NIC Insurance Yahimiza Wamiliki wa Vyombo vya Moto Kukata Bima kwa Usalama wa Mali Zao

Na Mwandishi Wetu

KAMPUNI ya NIC Insurance imewahimiza wamiliki wa vyombo vya moto nchini kuhakikisha wanakata bima ili kujikinga na athari za kifedha zinazoweza kujitokeza pindi yanapotokea majanga au ajali.

Wito huo umetolewa na Afisa Bima wa NIC Insurance, Iman Mollel, wakati akizungumza na waandishi wa habari katika Banda la kampuni hiyo kwenye Maonesho ya 50 ya Biashara ya Kimataifa ya Dar es Salaam (Sabasaba), yanayoendelea katika Viwanja vya Mwalimu Julius Kambarage Nyerere jijini Dar es Salaam.

Mollel amesema NIC Insurance imeendelea kuboresha utoaji wa huduma kwa kuhakikisha madai ya fidia kwa magari yaliyoharibika kiasi cha kutotengenezeka (total loss) yanashughulikiwa kwa haraka, ambapo malipo hufanyika ndani ya siku saba baada ya mteja kukamilisha nyaraka zote zinazohitajika.

Amesema kampuni hiyo inatoa bima kwa aina mbalimbali za vyombo vya moto, ikiwemo magari binafsi, magari ya biashara, magari ya mizigo, mabasi na magari ya abiria, bajaji pamoja na pikipiki, ili kuhakikisha wamiliki wake wanapata kinga dhidi ya hasara zinazoweza kujitokeza.

Aidha, Mollel amesema NIC Insurance imeweka huduma za kidijitali zinazowawezesha wateja kupata huduma za bima kwa njia ya mtandao, hatua inayolenga kupunguza gharama na muda wa kusafiri kufuata huduma katika ofisi za kampuni hiyo.

Ametoa wito kwa wananchi wanaotembelea Maonesho ya Sabasaba kufika katika banda la NIC Insurance ili kupata elimu kuhusu huduma mbalimbali za bima pamoja na ushauri wa kitaalamu utakaowasaidia kuchagua bima zinazokidhi mahitaji yao.