MAAFISA WATENDAJI WA KATA WATAKIWA KUTOA ELIMU YA CHANJO YA UVIKO19 KWA WANANCHI

Na. Dennis Gondwe, DODOMA

MAAFISA Watendaji wa Kata katika Halmashauri ya Jiji la Dodoma wametakiwa kutoa elimu kwa wananchi juu ya chanjo ya ugonjwa wa Uviko-19 unaosababishwa na virusi vya Corona katika maeneo yao.

Wito huo ulitolewa na Mwakilishi wa Mkuu wa Wilaya ya Dodoma, Lucas Mbise alipokuwa akifungua kikao kazi cha tathmini ya mkataba wa Lishe kwa Maafisa Watendaji wa Kata kilichofanyika katika ukumbi wa mikutano wa Idara ya Afya Jiji la Dodoma katika hafla ya kusaini nyongeza ya Mkataba wa Lishe kwa mwaka 2021-2026.

Mbise alisema kuwa Rais alipoingia madarakani aliunda kamati ya kumshauri juu ya ugonjwa wa Uviko-19. Alisema kuwa baada ya ushauri huo akatoa maelekezo ya utaratibu wa chanjo kwa hiari na akaizundua chanjo hiyo yeye mwenyewe.

“Maelekezo ya sasa wataalam wapite kwenye maeneo yetu kutoa elimu na wewe kama kiongozi unawajibu wa kutoa elimu hiyo ili iwafikie wananchi wote. Tusimame kama viongozi, tutekeleze wajibu wetu, ila maamuzi ya kuchanja au kutokuchanja tuwaachie wananchi wetu” alisema Mbise.

Kwa upande wa mwakilishi wa Mkurugenzi wa Halmashauri ya Jiji la Dodoma, Gerald Ruzika alisema kuwa Maafisa watendaji wa kata wana wajibu wa kusimamia suala la utoaji elimu ya chanjo ya ugonjwa wa Uviko-19 kwa umakini.


“Mkisoma Sera ya Utumishi wa Umma aya ya 32; watumishi wote wanafanya kazi kwa niaba ya Rais. Huwezi kupingana na maagizo ya Rais. Hivyo, lazima tuwe mabalozi wa mambo mazuri yanayoanzishwa na serikali. Utakuwa afisa wa ajabu kutokukubaliana nayo. Ni bora uchukue uamuzi wa kujiuzuru. Sisi tunabeba dhamana ya wengi wanaotuamini” alisema Ruzika.

Mwalilishi wa Mkurugenzi wa Jiji, Gerald Ruzika akifafanua jambo

Picha LIshe Backgroud: Mwakilishi wa Mkuu wa Wilaya ya Dodoma, Lucas Mbise (wa pili kulia) na Mwakilishi wa Mkurugenzi wa Jiji la Dodoma, Gerald Ruzika (kushoto) walisikiliza mada