UWT yawapongeza Madiwani wa viti maalumu wilayani Njombe kwa kutekeleza makubaliano

Njombe

JUMUIYA ya Umoja wa wanawake wa Chama cha Mapinduzi (UWT) wilaya ya Njombe imetoa pongezi kwa madiwani wote wa viti maalumu kwa kufanikiwa kutembelea matawi 207 kuangalia hali halisi ya siasa pamoja na kutoa elimu ya ukatili wa kijinsia.

Mwenyekiti wa UWT wilaya ya Njombe Betreace Malekela ametoa pongezi hizo mara baada ya madiwani kufanya kazi kubwa ya kutekeleza zoezi hilo.

"Wakati tukifuatilia mwenendo wa ziara hizo tumewaona madiwani wakipambana kila mmoja na eneo lake na wakati wakipita wamekutana na wanawake wengi wakiangalia hali ya siasa,usajili wa wanachama lakini jambo jingine ni kutoa elimu ya ukatili wa kijinsia"amesema Betreace

Ameongeza kuwa miongoni mwa jambo lililowapa faraja Jumuiya ni kuona namna madiwani hao walivyowatumia wataalamu kutoa elimu ikiwemo wataalamu wa uchumi kutoka kwenye mabenk kutoa elimu ya uchumi.

Ametoa wito kwa madiwani kuendelea kuzungumzia kazi nzuri zinazofanywa na Rais wa jamhuri ya Muungano wa Tanzania Dkt.Samia Suluhu Hassan ambaye pia ni mwenyekiti wa Chama cha Mapinduzi kutokana na miradi mikubwa ambayo anaendelea kuitekeleza kwenye maeneo mbalimbali nchini.