SERIKALI YASEMA IPO HAJA YA KUANZISHA VITUO VYA TIBA ASILI KATIKA KILA NGAZI YA UTAWALA

MKURUGENZI wa Sera na Mipango Wizara ya Afya Maendeleo ya jamii Jinsia,Wazee na Watoto, Edward Mbanga amesema kuwa kuna haja ya kuanzisha vituo vya kuendeleza taaluma ya Tiba Asili na Tiba mbadala katika kila ngazi ya utawala wa serikali.

Mbanga ametoa kauli hiyo leo wakati akifungua kikao kazi cha kuimarisha Huduma za Tiba Asili nchini.

‘’Angalau kila mkoa,kila halmashauri kukawa na vituo vya uendelezaji ambazo kupitia sera kukawepo namna ya kuwapa motisha watu wenye ujuzi na tiba hizo wakajaribu kutumia hivyo vituo ‘’

Amesema bado kuna changamoto ya watu kushindwa kuthamini vyakao hasa katika matumizi ya tiba ya Asili kwani wengi hudhani ya kuwa vinavyotoka nje ya nchi huwa ni  bora zaidi kuliko vyakao .

‘’ Kabla ya ustaarabu wa ulaya kuja afrika ikiwemo nchi yetu tulikuwa tukitibiwana kwa miti ya asili tukiugua sasa baada ya mkoloni kuja akiwa na lengo lake akatufundisha kwamba vya kwetu havifai na watu wameendelea kufikiria hivyo ,ukiangalia takwimu za dawa zinazotumika katika vituo vya kutolea huduma za afya nchini asilimia 80% tunaagiza kutoka nje’’    

Kwa upande wake Mkurugenzi wa Tiba  Wizara ya Afya Dkt Grace Maghebe amesema katika nchi ya Tanzania tiba asili ilianza kutambuliwa tangu mwaka 1960 ambapo kwa mara ya kwanza ilikuwa katika Wizara ya Utamaduni na Michezo na baada ya serikali kutambua kuwa hiyo ni tiba ya binadamu  mwaka 1990 waliamishia Wizara ya Afya.

Ameema lengo la kukutana kwao ni kutaka kuona tiba asili na tiba mbadala inawekwa kwenye utaratibu ambao utakuwa ni endelevu na pia kuinyanyua ionekane kama ni tiba sahihi kwa magonjwa kama ilivyo tiba nyingine yeyote.

Akizungumza kwa niaba ya Mganga Mkuu wa Serikali,Mkurugenzi wa Uhakiki Ubora Dkt Eliud Eliakim amesema kama nchi wameamua kuendeleza tiba asili ili iweze kuwasaidia.

Ikumbukwe kuwa wakati Rais Dk Jonh Pombe Magufuli  akizungumza katika hafla ya kuweka jiwe la Msingi  la ujenzi wa Barabara kwa kiwango cha lami zenye urefu wa takribani kilometa 50 katika mji wa Serikali eneo la Mtumba Mkoani Dodoma aliitaka Wizara ya Afya  kuweka nguvu na kuongeza Bajeti katika kitengo Tiba Asili/Tiba Mbadala ili kutengeneza dawa za asili kwaajili ya kuponya magonjwa mbalimbali.