAKITI MALLA, MWANAFUNZI MWENYE MWANDIKO BORA ZAIDI

Na Leandra Gabriel, Michuzi TV

MWANDIKO wa mwanafunzi Prakiti Malla (16) maarufu kama "Microsoft Word" binti kutoka Nepal umevunja rekodi ya kuwa mwandiko bora zaidi kuwahi kutokea, katika mitandao mbalimbali ya kijamii hati za mwandiko wa binti huyo zimekuwa zikisambaa na kusifiwa kwa namna ulivyoumbwa kwa namna kuvutia na kusomeka kwa urahisi.

Baadhi ya watu wamekuwa wakitumia muda mwingi zaidi katika shule za awali katika kuumba herufi na stadi za uandishi na wachache hufanikiwa kuumba herufi kwa usahihi huku wengine wakipata wakati mgumu kwa kushindwa kuumba herufi na kuwa na miandiko mibovu.

Baadhi ya wataalamu hasa walimu wanaeleza; kuwa na stadi nzuri ya kuandika haina faida kwa msomaji pekee bali huvutia kwa namna ambavyo umepangiliwa.

Prakiti akiwa darasa la nane mwaka 2017 hati za mwandiko wake zilisambaa na kuzua mijadala katika mitandao ya kijamii hasa Twitter, mwandiko huo ulionekana kuwa bora zaidi kuwahi kutokea kwa mwanafunzi, herufi zilikuwa zimeundwa vyema na wengi wamekuwa wakifananisha mwandiko wa Prakiti na maandishi katika kompyuta.

Mwandiko wa Prakiti ulipelekea Serikali ya Nepal kuanzisha mashindano ya "Penmanship Competition" ambapo binti huyo aliibuka kidedea na serikali ikatangaza mwandiko wa Prakiti ni bora zaidi nchini humo.

Vyombo mbalimbali vya habari vilimnukuu Prakiti akieleza kuwa anatumia masaa mawili kwa siku kwa kufanya mazoezi ya kuandika.

Ni mwandiko pekee uliowafanya watumiaji wa mitandao kufikiria kuuweka mwandiko wa Prakiti katika hati za kompyuta.