Balozi Taj akutana na Watanzania Ufaransa

Mh. Balozi Begum Karim Taj, Balozi wa Tanzania Ufaransa. Chini akiwa na baadhi ya Watanzania waishio Ufaransa alipokutana nao
Katika mkutano huo na Watanzania waishio hapa Ufaransa, Mh Taj alisisitiza kwamba serikali ya Tanzania ina thamini sana raia wake waishio nje ya mipaka ya Tanzania. Alifafanua kwamba serikali kupitia Wizara ya Mambo ya Nje na Ushirikiano wa Kimataifa imeanzisha idara maalumu itayoshughulikia masuala ya watanzania waishio nje ya Tazania (diaspora) ili kujua mahitaji yao, idadi yao na uwezo wao hususani kielimu na kifedha ili kuona ni namna gani wanaweza kuchangia maendeleo ya nchi yao.

Pia Mh. Taj aliwaasa Watanzania waishio Ufaransa wawe mabalozi wazuri wa Tanzania. Aliwaasa kutangaza sifa nzuri na fursa zilizopo kama vile uwekezaji, utalii na mengineyo mazuri ili kuitangaza nchi kwa uwepo wao na katika shughuli zao wawapo ugenini.

Akigusia Uchaguzi Mkuu, Mheshimiwa balozi alisema kuwa Tanzanaia bado ni nchi changa kisiasa na kidemokrasia hivyo si rahisi kwa watanzania walio nje ya nchi kushiriki katika kupiga kura kwa sasa.

Mheshimiwa Taj aliwapongeza pia Watanzania waishio Ufaransa kwa kuunda Chama cha Watanzania Ufaransa (CCWU) kinacholenga kuwaleta pamoja Watanzania. Chama hicho cha Watanzania kiliundwa mwaka 2007. Baadhiy ya malengo ya CCWU ni kutangaza na kukuza utamaduni wa Kitanzania nchini Ufaransa, kuendeleza ufundishaji wa lugha ya Kiswahili; na pia kutangaza utamaduni wa kitanzania kupitia matamasha na shughuli nyingine za kitamaduni. Pia CCWU huunganisha Watanzania waishio Ufaransa katika raha na majonzi.

Kwa sasa viongozi wa CCWU ni Delly Makombe (Mwenyekiti), Elizaphan Manda (Mwenyekiti msaidizi), Pamella Assey Lombard (Katibu) na nafasi ya Mweka Hazina inashikiliwa na Kemilembe Kazaura Monot.