Rais SSH ateta na Majaji jijini Arusha.

Na Jane Edward,Arusha


Rais Samia Suluhu Hassan amesema Eneo Huria la Biashara la Afrika linatoa fursa kubwa za kiuchumi kwa watu wa Afrika .


Ameyasema hayo wakati akifungua  Mkutano Mkuu wa Mwaka wa Forum ya Majaji Wakuu wa Kusini na Mashariki mwa Afrika kwa mwaka 2023 linalofanyika jijini Arusha.


Rais Samia ameelezea umuhimu wa Mahakama na jukumu lake katika Eneo Huria la Biashara la Afrika huku akisisitiza jukwaa hilo ni muhimu kwani linawakutanisha wanachama 55 wa Umoja wa Afrika na jumuiya nane za kiuchumi za kikanda kuunda soko moja lenye wakazi zaidi ya bilioni 1.3 na GDP ya takriban dola za kimarekani trilioni 3.4.


Amesisitiza kuwa soko hili kubwa linatoa fursa kubwa kwa watu wa Afrika, lakini ni muhimu kutumia fursa hizi kwa ufanisi.


Rais Samia amesema matumizi ya teknolojia katika utoaji wa haki ni muhimu sana katika kuhakikisha utoaji wa haki unafanyika kwa ufanisi na kwa haraka.


Alitolea mfano jinsi Tanzania ilivyofanikiwa kutumia teknolojia wakati wa janga la COVID-19 kutoa huduma za haki kwa wananchi bila kusimamisha shughuli za mahakama.

Kwa upande wake, Jaji Mkuu wa Tanzania, Profesa Ibrahim Hamis Juma, akimkaribisha Rais Samia kufungua mkutano huo amesema kuwa Mkutano huo wamelenga kujadili jukumu la mahakama za kitaifa katika kutatua migogoro Eneo la Biashara Huru la Afrika (AFCFTA) na matumizi ya teknolojia za kisasa katika kuboresha ufanisi wa utoaji wa haki.


Jaji Mkuu alisisitiza umuhimu wa mkutano huo kama jukwaa la majaji kujadili mabadiliko makubwa yanayoendelea katika mazingira ya kisheria na changamoto za kisasa.


Amesema kuwa mkutano mkutano kama huu umewahi kufanyika katika maeneo mbalimbali barani Afrika na jinsi mada zilizojadiliwa zilivyohusiana na mabadiliko na changamoto za kisasa katika mfumo wa mahakama.


Jaji Mkuu Profesa Ibrahim Hamis Juma alisisitiza umuhimu wa majadiliano hayo katika kuboresha utoaji wa haki katika Eneo la Biashara Huru la Afrika.


Jaji Mkuu alielezea jinsi janga la COVID-19 lilivyolazimisha mahakama ya Tanzania kufanya mabadiliko haraka kwa kutumia teknolojia ili kuhakikisha upatikanaji wa haki uliendelea wakati wa janga hilo.


Alitilia mkazo umuhimu wa kutumia teknolojia katika utoaji wa haki na jinsi mahakama za kitaifa zinavyoweza kuchangia katika Eneo la Biashara Huru la Afrika.