SUA YAIBUKA KIDEDEA KWA TAASISI ZILIZOSHIRIKI MAONESHO YA NANENANE KANDA YA MASHARIKI.

NA FARIDA SAID, MOROGORO.

Chuo Kikuu cha Sokoine cha Kilimo SUA kimeibuka mshindi wa kwanza kwenye kundi la vyuo vikuu na vyuo vya kati kwenye maonesho ya nanenane kanda ya mashariki yaliofanyika mkoani morogoro na wa pili kwa kundi la washriki wa  jumla katika kanda hiyo.

Akizungumza mara baada ya kutangazwa kwa  ushindi huo Kaimu Mkurugenzi wa taasisi ya elimu ya kujiendeleza  Prof.Dismas Mwaseba alisema wamefurahishwa na ushindi huo na wanajipanga kwa maonesho yanayofuata ili kupata ushindi kwa mara nyingine.

“Leo kwetu ni siku ya furaha kubwa kupata ushindi wa pili kwa mshindi wa jumla na ushindi wa kwanza kwa taasisi zilizoshiriki maoneosho haya, nitoe pongezi kwa watumishi wote wa SUA walioshiriki katika kuonesha teknolojia mbalimbali kwenye viwanja hivi na kuifanya SUA kuibuka kidedea.” Alisema Prof. Mwaseba
Aidha alisema wanaenda kuzifanyia kazi changamoto zilizojitokeza katika maonesho ya mwaka huu ili mwaka unaofuata waweze kushika nafasi ya kwanza kwenye maonesho hayo.

Alisema ushindi  huo umechangiwa  na teknolojia mbalimbali ambazo SUA imezionesha katika maonesho hayo ikiwemo vipandwa vya mazao mbalimbali, mifugo, mfumo wa umwagiliaji kwa kutumia simu ya mkononi pamoja na ndege isiyo na rubani(Drone ) inayomsadia mkulima kukagua shamba kwa kupiga picha na kuona maendele ya shamba.