CRISS MJ: SAFARI YAKE YA KOMPA NA ZOUK KUTOKA DRC HADI SOKO LA KIMATAIFA

Msanii wa kujitegemea mwenye asili ya Jamhuri ya Kidemokrasia ya Congo (DRC) anayeishi nchini Uingereza, Criss MJ, anaendelea kujenga nafasi yake katika muziki kupitia mchanganyiko wa Kompa na Zouk, akilenga kufikisha kazi zake kwa hadhira kubwa zaidi ndani na nje ya Afrika.

Criss MJ ambaye amekuwa akitumia muziki kama njia ya kuunganisha watu na tamaduni tofauti, amejenga sehemu ya hadhira yake kupitia majukwaa ya kidijitali kama TikTok, Spotify, Apple Music na YouTube.

Safari yake ya muziki ilianza tangu akiwa mdogo, akivutiwa na kuimba na kuandika nyimbo. Kadiri muda ulivyokwenda, mapenzi hayo yalibadilika na kuwa dhamira ya kuufanya muziki kwa umakini zaidi na kuanza kurekodi kazi zake rasmi kama msanii wa kujitegemea.

Anasema kilichomvutia zaidi kwenye muziki ni uwezo wake wa kugusa hisia za watu na kuwaunganisha bila kujali wanatoka wapi. Hali hiyo ndiyo iliyomfanya pia kuvutiwa na Kompa na Zouk, mitindo ambayo anaielezea kuwa na melodii zinazovutia, ujumbe wa mapenzi na uwezo wa kuwafanya watu wafurahie muziki huku wakicheza.

Katika kazi zake, “Mon Bébé” ni miongoni mwa nyimbo anazozitaja kuwa muhimu zaidi katika safari yake ya sasa. Wimbo huo umeweza kumfikia hadhira kutoka nchi mbalimbali za Afrika na kumsaidia zaidi katika kujenga jina la Criss MJ.

Kwa upande wake, “Mon Bébé” pia umeonyesha mwelekeo wa muziki anaoutengeneza, akichanganya Kompa na Zouk na ladha za kisasa.

Akizungumzia namna muziki wa Tanzania, maarufu kama Bongo, unavyoweza kufika zaidi katika soko la kimataifa, Criss MJ anaona umuhimu wa wasanii kuendelea kuwekeza katika ubora wa kazi zao, video, matumizi sahihi ya majukwaa ya kidijitali pamoja na kufanya ushirikiano na wasanii kutoka mataifa mbalimbali.

Pia anasisitiza umuhimu wa promosheni, branding na usimamizi mzuri wa kazi za wasanii ili muziki uweze kufikia masoko makubwa zaidi duniani.

Miongoni mwa mambo ambayo Criss MJ anayakumbuka katika safari yake ni kuona watu kutoka nchi mbalimbali wakisikiliza, kushirikisha na kuunga mkono muziki wake kupitia mitandao ya kijamii na majukwaa ya muziki.

Anasema kwake ilikuwa ni hisia ya kipekee kuona kazi zake zikivuka mipaka na kuwafikia watu ambao hajawahi kukutana nao ana kwa ana.

Hata hivyo, safari hiyo haijakosa changamoto. Kama msanii wa kujitegemea, anakabiliwa na ushindani mkubwa katika kuhakikisha kazi zake zinawafikia wasikilizaji wengi zaidi duniani, huku promosheni, gharama za uzalishaji na usambazaji wa muziki kwenye majukwaa mbalimbali zikiwa sehemu ya changamoto hizo.

Licha ya changamoto hizo, Criss MJ anaendelea kusukuma mbele ndoto yake ya kuitangaza Kompa na Zouk katika kiwango cha kimataifa, huku akilenga kutumia muziki kama daraja la kuunganisha tamaduni tofauti na kuwafikia mashabiki kutoka sehemu mbalimbali duniani.

Kwa sasa, safari yake inaendelea kujengwa kupitia muziki, ubunifu na nguvu ya majukwaa ya kidijitali, huku “Mon Bébé” ikiwa miongoni mwa kazi zinazomsaidia kuongeza mwonekano wake katika hadhira ya Afrika na zaidi ya hapo.