UDA-RT yataka kuheshimiwa kwa njia za mradi wa BRT

Zikiwa zimebaki siku chache kabla ya kuanza kwa kipindi cha mpito cha mradi wa Mabasi Yaendayo Haraka (BRT), watumiaji wa vyombo vya usafiri wametakiwa kutotumia njia maalum za mradi huo.

Mradi huo unatarajiwa kuanza kufanya kazi tarehe 10 Mwezi ujao na kuendeshwa na kampuni  ya UDA Rapid Transit (UDA-RT).

Msemaji wa Kampuni ya UDA-RT, Bw. Sabri Maburuki amesema jana kuwa “Wananchi waheshimu njia za mabasi hayo kwani itasaidia kuepukana na ajali na wepesi wa kuendesha mradi huo.”

Kwa sasa madereva wa mabasi ya mradi huo wanafanya mazoezi tayari kwa kuanza kwa mradi huo.

Alisema pamoja na kupigwa marufuku, bado kuna baadhi ya vyombo vya usafiri kama magari, bodaboda, bajaji na maguta yanapita katika barabara hizo huku mabasi yakiwa yanafanya mazoezi.

Alisema miundombinu ya mradi huo imejengwa kulingana na mahitaji, hivyo kila chombo cha usafiri kipite na waenda kwa miguu wapite katika njia zilizotengwa.

Akitoa mfano wa kutoheshimu taratibu alisema tayari mabasi manne ya mradi huo yameshakwanguliwa na vyombo vingine katika kipindi hiki cha mazoezi.

“Sheria za mabasi haya ni kama treni, yule aliyegongwa au kagonga basi ndiye mwenye kosa,” alisema.

Alisema tayari mabasi yana madereva waliofuzu, yamekatiwa bima na nauli zinatarajiwa kutangazwa hivi karibuni na Mamlaka ya Usafiri wa Majini na Nchi Kavu (SUMATRA).

Alisema katika kudhibiti ulinzi wa vituo na mabasi, wamefunga kamera kwa ajili ya kubaini watu wenye nia mbaya ya kuhujumu miundombinu hiyo.

Mradi wa BRT unatarajiwa kupunguza kwa kiwango kikubwa tatizo la usafiri katika jiji la Dar es Salaam linalokadiriwa kuwa na watu milioni tano.

Msemaji wa Kampuni inayotarajiwa kuendesha mradi wa Mabasi Yaendayo Haraka (BRT) katika kipindi cha mpito, UDA-RT, Bw. Sabri Maburuki akisisitiza jambo kwa waandishi wa habari jana jijini Dar es Salaam kuhusu kuheshimiwa kwa njia za mabasi hayo ili kusaidia kuepukana na ajali na wepesi wa kuendesha mradi huo unaotarajiwa kuanza tarehe 10 mwezi ujao.