TAMISEMI Queens, JKT Mbweni hapatoshi leo Morogoro

Na Peter Stephen, Morogoro

Timu za Netiboli za Tamisemi Queens na JKT Mbweni

zinatarajia kumenyana leo katika mchezo mkali na wa kusisimua

wa Ligi ya Muungano utakaochezwa katika uwanja wa Jamhuri

mjini Morogoro.

Mchezo huo ni miongoni mwa michezo minne itakayochezwa leo

katika mfululizo wa mechi za ligi ya Muungano ambayo

inashirikisha timu tano za kutoka Tanzania Bara na timu tano

kutoka Zanzibar.

Kwa mujibu wa ratiba iliyotolewa jana na wasimamizi wa ligi

hiyo, mchezo huo umepangwa kuchezwa saa 10 jioni katika

uwanja wa Jamhuri na unatarajia kuwa mkali na wa kusisimua

kwani katika siku za hivi karibuni, timu hizo zimekuwa

zikionyeshana upinzani mkali.

Wakati Tamisemi Queens ikijivunia mastaa kama Sophia,

Komba, Mersiana Samwel, Lilian Jovin, na Gloria Benjamin

waliopo timu ya Taifa, nao JKT Mbweni wana wachezaji

wazoefu wa ligi hiyo na inaongozwa na Kocha Hafidhi Tindwa

ambaye pia ndiye Mwalimu wa timu ya Taifa ya Netiboli.

Akizungumza mbele ya Naibu Waziri, Ofisi ya Rais Tamisemi

anayeshughulikia Afya Dkt. Festo Dugange, ambaye alifika jana

mjini Morogoro kufunga michezo ya Shimisemita, Nahodha wa

Tamisemi Queens, Dafrosa Luhwago aliahidi kushinda mechi

hiyo na michezo mingine yote iliyobaki ili kuiwezesha timu yake

kulitetea kombe la ligi ya Muungano.

“Hadi sasa timu yetu imecheza michezo mitano, na

tumeshinda yote, hivyo tuna kila sababu ya kulitetea kombe

letu,” alijigamba Dafrosa.

Naye, Naibu Waziri Dkt. Dugange aliwataka wachezaji hao

kushinda michezo iliyobaki ili warudi na kombe la ubingwa, na

pia aliwapa salamu za Waziri wa Nchi, Mhe.Angela Kairuki za

kuwataka wachezaji hao wahakikishe kuwa wanatetea na

kulinda heshima ya Tamisemi katika michezo hiyo.

Mapema jana ilichezwa michezo minne ya ligi hiyo ambapo timu

ya Nyika Queens kutoka mkoani Pwani ilikubali kipigo kutoka

kwa timu ya Tamisemi Queens kwa magoli 56-32, JKT Mbweni

iliifunga Mafunzo ya Zanzibar magoli 26-24, na KVZ iliichapa

JKU magoli 47-42.

Bingwa wa Netiboli wa Ligi hiyo ya Muungano anatarajiwa

kupatikana tarehe 3 novemba, 2022 katika uwanja wa Jamhuri

kwa mchezo baina ya Tamisemi Queens na KVZ ya Zanzibar.

Naibu Waziri, Ofisi ya Rais Tawala za Mikoa na Serikali za Mitaa, Mhe.Dkt.Festo Dugange katika picha ya pamoja na Wachezaji na Viongozi wa Timu ya Tamisemi Queens katika uwanja wa Jamhuri mjini Morogoro ambapo Tamisemi Queens inashiriki ligi ya Muungano ya Netiboli ikitetea taji lake.

Naibu Waziri, Ofisi ya Rais Tawala za Mikoa na Serikali za Mitaa, Mhe.Dkt.Festo Dugange akiwasili katika eneo la uwanja wa Jamhuri mjini Morogoro jana kwa ajili ya kuwasalimu wachezaji na viongozi wa timu ya Tamisemi Queens inayoshiriki  Ligi ya Netiboli ya Muungano.

Mfungaji hatari wa Tamisemi Queens Lilian Jovin (GS) akifunga mojawapo ya magoli yaliyoipa ushindi timu yake dhidi ya Nyika Queens ya Pwani katika mfululizo wa michezo ya ligi ya Netiboli inayoendelea katika uwanja wa Jamhuri mjini Morogoro jana.

Mchezaji Lilian Sylidion (GA) wa Tamisemi Queens akitafuta mbinu ya jinsi ya kumfikia mchezaji mwenzake Lilian Jovin (GS)  ambaye amezongwa na wachezaji wa nyuma wa timu ya Nyika Queens katika mojawapo ya patashika zilizotokea katika goli la Nyika Queens, katika moja ya michezo minne iliyochezwa jana ambapo Tamisemi ilishinda mchezo huo kwa magoli 56-32