JK awashushua wambea kuhusu yeye na mbeya

JK akihutubia umati wa wananchi wa Mwakaleli alikokwenda kuzindua kiwanda kipya cha kusindika chai. Kila alipokwenda alikuta umati mkubwa na alipokewa kwa shangwe na nderemo

Adhihaki madai anauchukia Mkoa wa Mbeya
Na Mwandishi Maalum,

Rungwe, Mbeya
Rais Jakaya Mrisho Kikwete amedhihaki na kukejeli madai ya baadhi ya watu na magazeti kuwa anauchukia mkoa wa Mbeya, na kuwa kwa sababu hiyo amekuwa anakwenda kuutembelea mkoa huo.

"Yamekuwapo maneno mengi ya kipuuzi kwamba Rais haupendi Mkoa wa Mbeya na kuwa amekuwa anakwepa kuutembelea mkoa huu," amesema Rais na kuongeza:
"Mtakumbuka, ndugu wananchi, kuwa niliutembelea Mkoa wa Mbeya Februari 19, mwaka 2006, baada ya kuwa nimeapishwa, kuja kuwashukuruni. Niliishia mjini Mbeya, lakini nikaahidi kuwa ningerudi kutembelea kila wilaya, na kila jimbo la uchaguzi katika mkoa huu, sasa nimerudi kutimiza ahadi."

Amesema kuwa amechukua muda kurejea mkoani Mbeya kwa sababu Tanzania ni nchi yenye wilaya nyingi, kwa sababu amekuwa anapitia katika mikoa mingi tu.
"Kwangu mimi hakuna mkoa bora zaidi ya mwingine. Mikoa yote ni sawa. Hakuna mkoa naupenda zaidi na kuuchukia mwingine. Haya maneno ya kwamba nauchukia mkoa wa Mbeya ni ya watu walioshiba ugali na maharage, na wakishakuwa wameshiba, basi kazi yao inakuwa ni kutunga na kubuni maneno ya kipuuzi kama haya."

Rais amesema kuwa kama angekuwa kweli anauchukia Mkoa wa Mbeya asiupatia mkoa huo mawaziri wawili waandamizi – yaani profesa Mark Mwandosya ambaye ni Waziri wa Maji, na profesa David Mwakyusa ambaye ni waziri wa afya na ustawi wa jamii. Wote wawili ni wabunge wa Wilaya ya Rungwe ambayo Rais ameitembelea leo.

"Kama nauchukia Mkoa wa Mbeya ningewateua wabunge wawili wa mkoa huo kushika nafasi za uandamizi za uwaziri? Mimi ndio mwenye mamlaka na madaraka ya kuchagua mawaziri. Silazimishwe na yoyote kumchagua yoyote," amesema Rais na kuongeza:
"Baraza nachagua mimi. Silazimishwi na yoyote kumchagua yoyote. Mara mbili nimefanya mabadiliko, lakini nikawarudisha wabunge wenu hawa kwenye baraza hilo, sasa chokochoko ni ya nini? Kama siyo maneno ya walioshiba ni nini? Ndugu wananchi, yapuuzeeni maneno haya."

Watu mbali mbali na hasa magazeti yamekuwa yanadai kuwa kutoutembelea mapema Mkoa wa Mbeya ni matokeo ya Rais Kikwete kuuchukia mkoa huo kwa sababu tu mmoja wa wabunge wa mkoa huo, profesa Mwandosya aligombea urais na kushindwa na Rais Kikwete 2005.

Mkoa wa Mbeya unakuwa mkoa wa 19 wa Tanzania Bara kutembelewa na Rais Kikwete kwa maana ya kutembelea kila wilaya tokea achukue madaraka mwaka 2005. Amebakiza mikoa miwili ambayo ni Morogoro na Tabora.

Pia hajatembelea Tanzania Visiwani.