CCM YATOA UFAFANUZI KUHUSU MADAI YA WAKANDARASI DHIDI YA UHURU MEDIA GROUP

Chama Cha Mapinduzi (CCM) kimesikia na kuona kupitia vyombo vya habari kuwepo kwa malalamiko kutoka kwa wafanyabiashara ambao wamedai kuwa wanawakilisha kampuni saba wakilalamika kuidai fedha Kampuni ya Uhuru Media Group (UMG) kutokana na kandarasi za kuzalisha huduma mbalimbali kwa ajili ya kampeni za Uchaguzi Mkuu wa Mwaka 2020.

Kupitia kauli zao zilizonukuliwa katika baadhi ya vyombo vya habari siku ya Jumatano Aprili 27, mwaka huu watoa huduma hao wamedai kuwa jumla ya kampuni 7 wanazoziwakilisha zinaidai kampuni hiyo ya UMG jumla ya Shilingi bilioni moja yakiwa ni malipo na malimbikizo ya madai yao baada ya kutoa huduma za kutengeneza na kusambaza sare na mabango wakati wa kampeni hizo.

Kupitia taarifa hii, Chama Cha Mapinduzi kinatoa kauli kuwa, kinatambua kuwepo kwa madai yakiwemo madeni ya fedha kwa Kampuni ya UMG kutokana na shughuli mbalimbali za kibiashara inayofanya. Kutokana na kutambua hilo, tayari Chama kimeshachukua hatua mbalimbali zikiwemo zinazoendelea sasa za kufanya uhakiki ili kujiridhisha uhalali wake, kabla ya kuendelea na mchakato mwingine baada ya kujiridhisha.

Shaka Hamdu Shaka
Katibu wa Halmashauri Kuu CCM Taifa,
 Itikadi na Uenezi
28 Aprili 2022.