Basi la Taqwa lapata ajali na kujeruhi watu,huku Basi la Moro Best likinusurika maeneo ya Mikese Morogoro

Basi la abiria la kampuni ya Taqwa linalofanya safari zake kati ya Dar-Kigali nchini Rwanda limeanguka katika eneo la Mikese, Morogoro wakati likiwa njiani kuja jijini Dar na kujeruhi watu kadhaa waliokuwepo kwenye basi hilo.Chanzo cha ajali ni lori la mizigo lililokuwa limeegeshwa barabarani kutokana na ubovu, pia mwendokasi wa mabasi,kwa mujibu wa mashuhuda wa ajali hiyo.wakati huo huo Basi la Morobesti limenusurika kuanguka japo liliacha njia kutokana na chanzo hicho hicho cha Lori lililoharikiba na kusimama barabarani. 

Msururu wa magari katika eneo la ajali.

Baadhi ya wananchi wa Mikese, Wilaya ya Morogoro, wakiangalia basi la Moro Best lililopinduka katika Barabara kuu ya Morogoro- Dar es Salaam, na kusabaisha majeruhi kwa abiria 24, Basi hilo lilokuwa likitokea Wilayani Kilosa kwenda Dar es Salaam.

Basi la kampuni ya Morobesti likiwa limeacha njia na kutoka nje ya Barabara kama linavyoonekana pichani hapa likifanyiwa mpango wa kuvutwa na Break Down inayoonekana hapa katika eneo la ajali.

Baadhi ya Majeruhi katika ajali hizo wakiwa katika hospitali ya mkoa wa Morogogo.

Na John Nditi, Morogoro

JINAMIZI la ajali za mabasi limeanza kuukumba Mkoa wa Morogoro baada ya kutokea ajali nyingine mbili tofauti na kusababisha abiria 51 kujeruhiwa na baadhi yao wamelazwa katika Hospitali ya Rufaa ya Mkoa wa Morogoro.

Ajali hizo za mabasi zilitokea kwa muda na nyakati tofauti Januari 5,mwaka huu katika eneo la Mikese,Wilaya ya Morogoro katika Barabara kuu ya Morogoro- Dar es Salaam , hata hivyo hazikusababisha vifo vyovyote.

Ajali hizo zimetokea siku mbili tu baada ya kutokea kwa ajali nyingine Januari 3, mwaka huu ya Basi la Upendo ilipoteza maisha ya abiria wawili na kujeruhi wengine 29 ,katika eneo la Kijiji cha Doma,Wilaya ya Mvomero kwenye barabara kuu ya Morogoro- Iringa.

Akizungunza kuhusiana na ajali hizo, Kamanda wa Polisi wa Mkoa wa Morogoro, Adolfina Chialo, alisema ajali ya kwanza iliyotokea majira ya saa moja asubuhi ya Januari 5, mwaka huu kwa kulihusisha Basi la Taqwa Coach lenye namba T 478 BBJ lilolokuwa likiendeshwa na Nicolaus Mroma Mohamed (31) likitokea nchi ya Burundi kwenda Dar es Salaaam.

Kwa mujibu wa Kamanda huyo, ajali hiyo ilisababisha abiria 27 kujeruhiwa na kati ya hao wanne waliumia ambapo derava wake alijaribu kukwepa kugongana uso kwa uso na gari jingine na alipojaribu kukwepa basi lilitumbukia bondeni.

Kuhusu ajali ya pili ilitokea saa tatu asubuhi ya Januari 5, mwaka huu katika eneo hilo la Mikese, Barabara kuu ya Morogoro- Dar es Salaam,kwa kulihusisha basi la Moro Best lenye namba T 846 BCU aina ya Scania lilolokuwa likiendeshwa na Amini Mzigira (43) ambapo limesababisha majeruhi 24 baada ya kupinduka.

Akizungumzia tukio hilo, Kamanda huyo alisema , Basi hilo lilikuwa likitokea Mjini Kilosa kwenda Dar es Salaamna lilipofika eneo la Mikese nalo lilipoata ajali wakati derava wake alipojaribu kulikwepa gari jingine lilolokuwa likija mbele yake na kutoka nje ya barabara.

Hata hivyo alisema, abiria 24 walijeruhiwa ambapo mmoja amelazwa Hospitalini kutokana na kupata majeraha makubwa aliyoyapata.

Kwa mujibu wa Kamanda wa Polisi wa Mkoa , chanzo cha ajali hizo ni uzembe wa dareva Lori aliyekuwa akijaribu akilipita lori njingine bovu ililiengeshwa kando ya Barabara wakati Basi hilo likipita upande wake.

Hata hivyo Kamanda wa Polisi wa Mkoa huyo, alisema Dereva wa Lori Scania lenye namba T 612 BTL ,Daniel Amos (37) mkazi wa Sinsa , Jijini Dar es Salaam, ametiwa mbaroni na Polisi kutokana na kuwa chanzo cha ajali hizo.

Nao baadhi ya majeruhi wa Basi la Moro Best waliopokelewa Hospitalini hapo kwa ajili ya matibabu , kwa nyakati tofauti walidai kuwa ajali hiyo ilitokana na dereva wa basi kulikwepa Lori hilo.

Miongini mwao ni Halima Maulidi (32) mkazi wa Kilosa, aliyekuwa na watoto wake Hadija Kulongwa (17) na Juma Kulongwa (13) alisema kuwa wanamshukuru mungu kuwanusuri kifo licha ya kupatwa na majeraha madogo.

Baadhi ya majeruhi waliopokelewa kutokana na ajali ya Basi la Moro Best ni Anna Robert na mumewe Matayo Lucas ambao ni wakazi wa Kinondoni , Mkoa wa Dar es Salaam.

Naye Mganga Mkuu wa Hospitali ya Rufaa ya Mkoa wa Morogoro, Dk Frida Mokiti, akizungumzia ajali hizo, alisema walikuwa wamepokea majeruhi wengi kutokana na ajali mbili hizo na kwamba baadhi walitibiwa na kuruhusiwa na wachache wamelazwa.

Kwa mujibu wa Mganga Mkuu wa Hospitali hiyo ya Rufaa ya Mkoa wa Morogoro, waliolazwa kwenye wodi za majeruhi kwa upande wa wanawake na wanaume walikuwa wamefikia saba.

“ Tumepokea majeruhi wengi wa ajali za mabasi mawili moja na baadhi tumewatibu na kuruhusiwa na wachache wamelazwa nab ado tunachukua majina na rekodi zao…na pia majeruhi wawili wanafanyiwa upasuaji kufuatia kuumia vibaya akiwemo mtoto mdogo “ alisema Dk Mokiti.