TIBA ASILIA NA UHIFADHI WA MAZINGIRA FURSA KUBWA YA AJIRA KWA VIJANA

Shirika la Dawa Asilia na Ulinzi wa Mazingira Tanzania (TRAMEPRO) limetoa wito kwa Serikali, vyombo vya habari, wazee wa mila na desturi, wataalamu wa tiba asilia, wanasayansi, sekta binafsi na taasisi za elimu kuunganisha nguvu katika kuwawezesha vijana kutumia ubunifu na maarifa yao kukuza ajira, afya ya jamii na uhifadhi wa mazingira.

Katibu Mkuu wa TRAMEPRO na Mtaalamu wa Tiba Asilia, Boniventura Mwalongo, amesisitiza umuhimu wa kuwapatia vijana mafunzo, mitaji, vifaa na fursa za utafiti ili waweze kuanzisha na kuendeleza miradi yenye tija katika tiba asilia kwa kijani.

Amesema Tanzania ina fursa kubwa ya kuunganisha maarifa ya jadi na sayansi ya kisasa ili kubuni suluhisho zinazoweza kuchangia maendeleo ya jamii na uchumi wa taifa. Pia, ameeleza kuwa urithi wa Hayati Profesa Wangari Maathai unakumbusha umuhimu wa kulinda mazingira kwa manufaa ya kizazi cha sasa na kijacho.

Katika wito wake kwa Serikali, TRAMEPRO limehimiza kuwepo kwa mazingira wezeshi yatakayowawezesha vijana kupata mitaji, ruzuku, mafunzo na masoko katika kilimo cha mimea tiba, upandaji miti na matumizi endelevu ya rasilimali za asili.

Kwa upande wa vyombo vya habari, shirika hilo limevitaka kutoa nafasi zaidi kwa vijana wabunifu, kuelimisha jamii kuhusu fursa zilizopo na kutangaza tafiti pamoja na mafanikio katika tiba asilia na uhifadhi wa mazingira.

TRAMEPRO pia limewataka wazee wa mila na desturi kushirikiana na vijana na watafiti katika kuhifadhi na kurithisha maarifa ya jadi kwa vizazi vijavyo, huku haki, ridhaa na maslahi ya wenye maarifa hayo yakiheshimiwa.

Vilevile, wanasayansi, taasisi za elimu na wataalamu wa tiba asilia wametakiwa kuimarisha utafiti na ushirikiano kati ya maarifa ya jadi na sayansi ya kisasa, kwa kuzingatia usalama, ubora, maadili na ushahidi wa kisayansi katika madai yanayohusu matibabu.

Katika kuhamasisha ubunifu, TRAMEPRO limependekeza kuanzishwa kwa tuzo zitakazotambua vijana wanaofanya vizuri katika tiba asilia, utafiti, teknolojia, elimu, uhifadhi wa mazingira na ujasiriamali wa kijani. Tuzo hizo zinapendekezwa kuambatana na vyeti, mafunzo, vifaa na ufadhili wa miradi kulingana na matokeo halisi ya kazi zao.

Shirika hilo limeeleza kuwa tiba asilia na uhifadhi wa mazingira vinaweza kuwa vyanzo muhimu vya ajira na biashara, iwapo vitapewa kipaumbele kupitia uwekezaji, utafiti, uzingatiaji wa sheria na matumizi endelevu ya rasilimali za asili.

Katika ujumbe wake wa mwisho, Mwalongo amesisitiza kuwa vijana hawapaswi kutajwa kuwa viongozi wa kesho pekee, bali wanapaswa kupewa elimu, mitaji, vifaa na majukwaa ya kuonyesha uwezo wao na kutekeleza mawazo yao katika wakati huu.

TRAMEPRO limetoa wito kwa, wadau wa maendeleo, sekta binafsi na jamii kwa ujumla kushirikiana kuibua na kuendeleza vipaji vya vijana wanaoweza kubadilisha maarifa kuwa suluhisho, ubunifu kuwa ajira na uhifadhi wa mazingira kuwa urithi wa taifa.

Kaulimbiu ya wito huo inasema: “Tiba Asilia, Afya ya Jamii na Mazingira Endelevu ni Fursa za Ajira, Ubunifu na Maendeleo ya Taifa.”

Imetolewa na: Boniventura Mwalongo

Katibu Mkuu na Mtaalamu wa Tiba Asilia

Shirika la Dawa Asilia na Ulinzi wa Mazingira Tanzania (TRAMEPRO)

Magomeni Kagera, Kinondoni, Dar es Salaam

16 Oktoba 2026