Wilaya Ngorongoro Sasa kutumia umeme wa Gridi ya Taifa.

Na Jane Edward, Arusha

Kwa mara ya kwanza katika historia wilaya ya Ngorongoro halmashauri ya mji mdogo Loliondo Serikali kupitia shirika la umeme Tanzania Tanesco imewasha umeme wa Gridi ya Taifa baada ya kutumia umeme wa genereta kwa zaidi ya miaka 11 huku kiasi cha shilingi Bilioni 1.6 kikitumika kwa mwaka kwaajili ya kununua mafuta ya diesel kuendeshea genereta hilo.

Akizungumza na waandishi wa  habari  Wilayani Ngorongoro,meneja wa shirika la umeme Tanesco Arusha, Mhandisi Herine Muhina amesema  mradi huo wa umeme umetumia shilingi Bilioni 2.9 katika kukamilisha kuunganisha umeme Kwenye Gridi ya Taifa.

Amesema kuwa mradi huo ulianza kutekelezwa 25,2021 na umekamilika Mei 4,2022 ikiwa ni takribani miezi Saba mpaka mradi huo kukamilika na kwamba kubwa zaidi ni nguzo za chuma zilizosimamishwa katika wilaya hiyo kwa mara ya kwanza Mkoani Arusha.

Amebainisha kuwa uwepo wa umeme huo wa uhakika utasaidia kupunguza gharama za mafuta ya diesel ambayo walikuwa wakitumia kuhakikisha wananchi hawakai giza na hivyo kulifanya shirika kutumia pesa nyingi ambapo kwa sasa wameokoa gharama hizo kwa kuwepo kwa umeme wa uhakika.

Amesema kuunganishwa kwa umeme wa Gridi ya Taifa katika wilaya hiyo kutachochea maendeleo kwa kufunguliwa viwanda,mahoteli ya kitalii pamoja na mambo mengine.

Naye Mkuu wa Mkoa wa Arusha John Mongella ambaye ndiye alikuwa mgeni rasmi katika zoezi hilo la uwashaji umeme wa gridi ya Taifa amesema Tanesco imekuwa ikihakikisha inawapatia wananchi huduma bora katika upatikanaji wa nishati ya uhakika na kwamba zoezi hilo limekonga mioyo ya watu na ndiyo lengo la Serikali ya awamu ya sita.

"Tutaongea na wadau kuhakikisha eneo hili linakuwa na viwanda vya nyama ili kuwezesha wananchi kutokwenda mbali kutafuta masoko ya mifugo na kwamba umeme huo umekuja wakati muafaka" Alisema

Kwa upande wake msemaji wa Shirika la umeme Tanesco makao makuu Martine Mwambene amesema kwa muda mrefu kituo kimekuwa kikitumia mafuta ya genereta na kwamba shirika linaenda kuokoa pesa nyingi ambazo zitaelekezwa kwenye mambo mengine.

Amesema ipo Mikoa ambayo haijaingia Kwenye umeme kama Mkoa wa Kigoma na kwamba baada ya miaka michache ijayo Mkoa huo utakuwa na umeme wa gridi wa uhakika katika maeneo mbalimbali.

Amesema Wananchi sasa wanatakiwa kuwa sehemu ya miundombinu hiyo iliyowekwa na tanesco na  kwamba kwa kufanya hivyo watasaidia miundombinu kutohujumiwa.

Msemaji wa Shirika la umeme Tanzania Tanesco makao makuu Martine Mwambene Akizungumza na waandishi wa Habari Wilaya Ngorongoro Mkoani Arusha.

Picha ya eneo lililounganishwa umeme na Tanesco.

Mkuu wa Mkoa wa Arusha John Mongella akisalimiana na wadau wa Tanesco.

Msemaji wa Tanesco akifafanua jambo na wataalamu wa Tanesco Arusha.

Mfano wa nguzo za Chuma zilizotumika katika kuunganisha umeme gridi ya Taifa.