MADARAJA MADOGO KUJENGWA KUEPUSHA MAFURIKO MIRERANI

Na Mwandishi wetu, Mirerani

MAMLAKA ya Mji mdogo wa Mirerani Wilayani Simanjiro Mkoani Manyara,

imeazimia kuhakikisha barabara ya lami ya kuelekea mtaa wa Kairo

inawekewa madaraja madogo ili maji yapate upenyo mkubwa wa kupita na

kuepusha mafuriko wakati wa mvua.

Mwenyekiti wa mamlaka ya Mji mdogo wa Mirerani Adam Kobelo ameyasema

hayo katika kikao cha mamlaka ya mji huo. Kobelo amesema shughuli hiyo itafanyika kwa wakati huu ambapo hakuna mvua ili madhara ya mafuriko yasitokee tena pindi mvua kubwa zikinyesha.

Amesema alishazungumza na wakala wa barabara nchini mkoani

Manyara kwa ajili ya kufanikisha ujenzi wa madaraja hayo madogo ya

kupitisha maji.

Amesema wataalamu wa TANROADS mkoani Manyara walipita kwenye barabara hiyo na kufanya upembuzi yakinifu kwa ajili ya ujenzi wa barabara

hiyo.

"Sisi kama viongozi tulisimama kwenye nafasi yetu na kufanikisha

kuonana na viongozi wa TANROADS ili barabara hiyo ifanyiwe ukarabati,"

amesema Kobelo.

Awali, Mwenyekiti wa mtaa wa Kairo, Gadi Msuya ameeleza kuwa, kipindi cha

mafuriko wananchi wengi nyumba zao zilibomoka kutokana na barabara

hiyo kushindwa kupitisha maji kwa wingi.

Msuya amesema endapo suala hilo litapatiwa ufumbuzi itakuwa nafuu kwa

wananchi kwani kipindi cha mvua kikifika maji yatakuwa na sehemu ya

kupitia tofauti na awali.

Mwenyekiti wa mtaa wa Tanesco, Justin Abraham amesema kero hiyo

itafikia kikomo endapo utekelezaji wake unafanyika kwani wananchi

wengi wameathirika na mafuriko kutokana na maji kukosa sehemu ya

kupitia.

"Wananchi wa Mireani hawatatuelewa kama barabara hiyo haitawekwa

madaraja madogo yatakayoruhusu maji kupita kwa wingi hasa kipindi cha

mafuriko," amesema.