salamu za kiswahili toka zenji

Assalam alaykum na habari za mwisho wa wiki wadau.

Kaka issa na wadau, yakhe mi nimefurahishwa sana na mwamko wa Watanzania na walimwengu kwa ujumla juu ya matumizi ya Kiswahili, lugha yetu mama, lugha yetu pendwa, hazina pekee iliyobaki ya kujivunia.

Wiki iliyopita kaka Chibiriti aliomba msaada wa kupatiwa methali au misemo 12 ya Kiswahili. Alhamdulillah alipata zaidi ya kumi na mbili.

Hii inaonesha ni kiasi gani Waswahili wanakithamini Kiswahili chao, ingawa kwa lahaja na lafudhi tofauti, lakini bado ni chetu na twajivuniacho. Jambo la kusikitisha ni kuona kwamba viongozi wetu hawaoneshi kimatendo kuthamini kwao Kiswahili chetu.

Nasema hili kwa ushahidi huu: mara nyingi viongozi wetu wanapofanyiwa mahojiano na vyombo vya habari vya kimataifa kwa lugha ya Kiswahili wao hujibu kwa kiingereza, labda kuonesha kwamba wao hawako nyuma katika umahiri wa lugha za watu.

Kwangu mimi, naamini na kwa wazalendo wengine, hili si la kujivunia! Kinachouma zaidi ni pale tunapowasikia viongozi wa nchi jirani kama Kenya, Uganda, Rwanda, Burundi, Kongo na kadhalika ambao sisi ndio tumewapelekea hicho Kiswahili, wao wanapofanyiwa mahojiano kwa Kiswahili basi hujilazimisha kuzungumza Kiswahili japo kimagube lakini kuonesha wanathamini Kiswahili kuliko hata lugha zao za asili.

Pia mara nyingi unapokwenda katika balozi zetu ughaibuni utakuta fomu na maelezo mengine kadhaa yameandaliwa kwa kiingereza na lugha ya nchi hiyo husika, bali hukuti lugha ya Kiswahili. La kujiuliza ni je zile balozi zetu pamoja na kuweka mahusiano na mawasiliano mazuri na nchi marafiki, lakini si pia zinatakiwa kutuhudumia sisi wananchi wake? Au ndio wao huchukulia kiurahisi kwamba watu wote kwa kuwa wako ughaibuni watakuwa wanazungumza kiingereza au hizo lugha nyingine? Hilo mimi nahisi sivyo, na si la kujivunia! Wenzetu wanaothamini lugha zao hupa vipaumbele lugha zao kwanza ndipo hufuatia nyingine.

Watanzania tumezowea kujiachia na kuporwa hazina zetu kiholela. Tumesikia kwamba mlima Kilimanjaro ni mali ya Kenya. Viongozi kimyaaa! Wananchi ndio kifua mbele. Na hadi leo hii bado wageni wengi ambao hawajafika Tanzania wanaamini kuwa mlima Kilimanjaro upo na ni mali ya Kenya. Nakhofishwa kwamba hata na hicho Kiswahili sasa kinakaribia kuwa mali ya haohao Wakenya kwa sababu wao hujitangazia kuwa ni lugha ambayo imechimbukia kwao.

Wao hujitangaza na kujitafakhari kwacho, ilhali sisi, hususan viongozi wetu, twakipiga pute. Wito kwa viongozi na watanzania kwa jumla tukienzi na kujifaharisha kwa Kiswahili chetu. Lugha yetu ni nzuri na ina ladha ya aina yake ukiijua vitakiwavyo. Ningeomba tutumie kila nafasi tuipatayo kwa kujitangaza kwa Kiswahili chetu.

Kutumia Kiswahili kwenye mahojiano au mikutano ya kimataifa ni nafasi nzuri ya kusema kuwa Kiswahili ni lugha yetu na tunaipenda. Na haitapunguza mshahara wenu waheshimiwa.

Kitangaze Kiswahili upate kutambulika

Kiseme kiumahiri wala usiwe na shaka

Lafudhiye ni sahili raha ukikitamka

Sikiache ‘kahajiri ’takuja baki wabweka!

Wakatabahu,

Mzanzibari DK.