MAAFISA UTUMISHI NA UTAWALA WAPATIWA ELIMU YA FIDIA KWA WAFANYAKAZI

NA K-VIS BLOG/Khalfan Said, Morogoro

KAIMU KATIBU TAWALA Mkoa wa Morogoro, Bw. Herman Tesha amewaasa Maafisa Utumishi na Utawala nchini kuwasaidia wafanyakazi katika mchakato wa kutaarifu ili kupata stahiki zao kwenye Mfuko wa Fidia kwa Wafanyakazi (WCF) pindi wanapopatwa na changamoto za kuumia, kuugua au kufariki kutokana na kazi.

Ameyasema hayo wakati akifunga mafunzo ya kuwajengea uelewa Maafisa hao kuhusu Huduma za Fidia na masuala ya Usalama na Afya Mahali pa kazi mkoani Morogoro, hivi karibuni.

“Najua mtakuwa mmejifunza mambo mengi mapya ambayo hamkuwa nayo hapo awali, mimi binafsi nimeshawahi kuhudhuria mafunzo kama haya na nimefaidika sana. Nitoe rai kwenu nyote mtumie elimu mliyoipata kuwasaidia wafanyakazi wenu kupata stahiki zao pindi wanapoumia, kuugua ama kufariki kutokana na kazi na kwa kufanya hivyo mtakuwa pia mmeusaidia Mfuko kutimiza lengo la kuanzishwa kwake.” Alisisitiza na kutoa mfano… "Mimi mwenyewe ofisini kwangu, watumishi wetu watatu wamefaidika na Mfuko huu tena bahati mbaya zaidi mmoja alifariki lakini ukweli wategemezi wake wanaendelea kufaidika na WCF.”

Kwa upande wao washiriki wamefurahishwa na elimu waliyoipata na wameahidi kwa kupitia mafunzo hayo kila mmoja ataenda kutenda kwa usahihi kwa mujibu wa sheria na miongozo.

“Huduma ya Mtandao ninafahamu ni kitu kizuri sana kwa sisi waajiri kwani tunaweza kuingia kwenye mtandao na kutoa taarifa kwa wakati na mtumishi ataweza kupata stahiki yake kwa wakati.” Alisema Bi. Leila Komba, Afisa Utumishi Mwandamizi Hospitali ya Taifa Muhimbili.

“Sisi tuliobahatika kupata mafunzo haya basi tukawafundishe wenzetu wakiwemo waajiri wetu.” Alisema mshiriki mwingine Bi. Leticia Machibya kutoka Ofisi ya Mkaguzi Mkuu wa Hesabu za Serikali.

Aidha Wameushukuru Mfuko kwa kutoa mafunzo hayo na wangependa yawe endelevu

Awali akifungua mafunzo hayo kwa niaba ya Mkurugenzi Mkuu wa WCF, Mkurugenzi wa Huduma za Tathmini wa Mfuko huo, Dkt. Abdulssalaam Omar, alisema hilo ni kundi la kwanza la Maafisa Utumishi na Utawala au Maafisa Rasilimali Watu kutoka katika taasisi za Umma kupata mafunzo hayo.

“Tumeanza kutoa elimu kama hii kwa Maafisa Utumishi kutoka katika Halmashauri”. Alifafanua Dkt. Omar. 

“Tunafahamu kuwa Maafisa Utumishi na Utawala ni kiungo muhimu sana katika kazi zetu kama Mfuko wa Fidia, kwa sababu wafanyakazi wanapopata changamoto hatua ya kwanza wanawataarifu ninyi na nyie mnao wajibu wa kumtaarifu Mkurugenzi Mkuu WCF kwa niaba ya waajiri wenu, hivyo tumeona ni muhimu kwenu kupata elimu zaidi.” Alisisitiza.

Mafunzo hayo yalihusu uelewa wa jumla kuhusu WCF, Mafao ya Fidia yanayotolewa na Mfuko na Jinsi ya kutoa taarifa za matukio endapo mfanyakazi ataumia, kuugua au kufariki kutokana na kazi kwa njia ya mtandao.

Mkurugenzi wa Huduma za Tathmini WCF Dkt. Abdulsalaam Omar, akitoa Mada kuhusu Mafao yanayotolewa na Mfuko

Kaimu Katibu Tawala  Mkoa wa Morogoro Bw. Herman Tesha, akizungumza na Maafisa Utumishi na Utawala

Baadhi ya Maafisa Utumishi na Maafia Utawala kutoka taasisi za Umma, wakiwa kwenye mafunzo hayo.

Bi. Tumaini Kyando kutoka WCF, akifuatilia majadiliano ya vikundi

Afisa Tathmini za Vihatarishi Sehemu za Kazi WCF, Bw. Robert Duguza, akifuatilia mijadala kwenye makundi.

Mshiriki akionyesha jinsi alivyoweza kupata ukurasa wa mtandao wa WCF Portal wakati mafunzo ya matumizi ya mtandao huo yakiendelea.

Mkurugenzi wa Huduma za Tathmini WCF, Dkt. Abdulsalaam Omar, akizungumza na washiriki

Afisa Mfawidhi wa Mfuko wa Fidia kwa Wafanyakazi (WCF) Mkoani Morogoro, Bw. Athumani Khalfan, akitoa mada kuhusu Sheria ya Fidia.

Meneja Tathmini za Vihatarishi Sehemu za Kazi, Bi. Naanjela Msangi, akitoa mada kuhusu usalama na afya mahali pa kazi.

Mkuu wa Kitengo cha Uhusiano na Elimu kwa Umma, Mfuko wa Fidia kwa Wafanyakazi (WCF), Bi. Laura Kunenge akizungumza na washiriki.

Majadiliano ya vikundi.

Mshiriki wa mafunzo, Bi. Leticia Machibya, akizungumza kwa niaba ya wenzake.