Na Janeth Raphael MichuziTv -Dodoma
Serikali imeongeza juhudi za kuimarisha zao la pamba nchini kwa kuweka mkazo katika kuongeza tija, kuhakikisha bei yenye uhalisia kwa wakulima, pamoja na kuboresha huduma za ugani na upatikanaji wa pembejeo bora. Hatua hizi zinalenga kuinua ustawi wa wakulima na kukuza mchango wa zao hilo katika uchumi wa taifa.
Akizungumza wakati wa Mkutano wa Wadau wa Tasnia ya Pamba uliofanyika katika Ukumbi wa Mikutano wa Jakaya Kikwete jijini Dodoma, Waziri wa Kilimo, Mhe. Daniel Chongolo (Mb), amesema Serikali itaendelea kushirikiana na wadau wote katika mnyororo wa thamani wa zao la pamba ili kuhakikisha sekta hiyo inakuwa na tija endelevu.
Ameeleza kuwa juhudi hizo zinajumuisha utoaji wa elimu kwa wakulima kuhusu mbinu bora za kilimo, pamoja na kusambaza pembejeo kwa wakati ili kuongeza uzalishaji na ubora wa pamba inayozalishwa nchini.
Kwa upande wake, Mkurugenzi Mkuu wa Bodi ya Pamba, Marco Mtunga, alisisitiza kuwa zao la pamba lina nafasi muhimu katika kukuza uchumi wa viwanda na kuongeza ajira. Alibainisha kuwa Serikali imelenga kuongeza uzalishaji wa pamba kufikia tani milioni 1 ifikapo mwaka 2030.
Aidha, alifafanua kuwa kupitia programu ya BBT–Ugani Pamba, huduma za ugani zimeboreshwa na kusogezwa karibu zaidi na wakulima, hali iliyochangia kuongezeka kwa uzalishaji. Kwa msimu wa kilimo wa 2025/2026, uzalishaji unatarajiwa kufikia tani laki 3, ikiwa ni hatua muhimu kuelekea malengo ya muda mrefu.
Katika mkutano huo, wadau mbalimbali walitoa maoni yao wakisisitiza umuhimu wa Serikali kufanya tathmini za kina za bei ya pamba ili kuhakikisha mkulima anapata faida stahiki. Pia waliomba kuongezwa kwa matumizi ya teknolojia za kisasa za kilimo, pamoja na utoaji wa ruzuku kwa pembejeo muhimu kama vile viuadudu na mbegu bora.
Wakulima nao walieleza mafanikio wanayopata kutokana na kuboreshwa kwa huduma za ugani. Mkulima mmoja kutoka wilayani Chato alieleza kuwa alianza kwa kulima ekari moja na kuvuna kilo 200 za pamba, lakini baada ya kupata elimu na usaidizi wa kitaalamu, sasa anavuna hadi kilo 2,000 katika ekari hiyo hiyo—ongezeko linaloonyesha mchango mkubwa wa huduma za ugani.
Mkutano huo ulihudhuriwa na viongozi mbalimbali wakiwemo Naibu Waziri wa Kilimo, Mhe. David Silinde (Mb); Katibu Mkuu wa Wizara ya Kilimo, Bw. Gerald Mweli; wajumbe wa Kamati ya Kudumu ya Bunge ya Viwanda, Biashara, Kilimo na Mifugo; wakulima; wabunge; wakuu wa mikoa inayolima pamba; wanaushirika; wafanyabiashara; pamoja na wawekezaji.
Kwa ujumla, mkutano huo umeonesha dhamira ya pamoja kati ya Serikali na wadau kuhakikisha zao la pamba linakuwa kichocheo kikubwa cha maendeleo ya kiuchumi na kijamii nchini.
.jpeg)
.jpeg)
.jpeg)
.jpeg)
Toa Maoni Yako:
0 comments so far,add yours
Hii ni Blog ya Watanzania popote walipo duniani kwa ajili ya kuhabarisha, kutoa/kupokea taarifa na kuelimisha mambo yote yaliyo chanya kwa Taifa letu. Tafadhali sana unapotoa maoni usichafue hali ya hewa wala usijeruhi hisia za mtu/watu. Kuwa mstaarabu...