Wizara ya Kilimo Yaja na Mikakati 30 Kuboresha Tija, Ajira na Usalama wa Chakula 2026/27

Na Janeth Raphael MichuziTv -Dodoma.

Waziri wa Kilimo, Daniel Chongolo, ametangaza kuwa Wizara yake itaendelea kutekeleza vipaumbele sita muhimu katika mwaka wa fedha 2026/2027, kwa lengo la kuimarisha sekta ya kilimo na kuchochea ukuaji wa uchumi nchini.

Akiwasilisha makadirio ya mapato na matumizi ya Wizara hiyo bungeni mjini Dodoma, Waziri Chongolo alisema vipaumbele hivyo ni pamoja na kuongeza tija na uzalishaji, kukuza ajira zenye staha hasa kwa vijana na wanawake, pamoja na kuimarisha usalama wa chakula na lishe.

Alivitaja vipaumbele vingine kuwa ni kuboresha upatikanaji wa mitaji, masoko na kuongeza mauzo ya mazao nje ya nchi, kuendeleza sekta ya ushirika, na kuimarisha matumizi ya mifumo ya TEHAMA katika kukuza kilimo cha kisasa.

Ili kuhakikisha malengo hayo yanafikiwa, Wizara imeandaa jumla ya mikakati 30 itakayotekelezwa katika maeneo mbalimbali. Katika kipaumbele cha kuongeza tija na uzalishaji, Chongolo alieleza kuwa hatua kadhaa zitachukuliwa, ikiwemo kuimarisha utafiti wa kilimo, kuongeza uzalishaji na usambazaji wa mbegu bora na miche, pamoja na kutoa ruzuku ya pembejeo kama mbolea, mbegu na viuatilifu.

Mikakati mingine ni pamoja na kusajili wakulima na kurasimisha shughuli zao, kuboresha huduma za ugani, kuanzisha mashamba makubwa ya pamoja, kupima afya ya udongo, na kuendeleza kilimo cha umwagiliaji.

Aidha, Wizara inapanga kuanzisha vituo maalum vitakavyotoa huduma za zana za kisasa za kilimo ili kuongeza ufanisi kwa wakulima na kuchochea uzalishaji wenye tija.

Hatua hizi zinatarajiwa kuleta mageuzi makubwa katika sekta ya kilimo, ambayo ni mhimili muhimu wa uchumi wa Tanzania, huku zikilenga pia kuongeza kipato kwa wakulima na kuchangia maendeleo ya taifa kwa ujumla.